സിനിമാ ലോകത്ത് വന് തരംഗം സൃഷ്ടിച്ച് മുന്നേറുകയാണ് ഷാരൂഖാന് കേന്ദ്ര കഥാപാത്രമായ ബോളിവുഡ് ചിത്രം ജവാന്. ചിത്രത്തില് ഷാരൂഖ് അവതരിപ്പിച്ച ആസാദ് എന്ന കഥാപാത്രത്തിന്റെ ഒരു രംഗം വലിയ ജനപ്രീതി നേടിയിരുന്നു. മെട്രോയില് നിന്നുള്ള ഒരു രംഗമാണിത്. ഷാരൂഖ് ഖാന്റെ കഥാപാത്രം ബെഖരാര് കര്കെ ഹമേ യൂന ജായിയേ എന്ന ഗാനത്തിന് ചുവടുവെക്കുന്നതാണ് ഇതിലുള്ളത്. ഇത് ആരാധകര് വലിയ രീതിയില് ഏറ്റെടുത്തിരുന്നു. നിരവധി പേര് വിവിധ മെട്രോകളില് ഈ സീന് പുനരാവിഷ്കരിച്ചിരുന്നു. ആ വീഡിയോ സോഷ്യല് മീഡിയയില് തരംഗമായിരുന്നു. എന്നാല് ഒരു യുവതി ഇതേ രംഗം പുനരാവിഷ്കരിച്ചതാണ് ഇപ്പോള് നെറ്റീസണ്സിനിടയില് ഏറെ ശ്രദ്ധ നേടിയിരിക്കുന്നത്.
ഇന്സ്റ്റഗ്രാം ഇന്ഫ്ളുവന്സറായ സഹേലി രുദ്രയാണ് ഈ വീഡിയോ പങ്കുവെച്ചത്. ഇവരാണ് വീഡിയോയില് ഡാന്സ് കളിക്കുന്നത്. ജവാനില് ഷാരൂഖ് ഖാന് മുഖമാകെ ബാന്ഡേജ് ഇട്ട് മറച്ച ലുക്കിലാണ് പ്രത്യക്ഷപ്പെട്ടത്. ട്രെയിനിലെ രംഗത്തിലും ഇങ്ങനെയായിരുന്നു. ഇതേ വേഷത്തിലാണ് സഹേലിയും വീഡിയോയില് പ്രത്യക്ഷപ്പെടുന്നത്. മുഖമാകെ ബാന്ഡേജ് ചുറ്റിയും, ഷാരൂഖ് ഖാന് ധരിച്ച വസ്ത്രത്തിന് സമാനമായ വസ്ത്രങ്ങളുമാണ് ഇവര് ധരിച്ചത്. തുടര്ന്നാണ് ഷാരൂഖ് ഹുക്ക് സ്റ്റെപ്പുകള് ഇവര് അതേ രീതിയില് തന്നെ രുദ്ര പുനരാവിഷ്കരിച്ചു. മെട്രോയില് സഞ്ചരിച്ച് കൊണ്ടിരിക്കേയായിരുന്നു ഇവര് ഈ രംഗം ചിത്രീകരിച്ചത്. ഇതിനോടകം ലക്ഷകണക്കിന് കാഴ്ച്ചക്കാരാണ് ഈ വീഡിയോയ്ക്ക് ലഭിച്ചത്.
നിമിഷ നേരങ്ങള്ക്കുള്ളിലാണ് വീഡിയോ വൈറലായത്. വീഡിയോ ഷെയര് ചെയ്തതിനൊപ്പം ലേഡി ജവാന് എന്നും ഇവര് കുറിച്ചിട്ടുണ്ട്. ഈ യുവതിയുടെ ആത്മവിശ്വാസത്തെ സമ്മതിക്കുന്നു എന്നാണ് ഒരു യൂസര് കുറിച്ചത്. ധൈര്യവും, ആത്മവിശ്വാസവും ഇല്ലാതെ ഇത്തരം വീഡിയോകള് ചെയ്യാനാവില്ലെന്നും മറ്റൊരാള് കുറിച്ചു. യുവതി ഡാന്സ് ചെയ്യുന്നതിന് പിന്നിലായി നിരവധി ആളുകളെയും കാണാന് സാധിക്കുന്നുണ്ട്. ഇത്രയും ആളുകളുടെ ഇടയില് വെച്ചാണ് യുവതി ഡാന്സ് ചെയ്തത്. അതാണ് അഭിനന്ദനത്തിന് പ്രധാന കാരണമായത്.
