ബംഗലുരു: മലയാളി വിദ്യാര്ത്ഥികള്ക്ക് നേരെ തീവ്രഹിന്ദു സംഘടനാ പ്രവര്ത്തകരുടെ സദാചാര ഗുണ്ടായിസം തുടങ്ങിയത് ലവ് ജിഹാദ് ആരോപിച്ച്. വ്യത്യസ്ത മത വിഭാഗത്തില് പെട്ടവരാണെന്ന് തിരിച്ചറിഞ്ഞതോടെയായിരുന്നു ആക്രമണവും മര്ദ്ദനവും നടത്തിയത്. കഴിഞ്ഞ ദിവസം രാത്രി സോമേശ്വര് ബീച്ചിലൂടെ നടക്കുകയായിരുന്നു കണ്ണൂര് സ്വദേശികളായ മൂന്ന് മുസ്ളീം യുവാക്കള്ക്കാണ് മര്ദ്ദനമേറ്റത്.
കുട്ടുകാര്ക്കൊപ്പം ബംഗലുരുവില് വിനോദയാത്രയ്ക്ക് എത്തിയവരായിരുന്നു ഇവര്. ലവ് ജിഹാദ് ആരോപിച്ചായിരുന്നു മര്ദ്ദനം. ആണ്കുട്ടികള് മൂന്ന് പേരും മുസ്ലിം മതവിഭാഗത്തില് നിന്നുള്ളവരും പെണ്കുട്ടികള് ഹിന്ദു വിഭാഗത്തില് നിന്നുള്ളവരുമായിരുന്നു. കടല്ത്തീരത്ത് കറങ്ങി നടക്കുന്നതിനിടെ വൈകിട്ട് 7.30 യോടെ ഇവരെ പിന്തുടര്ന്ന് എത്തിയ അക്രമികള് തടയുകയായിരുന്നു എന്നാണ് വിവരം.
തുടര്ന്ന് ചോദ്യം ചെയ്യുകയും വാക്കുതര്ക്കമായി അത് മാറുകയും ചെയ്തു. തുടര്ന്ന് ആണ്കുട്ടികളെ ക്രൂരമായി മര്ദ്ദനത്തിനിരയാക്കിയെന്ന് മര്ദ്ദനമേറ്റവരുടെ ബന്ധുക്കള് പറഞ്ഞു. വടികൊണ്ടും കല്ലുകൊണ്ടും മര്ദ്ദിച്ചു. കല്ലുകൊണ്ടും കയ്യിലിട്ടിരുന്ന വളകൊണ്ടും ബല്റ്റ് ഊരിയും അടിച്ചു. ബോധം നഷ്ടമാകുവോളം മര്ദ്ദിച്ചതായിട്ടാണ് ബന്ധുക്കളുടെ ആരോപണം.
പെണ്കുട്ടികളെ മുടിയില് പിടിച്ച് വലിച്ചിഴച്ചു. അടിയേറ്റ കുട്ടികളെ പിന്നീട് പോലീസ് എത്തിയാണ് ആശുപത്രിയില് പ്രവേശിപ്പിച്ചത്. പെണ്കുട്ടികളെ സുരക്ഷിതമായി എത്തേണ്ടിടത്ത് എത്തിച്ചു. തുടര്ന്ന് അക്രമികള് ബീച്ചില് നിന്നും രക്ഷപ്പെടുകയായിരുന്നു. കഴിഞ്ഞ ദിവസം ബജ്റംഗ് ദള് പ്രവര്ത്തകനെ റോഡിലിട്ട് ക്രൂരമായി ഒരു സംഘം തല്ലിച്ചതച്ചിരുന്നു. മുസ്ലിം യുവതിയുമായുള്ള സൗഹൃദത്തിന്റെ പേരിലാണ് യുവാവിനെ ആക്രമിച്ചതെന്ന് പൊലീസ് പറഞ്ഞു. കര്ണാടകയിലെ ചിക്കമംഗളൂരുവിലാണ് സംഭവമുണ്ടായത്.
പരാതി കിട്ടിയതിന്റെ അടിസ്ഥാനത്തില് രണ്ടു സംഘങ്ങളായി തിരിച്ച് അന്വേഷണം നടത്തിയ പോലീസ് ഇന്നലെ രാത്രിയിലും ഇന്ന് രാവിലെയുമായി ഏഴുപേരെയും പിടിക്കുകയായിരുന്നു. ഇവരില് ഒരാള് പ്രായപൂര്ത്തിയാകാത്ത ആളാണ്. എല്ലാവരും തീവ്രഹിന്ദു സംഘടനകളുമായി ബന്ധപ്പെട്ടവരാണെന്ന് കണ്ടെത്തിയിട്ടുണ്ട്.
