ബംഗലുരു: സര്ക്കാര് നന്നാക്കും എന്ന് വിചാരിച്ച് കാത്തിരുന്നു മടുത്തപ്പോള് നാടു നന്നാക്കാന് നാട്ടുകാര് തന്നെ രംഗത്ത് വന്നു. രണ്ടുലക്ഷം രൂപ വായ്പയെടുത്തു റോഡിലെ കുഴിയടച്ചു. കിഴക്കന് ബംഗലുരുവിലാണ് സംഭവം. അപകടങ്ങള് തുടര്ക്കഥയായതോടെ റോഡ് നന്നാക്കാന് നാട്ടുകാര് ആവശ്യപ്പെട്ടിട്ടും അധികാരികള് കേള്ക്കാതെ വന്നപ്പോഴാണ് അവര് തന്നെ എല്ലാം ചെയ്തത്.
ഞായറാഴ്ച ''വികസനമില്ലെങ്കില് നികുതിയുമില്ല'' എന്ന പ്രചരണത്തില് വീട്ടുനികുതി നല്കുന്നില്ലെന്ന് ആള്ക്കാര് ചേര്ന്ന് തീരുമാനം എടുത്തിരിക്കുകയാണ്. കഴിഞ്ഞയാഴ്ച ഇക്കാര്യത്തില് യോഗം ചേര്ന്ന വീട്ടുകാര് എല്ലാവരും ചേര്ന്ന് ഹലനായകഹള്ളി മുനേശ്വര ചൂടാസാന്ദ്ര എന്നിവിടങ്ങളിലുള്ള ആറു കിലോമീറ്ററിലെ കുഴിയടയ്ക്കാന് പണം പിരിച്ചെടുത്തിരുന്നു.
ഗ്രൂപ്പിന്റെ സ്ഥാപകനായ 32 കാരന് ടെക്കി ഈ ആവശ്യത്തിനായി 3.7 ലക്ഷം രൂപ വായ്പയെടുക്കുകയും ചെയ്തു. ഏതാനും ദിവസങ്ങള്ക്ക് മുമ്പാണ് ഹോസാ റോഡില് രണ്ട് അപകടമുണ്ടായത്. ഇയാളുടെ അപ്പാര്ട്ട്മെന്റിന് സമീപത്തുളള ഒരു യുവതിയ്ക്ക് പരിക്കേറ്റിരുന്നതായും ഇയാള് പറയുന്നു. അവര് സഞ്ചരിച്ച ഓട്ടോ ഗട്ടറില് മറിഞ്ഞുണ്ടായ അപകടമായിരുന്നു ഇത്.
ഇതേ റോഡില് തന്നെ ഒര ഡെലിവറി ഏജന്റിനും അപകടമുണ്ടായി. ആഗസ്റ്റ് 14 നായിരുന്നു ഇത്. രാത്രിയില് യാത്ര ചെയ്യുമ്പോള് കുഴിയില് വീഴാതിരിക്കാന് വാഹനം വെട്ടിച്ചപ്പോള് എതിരേ വന്ന കാറില് ഇടിക്കുകയായിരുന്നു. അപകടത്തില് ഇയാളുടെ കാല് ഒടിഞ്ഞു. മാണ്ഡ്യ സ്വദേശിയായ ഇയാള് ഒമ്പതംഗ കുടുംബത്തിന്റെ അത്താണിയായിരുന്നു.
ഇതോടെയാണ് തന്റെ സമാന മനസ്ഥിതിയില് ചിന്തിക്കുന്നവരുടെ കൂട്ടായ്മ ഉണ്ടാക്കാന് തീരുമാനിച്ചത്. അഞ്ചു വര്ഷം മുമ്പ് ഇവര് പൗരസമിതി ഉണ്ടാക്കിയിരുന്നു. ഇതിലുണ്ടായിരുന്നവരും എല്ലാവരും ചേര്ന്ന് റോഡിലെ കുഴിയടയ്ക്കാന് തീരുമാനിക്കുകയായിരുന്നു. പണം സ്വരൂപിച്ചെങ്കിലും ഇത് പെട്ടെന്ന് തന്നെ തീര്ന്നതോടെയാണ് താന് വായ്പ എടുത്തതെന്നും ടെക്കി പറയുന്നു. ജനപ്രതിനിധികളോട് റോഡ് നന്നാക്കാന് പല തവണ പറഞ്ഞിട്ടും കാര്യമായ പ്രതികരണമുണ്ടായില്ല.
രാഷ്ട്രീയക്കാര്ക്ക് മറ്റൊരു കാര്യമാണ് പ്രധാനമെന്നും തങ്ങള് താമസിക്കുന്ന ഇടം വേറെ സംസ്ഥാനക്കാര് കഴിയുന്ന ഇടമാണെന്നാണ് അവര് കാണുന്നതെന്നും ഇയാള് പറയുന്നു. അതുകൊണ്ടാണ് നികുതി ബഹിഷ്ക്കരണം പോലെയുള്ള ഒരു പ്രചരണത്തിന് തുടക്കമിട്ടത്. വികസനമില്ലെങ്കില് നികുതിയുമില്ല. ട്വിറ്ററില് ഹാഷ്ടാഗായി തുടങ്ങുകയായിരുന്നു എന്നും ഇയാള് പറയുന്നു.
