ന്യൂഡല്ഹി: ഇന്ത്യയില് നിന്നും 2027 നു ശേഷം ഡീസല് വാഹനങ്ങള് അപ്രത്യക്ഷമായേക്കാന് സാധ്യത. പത്തുലക്ഷത്തിലധികം പേരുള്ള നഗരങ്ങളില് ഡീസല് ഉപയോഗിക്കുന്ന നാലുചക്ര വാഹനങ്ങള്ക്ക് നിരോധനം ഏര്പ്പെടുത്താന് ഒരു സര്ക്കാര് പാനല് ശുപാര്ശ ചെയ്തിട്ടുണ്ട്. പെട്രോളിയം പ്രകൃതിവാതക മന്ത്രാലയം രൂപീകരിച്ച പാനലിന്റേതാണ് ശുപാര്ശ.
10 ലക്ഷം പേര് താമസിക്കുന്ന നഗരങ്ങളില് ഡീസല് വാഹനങ്ങള്ക്ക് നിരോധനം ഏര്പ്പെടുത്തി പകരം വൈദ്യൂതി, ഗ്യാസ് വാഹനങ്ങള്ക്ക് പ്രോത്സാഹനം നല്കാനാണ് ശുപാര്ശ ചെയ്തിരിക്കുന്നത്. 2024 മുതല് നഗര ഗതാഗതത്തിന് ഡീസല് ബസുകള് ചേര്ക്കരുതെന്നും 2030 ഓടെ വൈദ്യൂതി അല്ലാത്ത സിറ്റി ബസുകള് ഉണ്ടാകരുതെന്നും പാനല് പെട്രോളിയം മന്ത്രാലയത്തിന്റെ വെബ്സൈറ്റില് പോസ്റ്റ് ചെയ്ത റിപ്പോര്ട്ടില് പറഞ്ഞിട്ടുണ്ടെന്നാണ് അന്താരാഷ്ട്ര ഏജന്സികള് പറയുന്നത്. അതേസമയം ശുപാര്ശ വന്നിട്ടുണ്ടെങ്കിലും ഇക്കാര്യത്തില് തീരുമാനം നടപ്പാക്കുന്നതിന് മുമ്പ് അത് മന്ത്രിസഭയുടെ മുമ്പാകെ വയ്ക്കേണ്ടതാണ്.
ഇന്ത്യന് റോഡുകളില് വൈദ്യുത വാഹനങ്ങള് പെരുകുന്നതിനായി ഫാസ്റ്റര് അഡോപ്ഷന് ആന്ഡ് മാനുഫാക്ചറിംഗ് ഓഫ് ഇലക്ട്രിക്, ഹൈബ്രിഡ് വെഹിക്കിള്സ് സ്കീമിന് (ഫെയിം) കീഴില് നല്കുന്ന ആനുകൂല്യങ്ങള് മാര്ച്ച് 31-നപ്പുറം പോകരുതെന്ന ശുപാര്ശയും പരിഗണിക്കാന് പാനല് സര്ക്കാരിനെ ഉപദേശിച്ചു. ഇലക്ട്രിക്, ഹൈബ്രിഡ് വാഹനങ്ങള് വാങ്ങുന്നത് പ്രോത്സാഹിപ്പിക്കുന്നതിനായി നാഷണല് ഇലക്ട്രിക് മൊബിലിറ്റി മിഷന് കീഴില് ആയിരുന്നു 2015 ഏപ്രിലില് ഫെയിം സ്കീം അവതരിപ്പിച്ചത്.
ഇന്ത്യയിലെ ഒരു വ്യക്തിയുടെ വാര്ഷിക വാതകപുറന്തള്ളല് ആഗോള ശരാശരിയേക്കാള് കുറവാണ്. 2019ല് ആഗോള ഗ്രീന് ഹൗസ് വാതകത്തിന്റെ 27 ശതമാനം ചൈനയും 11 ശതമാനവുമായി യുഎസും 6.6 ശതമാനം ഇന്ത്യയും പുറന്തള്ളുമെന്ന് കണക്കാക്കപ്പെടുന്നു.
