തൃശൂര്: മകനും പേരക്കുട്ടിയും മരിച്ച പിതാവ് പെട്രോള് ഒഴിച്ചു തീകൊളുത്തിയ സംഭവത്തിന് കാരണമായത് പുത്രനോട് പിതാവിന് തോന്നിയ കടുത്ത പക. കഴിഞ്ഞ ദിവസം രാത്രിയില് നടന്ന സംഭവത്തില് മകനും ഭാര്യയും പേരക്കുട്ടിയും കിടന്നുറങ്ങുന്ന മുറി പുറത്തുനിന്നും പൂട്ടിയ ശേഷം ആയിരുന്നു ജനാലയിലൂടെ പെട്രോള് ഒഴിച്ചതും കത്തിച്ചതുമെന്നാണ് വിവരം.
മകന് ജോജി (38), ജോജിയുടെ മകന് ടെന്ഡുല്ക്കര് (12) എന്നിവരാണ് മരിച്ചത്. ജോജിയുടെ ഭാര്യ ലിജിയും ഗുരുതര പൊള്ളലേറ്റ് കൊച്ചിയിലെ ആശുപത്രിയില് ചികിത്സയിലാണ്. ആക്രമണത്തിന് ശേഷം വിഷം കഴിച്ച് ആത്മഹത്യയ്ക്ക് ശ്രമിച്ച ജോണ്സണ് തൃശൂരിലെ ആശുപത്രിയില് ഗുരുതരാവസ്ഥയിലാണ്. പോലീസും നാട്ടുകാരും നടത്തിയ തെരച്ചിലിലാണ് വീടിന്റെ ടെറസില് വിഷം കഴിച്ച് ഗുരുതരാവസ്ഥയിലായ ജോണ്സണെ കണ്ടെത്തിയത്. മണ്ണുത്തി പോലീസ് കേസെടുത്ത് അന്വേഷണം ആരംഭിച്ചു.
കുടുംബ വഴക്കിനെ തുടര്ന്നാണ് ജോണ്സണ് ആക്രമണം നടത്തിയതെന്നാണ് പ്രാഥമിക നിഗമനം. രണ്ടു വര്ഷത്തോളമായി ജോണ്സണും മകനും തമ്മില് തര്ക്കങ്ങള് പതിവായിരുന്നുവെന്ന് നാട്ടുകാര് പറയുന്നു. സെക്യുരിറ്റി ജീവനക്കാരനായ ജോണ്സണ് ഭാര്യയെ പൂട്ടിയിട്ടതിന് ശേഷമാണ് മകനെയും കുടുംബത്തിനെയും തീകൊളുത്തി കൊല്ലാന് ശ്രമിച്ചത്.
ആക്രമണത്തില് ജോണ്സണും സാരമായി പൊള്ളലേറ്റു. വീട്ടില്നിന്നും തീയും പുകയും ഉയരുന്നത് കണ്ട നാട്ടുകാരാണ് ഓടിയെത്തി രക്ഷാപ്രവര്ത്തനം നടത്തിയത്. തുടര്ന്ന് മണ്ണുത്തി പോലീസും സംഭവസ്ഥലത്തെത്തി. പൊള്ളലേറ്റ ജോജിയെയും ഭാര്യയേയും മകനേയും നാട്ടുകാര് തന്നെയാണ് ആശുപത്രിയിലേക്ക് മാറ്റിയതും. നില ഗുരുതരമായതിനാല് മൂവരെയും തൃശൂരില്നിന്നും കൊച്ചിയിലെ സ്വകാര്യ ആശുപത്രിയിലേക്ക് മാറ്റിയിരുന്നു എന്നാല് ഇന്നലെ പകലോടെ ജോജിയും മകനും മരണത്തിന് കീഴടങ്ങുകയായിരുന്നു.
