ലണ്ടന്: ഇംഗ്ളീഷ്പ്രീമിയര് ലീഗില് കളിമാറുന്നു. ലീഗ് പട്ടികയില് ഒന്നാമത് നില്ക്കുന്ന ആഴ്സണലിനെ രണ്ടാം സ്ഥാനത്തുളള മാഞ്ചസ്റ്റര് സിറ്റി ഗോള്മഴയില് മുക്കിയതോടെ കിരീടപോരാട്ടത്തില് മത്സരം മുറുകുന്നു. ഇന്നലെ നടന്ന നിര്ണ്ണായക മത്സരത്തില് ആഴ്സണലിനെ 4-1 നാണ് മാഞ്ചസ്റ്റര് സിറ്റി തകര്ത്തത്. സിറ്റി മുന്നേറ്റക്കാരന് എര്ലിന് ഹാളണ്ട് ഗോളടിയില് റെക്കോഡും കുറിച്ചു.
മത്സരത്തില് സിറ്റി മിഡ്ഫീല്ഡ് ജനറല് കെവിന് ഡെബ്രൂയ്നെ ഇരട്ടഗോള് നേടിയപ്പോള് ഈ സീസണില് തകര്പ്പന് പ്രകടനം നടത്തുന്ന നോര്വേ സ്ട്രൈക്കര് എര്ലിന് ഹാളണ്ടും ഫില് ഫോഡനും ഓരോതവണ ആഴ്സണല് വലയില് പന്തെത്തിച്ചു. ഹാളണ്ടിന്റെ മുടിയാട്ടം കണ്ട മത്സരത്തില് അദ്ദേഹം ഗോളടിച്ചു തുള്ളിയുറയുകയും ചെയ്തു. ഏഴാം മിനിറ്റിലും 45 ാം മിനിറ്റിലും ഡിബ്രുയ്ണേയ്ക്ക് ഗോളുകള് നേടാന് പാകത്തിന് രണ്ട് അസിസ്റ്റും ഒരു ഗോളുമായാണ് ഹാളണ്ട് തിളങ്ങിയത്. കളിയുടെ അവസാന മിനിറ്റിലായിരുന്നു ഹാളണ്ടിന്റെ ഗോള് വന്നത്.
പതിവിന് വിപരീതമായി മുടിയഴിച്ചിട്ട് കളത്തിലെത്തിയ ഹാളണ്ട് ഈ ഗോളോടെ പ്രീമിയര് ലീഗിലെ ലിവര്പൂള്താരം മൊഹമ്മദ് സലയുടെ റെക്കോഡ് തകര്ത്തു. കുറഞ്ഞ കളിയില് നിന്നും കൂടുതല് ഗോളുകളെന്ന 2017 - 18 സീസണില് 38 കളിയില് 32 ഗോള് നേടി സലാ നേടിയ റെക്കോഡാണ് ഹാളണ്ട് തിരുത്തിയത്. 31 കളിയില് താരത്തിന്റെ ഗോള്നേട്ടം 33 ആയി.
അരങ്ങേറ്റ സീസണില് 33 ാം തവണയായിരുന്നു ഹാളണ്ട് ഗോള് നേടുന്നത്. ഇതോടെ ഈ സീസണിലെ എല്ലാ മത്സരങ്ങളില് നിന്നുമായി സിറ്റി താരത്തിന്റെ ഗോള് നേട്ടം 42 കളികളില് 49 ആയി. ഒരു സീസണിലെ എല്ലാ മത്സരങ്ങളില് നിന്നുമായി ഏറ്റവും കുടുതല് ഗോള് എന്ന റൂഡ്വാന് നീല്സ്റ്റര് റൂയി 2002-03 സീസണില് നേടിയ 44 ഗോളിന്റെ റെക്കോഡാണ് മറികടന്നത്. സലാ ഇതേ നേട്ടം 2017-18 സീസണില് നേടിയിരുന്നു. അതേസമയം ഹാളണ്ട് ഈ സീസണിലെ ചാംപ്യന്സ് ലീഗില് ഏഴു കളികളില് 11 ഗോളുകള് നേടിക്കഴിഞ്ഞു. ചാംപ്യന്സ് ലീഗിന്റെ സെമിഫൈനലില് കടന്നിരിക്കുന്ന സിറ്റി റയല് മാഡ്രിഡിനെയാണ് നേരിടേണ്ടത്.
ഈ സീസണില് എട്ട് അസിസ്റ്റും താരത്തിന്റെ പേരിലുണ്ട്. എല്ലാ ടൂര്ണമെന്റുമായി 43 കളികളാണ് ഹാളണ്ട് ആകെ കളിച്ചിട്ടുള്ളത്. പ്രീമിയര് ലീഗില് ഏഴു മത്സരങ്ങള് കൂടി ബാറ്റിയുണ്ട്. ശരാശരി 58 മിനിറ്റില് ഒരു ഗോള് എന്ന ക്രമത്തിലായിരിക്കുകയാണ് ഹാളണ്ടിന്റെ ഗോള് നേട്ടം.
ഇതോടെ പ്രീമിയര്ലീഗ് കിരീടപോരാട്ടത്തിന് ശക്തിയേറി. ഒന്നാം സ്ഥാനത്തുള്ള ആഴ്സണലിനെ വീഴ്ത്തിയതോടെ പോയിന്റ് അകലം വെറും രണ്ടായി കുറയ്ക്കാന് സിറ്റിയ്ക്കായി. 33 കളികളില് നിന്നും 75 പോയിന്റാണ് ഒന്നാം സ്ഥാനക്കാരായ ആഴ്സണലിനുള്ളത്. എന്നാല് മാഞ്ചസ്റ്റര് സിറ്റിയ്ക്കാകട്ടെ 31 കളിയേ കഴിഞ്ഞിട്ടുള്ളൂ. 73 പോയിന്റും നേടാന് അവര്ക്ക് കഴിഞ്ഞിട്ടുണ്ട്.
