തിരുവനന്തപുരം: നിയമസഭാ സമാജികര്ക്കായി ആഡംബര സൗകര്യത്തോടു കൂടിയ താമസസൗകര്യം ഒരുങ്ങുന്നു. ആകര്ഷകമായ ഹോസ്റ്റല് സംവിധാനം തീര്ക്കാനാണ് സ്പീക്കര് ഓഫീസിന്റെ തീരുമാനം. വന് ശമ്പളവും പെട്രോള്/ ഡീസല് അലവന്സും ലഭിക്കുന്നുണ്ടെങ്കിലും അതൊക്കെ മണ്ഡലത്തില് ഒരു തവണ കറങ്ങുമ്പോള് തന്നെ തീരുമെന്നാണ് എം.എല്.എമാര് പറയുന്നത്.
തലസ്ഥാനത്ത് എം.എല്.എമാര്ക്കായി നിര്മിക്കുന്ന പുതിയ കെട്ടിടസമുച്ചയത്തിലുള്ളത് വമ്പന് സൗകര്യങ്ങളാണ്. 1,200 മുതല് 1,300 വരെ ചതുരശ്രയടി വിസ്തീര്ണമുള്ള 60 ഫ്ളാറ്റുകള്ക്ക് പുറമെ ആധുനിക ജിംനേഷ്യവും ബില്യാര്ഡ്സും ചീട്ടും കളിക്കാനുള്ള സൗകര്യവും ബഹുനില യന്ത്രവല്കൃത കാര് പാര്ക്കിങ് സംവിധാനവും ഉണ്ടാകും. 77 കോടിയോളം രൂപ ചെലവാക്കി നിര്മിക്കുന്ന പുതിയ ''പമ്പ'' ബ്ലോക്കിന്റെ കരാര് ഊരാളുങ്കല് സൊസൈറ്റിക്കാണ് നല്കിയിരിക്കുന്നത്.
നീന്താന് താല്പ്പര്യമുള്ള എം.എല്.എമാര്ക്ക് ഹോസ്റ്റലിന്റെ പിറകില് പോലീസ് വകുപ്പിന്റെ മേല്നോട്ടത്തില് പ്രവര്ത്തിക്കുന്ന നീന്തല്കുളത്തില് ഇറങ്ങാം. ജനപ്രതിനിധികള്ക്കു വലിയ ഫീസ് നല്കേണ്ടി വരില്ല. കാലപ്പഴക്കത്തെത്തുടര്ന്നാണ് എം.എല്.എ. ഹോസ്റ്റല് സമുച്ചയത്തിലെ പമ്പ ബ്ലോക്ക് പൊളിച്ചുനീക്കിയത്. പകരം നിര്മിക്കുന്ന, മുഖ്യമന്ത്രി തറക്കല്ലിട്ട കെട്ടിടത്തില് 11 നിലകളിലായി 60 അപ്പാര്ട്െമന്റുകള്. ബാല്ക്കണി സൗകര്യമുള്ള രണ്ട് ബെഡ്റൂമുകള്, ലിവിങ് ഏരിയ, ഡൈനിങ് റൂം, അടുക്കള, വര്ക്ക് ഏരിയ എന്നിവ ഓരോ ഫ്ളാറ്റിലുമുണ്ട്.
ഗ്രൗണ്ട് ഫ്േളാറില് അതിഥികള്ക്കുള്ള സ്യൂട്ട് റൂം. ഇവിടെ ഓഫീസ്, ലിവിങ്, ഡൈനിങ് റൂമുകളും ബാല്ക്കണിയോടു കൂടിയ രണ്ട് കിടപ്പുമുറികളും അടുക്കളയും. രണ്ട് അണ്ടര്ഗ്രൗണ്ട് നിലകളിലായി 27 കാറുകള് പാര്ക്ക് ചെയ്യാം. ഇതിന് പുറമെ യന്ത്രവല്കൃത ബഹുനില കാര്പാര്ക്കിങ് കേന്ദ്രം. ഇവിടെ 29 കാറുകള് ഇടാം. ഒരേ സമയം 14 പേര്ക്ക് കയറാവുന്ന നാല് ലിഫ്റ്റുകള്. ആധുനിക ജിംനേഷ്യം, വിശാലമായ ക്യാന്റീന്. കെട്ടിടത്തിന് അകത്തും പുറത്തും വിനോദത്തിനായി പ്രത്യേക സ്ഥലങ്ങളുണ്ട്.
ബില്യാര്ഡ്സ്, ചീട്ട് എന്നിവ കളിക്കാവുന്ന 630 ചതുരശ്രയടി വിനോദ മേഖല ഇതിലുള്പ്പെടുന്നു. താഴത്തെ നിലയില് 80 പേര്ക്കിരിക്കാവുന്ന ഹാളുമുണ്ട്. പൊതുമരാമത്ത് വകുപ്പാണ് 40 മീറ്റര് ഉയരമുള്ള കെട്ടിടത്തിന്റെ രൂപകല്പന . ഊരാളുങ്കല് നിര്മിക്കുന്ന കെട്ടിടത്തിന്റെ ചെലവ് 76 കോടി 96 ലക്ഷം രൂപ. 2026 ജനുവരിയില് നിര്മാണം തീരും. അഞ്ചുവര്ഷത്തെ പരിപാലനവും ഊരാളുങ്കലിന്റെ ചുമതലയാണ്. നിയമസഭാസമ്മേളനത്തിന്റെ പിരിമുറുക്കം എം.എല്.എമാര് ഫ്ളാറ്റുകളില് എത്തുമ്പോള് അവസാനിക്കുമെന്ന് ചുരുക്കം.
