എരുമേലി: കണമലയില് കാട്ടുപോത്തിന്റെ ആക്രമണം നേരിട്ട കൃഷിക്കാരന് മരണമടഞ്ഞ സംഭവത്തില് നാട്ടുകാരുടെ വന് പ്രതിഷേധം. കണമല ജംഗ്ഷനില് നാട്ടുകാര് വലിയ പ്രതിഷേധമാണ് നടത്തുന്നത്. നാട്ടുകാര് വാഹനം തടഞ്ഞു. വനംവകുപ്പും പോലീസുമെല്ലാം സ്ഥലത്ത് എത്തിയിട്ടുണ്ട്.
വനം വകുപ്പിനെതിരേ വലിയ പ്രതിഷേധമാണ് നാട്ടുകാര് നടത്തുന്നത്. മുമ്പും കാട്ടുമൃഗങ്ങള് നാട്ടിലിറങ്ങുന്നതിന്റെയും കൃഷി നശിപ്പിക്കുന്നതിന്റെയും വിവരം വനംവകുപ്പിനെ അറിയിച്ചിട്ടും നടപടിയെടുത്തില്ല എന്നാണ് നാട്ടുകാരുടെ ആക്ഷേപം. ഇപ്പോള് വീട്ടിനുള്ളില് കഴിഞ്ഞിരുന്നയാളെ വീട്ടില് കയറി വന്യമൃഗം കൊലപ്പെടുത്തിയ പശ്ചാത്തലത്തില് വലിയ പ്രതിഷേധമാണ് നാട്ടുകാര് നടത്തുന്നത്. കൂടുതല് പേര് എത്തിക്കൊണ്ടിരിക്കുകയാണ്.
ശബരിമല പാതയായതിനാല് അനേകം വാഹനങ്ങളാണ് വഴിയില് കുടുങ്ങിയത്. ശബരിമലയിലേക്ക് അടക്കമുള്ളവര് വഴിയില് കുടുങ്ങി. ജില്ലാ കളക്ടറും എംപിയുമെല്ലാം സ്ഥലത്തെത്തി ചര്ച്ച നടത്തണം എന്നാവശ്യപ്പെട്ടാണ് ആള്ക്കാര് പ്രതിഷേധിക്കുന്നത്. ആളുകള് ഏറെ താമസിക്കുന്ന മേഖലയും വനാതിര്ത്തിയുമാണ് കണമല.
കാട്ടുപോത്തിന്റെ ആക്രമണത്തില് നേരത്തേ പുറത്തേല് സ്വദേശി ചാക്കോ എന്നാള് സംഭവസ്ഥലത്ത് വെച്ചു മരിച്ചിരുന്നു. ഇന്ന് രാവിലെ വീടിന്റെ വരാന്തയില് പത്രം വായിച്ച് ഇരിക്കുകയായിരുന്ന ചാക്കോയെ കാട്ടുപോത്ത് കുത്തിവീഴ്ത്തുകയായിരുന്നു.
കാട്ടുപോത്തിന്റെ ആക്രമണത്തില് പ്ലാവനാക്കുഴിയില് തോമാച്ചന് ഗുരുതരമായി പരിക്കേല്ക്കുകയും ചെയ്തു. കോട്ടയം മെഡിക്കല് കോളേജില് ഇയാള് ചികിത്സയിലാണ്. കാട്ടുപോത്തിന്റെ ആക്രമണത്തില് ചാക്കോയുടെ നിലവിളി കേട്ട് ഓടിയെത്തിയതായിരുന്നു തോമസും.
കൊല്ലത്തും കാട്ടുപോത്തിന്റെ ആക്രമണത്തില് ഒരാള് കൊല്ലപ്പെട്ടു. കൊല്ലം ഇടമുളയ്ക്കലില് നടന്ന സംഭവത്തില് കൊടിഞ്ഞല് സ്വദേശി വര്ഗ്ഗീസ് എന്ന 60 കാരനാണ് മരണമടഞ്ഞത്. ഇന്ന് രാവിലെയാണ് ആക്രമണം നടന്നത്. കഴിഞ്ഞ ദിവസമായിരുന്നു ഇയാള് ദുബായില് എത്തിയത്. പറമ്പില് നില്ക്കുമ്പോള് കാട്ടുപോത്ത് വന്ന് കാലില് കുത്തുകയായിരുന്നു. അഞ്ചലിലെ ആശുപത്രിയില് എത്തിച്ചെങ്കിലും രക്ഷിക്കാനായില്ല.
ഇവിടെയും വനംവകുപ്പ് ഉദ്യോഗസ്ഥര് സ്ഥലത്തെത്തിയിട്ടുണ്ട്. വനമേഖലയില് നിന്നും ദൂരെയുള്ള പ്രദേശത്താണ് ആക്രമണം ഉണ്ടായിരിക്കുന്നത്. നാട്ടുകാര് പ്രതിഷേധത്തിലാണ്. തൃശൂരിലും കാട്ടുപോത്ത് നാട്ടിലിറങ്ങിയതിന്റെ സംഭവം റിപ്പോര്ട്ട് ചെയ്തിട്ടുണ്ട്. ചാലക്കുടി മേലൂരിലാണ് കാട്ടുപോത്ത് ഇറങ്ങിയത്. നാട്ടുകാര് ബഹളം വെച്ചതോടെ കാട്ടുപോത്ത് മറ്റൊരു പറമ്പിലേക്ക് ഓടി. വനംവകുപ്പ് ഇവിടെ തെരച്ചില് നടത്തി.
കോട്ടയത്തെയും കൊല്ലത്തെയും സംഭവത്തിന്റെ പശ്ചാത്തലത്തില് നാട്ടുകാര് ഭീതിയിലാണ്. അതേസമയം കാട്ടുപോത്ത് ഇവിടെ കാര്യമായി നാശനഷ്ടം ഉണ്ടാക്കിയിട്ടില്ല. എന്നാല് കണ്ടെത്താന് കഴിയാത്ത സാഹചര്യത്തില് ഇത് തിരിച്ചുവരുമോ എന്നാണ് പ്രധാനമായും ആശങ്ക.
