കാഞ്ഞങ്ങാട്: വ്യാജരേഖ ഹാജരാക്കി താത്കാലിക അധ്യാപക ജോലി നേടിയ സംഭവത്തിൽ കെ വിദ്യക്ക് ഇടക്കാല ജാമ്യം അനുവദിച്ചു. ഹൊസ്ദുർഗ് ജുഡീഷ്യൽ ഒന്നാം ക്ലാസ് മജിസ്ട്രേറ്റ് കോടതി രണ്ടാണ് ജാമ്യം അനുവദിച്ചത്. വിദ്യയെ കസ്റ്റഡിയിൽ വേണമെന്ന് നീലേശ്വരം പോലീസ് കോടതിയിൽ ആവശ്യപ്പെട്ടില്ല. അന്വേഷണവുമായി സഹകരിക്കുമെന്ന് വിദ്യയുടെ അഭിഭാഷകൻ അറിയിച്ചതോടെയാണ് ജാമ്യം ലഭിച്ചത്.
വ്യാജരേഖാ കേസിൽ വിദ്യക്കെതിരെ ഇന്ത്യൻ ശിക്ഷാ നിയമത്തിലെ 201ാം വകുപ്പ് (തെളിവ് നശിപ്പിക്കൽ) കൂടി നീലേശ്വരംപോലീസ് ചുമത്തിയിരുന്നു. വ്യാജരേഖാ കേസിൽ വിദ്യ തെളിവ് നശിപ്പിച്ചുവെന്നാണ് പോലീസിന്റെ കണ്ടെത്തൽ. ഇതിന് പിന്നാലെയാണ് വിദ്യയെ അറസ്റ്റ് രേഖപ്പെടുത്തി കോടതിയിൽ ഹാജരാക്കിയത്.
ഇന്ന് രാവിലെയാണ് വിദ്യ ചോദ്യം ചെയ്യലിനായി നീലേശ്വരംപോലീസ് സ്റ്റേഷനിൽ ഹാജരായത്. നാളെയും മറ്റന്നാളും അന്വേഷണ ഉദ്യോഗസ്ഥന് മുന്നിൽ വിദ്യ ഹാജരാകണമെന്നും കോടതി ആവശ്യപ്പെട്ടിട്ടുണ്ട്. വിദ്യയെ ചോദ്യം ചെയ്യുന്നതിനിടെ കരിന്തളം കോളജ് പ്രിന്സിപ്പലിനേയും പോലീസ് സ്ഥലത്തെത്തിച്ച് ഒരുമിച്ചിരുത്തി ചോദ്യം ചെയ്തിരുന്നു.
അഗളി പോലീസിന് നല്കിയ മൊഴി തന്നെയാണ് വിദ്യ നീലേശ്വരം പോലീസിനും നല്കുന്നത്. വ്യാജ രേഖ താന് ഒറ്റയ്ക്കാണ് നിര്മ്മിച്ചതെന്നും രേഖയുടെ ഒറിജിനല് അട്ടപ്പാടി ചുരത്തില് കീറി കളഞ്ഞുവെന്നുമുള്ള മൊഴി ആവര്ത്തിക്കുകയായിരുന്നു.
അട്ടപ്പാടി ഗവ.കോളജ് നല്കിയ പരാതിയില് കഴിഞ്ഞ ദിവസം അഗളി പോലീസ് വിദ്യയെ അറസ്റ്റു ചെയ്തിരുന്നു. രണ്ടു ദിവസത്തിനു ശേഷം വിദ്യ ജാമ്യത്തിലിറങ്ങുകയായിരുന്നു.
