ആലപ്പുഴ: എസ്എഫ്ഐ നേതാവ് നിഖില് തോമസ് ഉള്പ്പെട്ട വ്യാജ ബിരുദ സര്ട്ടിഫിക്കറ്റ് കേസില് പോലീസ് തെരയുന്ന മുന് എസ്എഫ്ഐ നേതാവ് പലര്ക്കും വ്യാജ സര്ട്ടിഫിക്കറ്റുകള് സംഘടിപ്പിച്ചു നല്കിയതായി സംശയം. വിദേശത്തുള്ള ഇയാള്ക്ക് പണം നല്കിയാണ് നിഖില് തോമസ് സര്ട്ടിഫിക്കറ്റ് സംഘടിപ്പിച്ചതെന്നാണ് പോലീസ് സംശയിക്കുന്നത്. ചോദ്യം ചെയ്യാനായി ഇയാളെ നാട്ടിലെത്തിക്കാന് ശ്രമം തുടങ്ങി.
രണ്ടുലക്ഷം രൂപയുടെ ഒരു ഇടപാട് നിഖില് നടത്തിയതായുള്ള 2020 ലെ ബാങ്ക് രേഖ പോലീസ് കണ്ടെത്തിയിട്ടുണ്ട്. ഇതില് നിന്നും സര്ട്ടിഫിക്കറ്റ് ഉണ്ടാക്കി നല്കി എന്ന് സംശയിക്കന്ന എസ്എഫ്ഐ നേതാവിന്റെ അക്കൗണ്ടിലേക്ക് രണ്ടുലക്ഷം രൂപ കൈമാറിയതിന്റെ തെളിവാണ് പോലീസിന് കിട്ടിയിരിക്കുന്നത്. വിദേശത്ത് അദ്ധ്യാപകനായി ജോലി നോക്കുന്ന ഇയാള് മുമ്പ് എസ്എഫ്ഐ കായംകുളം ഏരിയ പ്രസിഡന്റായിരുന്നു.
വിദ്യാര്ത്ഥികള്ക്ക് സര്വകലാശാലകളില് പ്രവേശനം നേടാന് സഹായിക്കുന്ന ഏജന്സി ഇയാള് നടത്തിയിരുന്നു. ഇയാളെ ചോദ്യംചെയ്യാന് നാട്ടിലെത്തിക്കാനുള്ള ശ്രമത്തിലാണ് പൊലീസ്. അതിനിടെ ഒളിവില് പോയ നിഖിലിനെ കണ്ടെത്താന് പ്രത്യേക അന്വേഷണ സംഘം തെരിച്ചില് തുടരുകയാണ്. തിരുവനന്തപുരം, കൊല്ലം, പത്തനംതിട്ട ജില്ലകള് കേന്ദ്രീകരിച്ചാണ് അന്വേഷണം.
19 നു െവെകിട്ട് സ്വിച്ച് ഓഫ് ചെയ്ത മൊെബെല് ഫോണ് ഇതുവരെ ഓണ് ചെയ്തിട്ടില്ല. നിഖില് ഒളിവില് പോകുന്നതിന്റെ തലേന്ന് ഒപ്പം ഉണ്ടായിരുന്ന സിപിഎം കായംകുളം ഏരിയ കമ്മിറ്റി അംഗത്തെ പൊലീസ് കസ്റ്റഡിയില് എടുത്തു ചോദ്യം ചെയ്തിരുന്നു. അഭിഭാഷകനായ ഇയാളുടെ കാറിലാണ് നിഖില് പോയതെന്നു സ്ഥിരീകരിച്ചിട്ടുണ്ട്. കായംകുളത്തു നിന്നു നിഖില് ഈ കാറോടിച്ചു കൊല്ലം ഭാഗത്തേക്കു പോകുന്നതിന്റെ സിസിടിവി ദൃശ്യങ്ങളും ലഭിച്ചു. ഫോണ് സ്വിച്ച് ഓഫ് ആകുന്നതിന്റെ തലേന്ന് തിരുവനന്തപുരത്ത് ഉണ്ടായിരുന്ന നിഖില് വര്ക്കലയില് രാത്രി തങ്ങിയശേഷം രാവിലെ എറണാകുളത്തേക്കു പോയി.
19 നു രാവിലെ കൊച്ചിയിലെ വാട്ടര് തീംപാര്ക്ക് പരിസരത്താണു നിഖിലിന്റെ ടവര് ലൊക്കേഷന്. വൈകിട്ട് കായംകുളത്തു തിരിച്ചെത്തി. രാത്രി 7നു ഫോണ് സ്വിച്ച് ഓഫായി. നിഖിലിന്റെ അടുത്ത സുഹൃത്തായ സി.പി.എം. കായംകുളം ഏരിയ കമ്മിറ്റിയംഗം, കായംകുളത്തു താമസിച്ചു പഠിക്കുന്ന കൊല്ലം ജില്ലക്കാരനായ എസ്.എഫ്.ഐ. നേതാവ് എന്നിവരെ പോലീസ് കസ്റ്റഡിയിലെടുത്തു ചോദ്യം ചെയ്തിട്ടുണ്ട്.
വ്യാജ ബിരുദ സര്ട്ടിഫിക്കറ്റ് കേസില് കുരുങ്ങിയതിനാല് നിഖില് തോമസിനെ സി.പി.എമ്മും പുറത്താക്കി. പാര്ട്ടിയോടു കാട്ടിയതു കൊടിയ വഞ്ചനയാണെന്നും അതിനാല് കായംകുളം മാര്ക്കറ്റ് ബ്രാഞ്ച് അംഗമായ നിഖിലിനെ പുറത്താക്കണമെന്നും സി.പി.എം. ആലപ്പുഴ ജില്ലാ കമ്മിറ്റി ശിപാര്ശ ചെയ്തിരുന്നു. ഇതു സംസ്ഥാന കമ്മിറ്റി അംഗീകരിക്കുകയായിരുന്നു. മൂന്നു വര്ഷം മുമ്പാണ് നിഖില് സി.പി.എമ്മിലെത്തിയത്. കാന്ഡിഡേറ്റ് അംഗമായിരുന്നു. ഏതാനും മാസം മുമ്പാണ് പൂര്ണ അംഗത്വമായത്.
