ഇടുക്കി: ഇടുക്കി തടിയമ്പാട് ബെവ്കോ ഔട്ട്ലെറ്റില് വിജിലന്സിന്റെ മിന്നല് പരിശോധന. ഇന്നലെ വൈകിട്ട് മുതല് നടന്ന പരിശോധനയില് കണക്കില്പെടാത്ത 46,850 പിടിച്ചെടുത്തു. സ്റ്റോക്കും വിറ്റുവരവും പരിശോധനിച്ചതില് 46,000 രൂപയുടെ വ്യത്യാസം കണ്ടെത്തിയിരുന്നൂ. തുടര്ന്ന് നടത്തിയ പരിശോധനയില് എല്ഡി ക്ലാര്ക്കിന്റെ പക്കല് നിന്നും 15,000 രുപയും സ്റ്റോക്ക് ഇന്ചാര്ജ് താമസിക്കുന്ന മുറിയില് നിന്ന് 15,980 രൂപയും ജീവനക്കാരുടെ വാഹനങ്ങളില് നിന്ന് 7,000 രൂപയുമാണ് പിടിച്ചെടുത്തത്. കമ്മീഷന് കണക്ക് രേഖപ്പെടുത്തിയ ഡയറിയും പിടിച്ചെടുത്തു.
ഗൂഗ്ള് പേ വഴി നാല് ജീവനക്കാരുടെ അക്കൗണ്ടുകളിലേക്ക് അനധികൃതമായ ഇടപാടുകള് നടന്നതായി കണ്ടെത്തിയിട്ടുണ്ട്. പരിശോധന നടക്കുന്നതിനിടെ ഔട്ട്ലെറ്റില് അനധികൃതമായി നിയമിച്ച സ്വീപ്പര് തസ്തികയിലുള്ള ജീവനക്കാരന് പുറത്തേക്ക് ഓടി രക്ഷപ്പെട്ടു.
ഔട്ട്ലെറ്റിലെ മദ്യത്തിന്റെ സ്റ്റോക്കില് ക്രമക്കേടുണ്ടെന്നും വിജിലന്സ് കണ്ടെത്തിയിട്ടുണ്ട്. ജീവനക്കാരില് നിന്ന പിടിച്ചെടുത്ത പണം മദ്യകമ്പനികളില് നിന്നുള്ള കമ്മീഷനും ഉപഭോക്താക്കളില് നിന്ന് വാങ്ങിയ പണവുമാണെന്ന് സ്ഥിരീകരിച്ചിട്ടുണ്ട്. ജീവനക്കാര് ജോലിക്ക് ഹാജരാകുമ്പോള് റെക്കോര്ഡില് രേഖപ്പെടുത്തിയിരുന്ന പണവുമായി തട്ടിച്ചുനോക്കിയപ്പോഴാണ് 46,850 രൂപ അധികമായി കണ്ടെത്തിയത്.
