ന്യൂഡല്ഹി: പ്രതിപക്ഷ കക്ഷികള് ഭരിക്കുന്ന സംസ്ഥാനങ്ങളിലെ രാഷ്ട്രീയ നേതാക്കളെ ലക്ഷ്യമിട്ട് കേന്ദ്ര ഏജന്സികള്. തെലങ്കാന, ബംഗാള്, കര്ണാടക, തമിഴ്നാട് എന്നിവിടങ്ങളില് രാഷ്ട്രീയ നേതാക്കളുടെ വീടുകളിലും സ്ഥാപനങ്ങളിലും ഇ.ഡിയും ആദായ നികുതി വകുപ്പും റെയ്ഡ് നടത്തുകയാണ്.
തെലങ്കാനയില് ഹൈദരാബാദില് ഭരണകക്ഷിയായ ബിആര്എസിന്റെ കേന്ദ്രങ്ങളിലും പാര്ട്ടിയുമായി അടുത്ത ബന്ധം പുലര്ത്തുന്ന വ്യവസായികളുടെ വീടുകളിലുമായി 14 ഇടത്താണ് റെയ്ഡ്. നൂറിലേറെ ഉദ്യോഗസ്ഥര് റെയ്ഡില് പങ്കെടുക്കുന്നു. പ്രധാനമന്ത്രിയുടെ രണ്ട് ദിന സന്ദര്ശനത്തില് ബിആര്എസിനെതിരെ രൂക്ഷമായ വിമര്ശനം അഴിച്ചുവിട്ടിരുന്നു. ഇതിനു പിന്നാലെയാണ് റെയ്ഡ് നടക്കുന്നത്. നിയമസഭാ തിരഞ്ഞെടുപ്പ് അടുത്തിരിക്കുന്ന സംസ്ഥാനത്ത് തിരഞ്ഞെടുപ്പ് പ്രഖ്യാപനം ഏതു നിമിഷവും ഉണ്ടാകുമെന്നിരിക്കേയാണ് കേന്ദ്ര ഏജന്സികളുടെ പരിശോധന.
കര്ണാടകയിലെ ബംഗലൂരുവില് കോണ്ഗ്രസ് നേതാവ് ഷിവമോഗയിലെ മഞ്ചുനാഥ് ഗൗഡയുമായി ബന്ധപ്പെട്ട കേന്ദ്രങ്ങളില് ആദായ നികുതി വകുപ്പ് ആണ് പരിശോധന നടത്തുന്നത്. ആദായ നികുതി വെട്ടിപ്പ് ഇദ്ദേഹത്തിന്റെ സ്ഥാപനങ്ങളിലുണ്ടായി എന്നാണ് ആരോപണം.
പശ്ചിമ ബംഗാളില് തൃണമൂല് കോണ്ഗ്രസ് നേതാക്കളെ ലക്ഷ്യമിട്ടാണ് പരിശോധന. ഭക്ഷ്യമന്ത്രി രതിന് ഖോഷിന്റെ സ്ഥാപനങ്ങളിലും വസതിയിലും അദ്ദേഹവുമായി ബന്ധപ്പെട്ടവരുടെ സ്ഥാപനങ്ങളിലുമായി 13 ഇടത്താണ് പരിശോധന. മുന്സിപ്പല് നിയമന കോഴയുമായി ബന്ധപ്പെട്ടാണ് പരിശോധന. കേന്ദ്രസര്ക്കാരിനെതിരെ ഡല്ഹിയിലേക്ക് തൃണമൂല് കോണ്ഗ്രസ് പ്രക്ഷോഭം നയിക്കുന്ന പശ്ചാത്തലത്തിലാണ് റെയ്ഡുമെത്തുന്നത്. കഴിഞ്ഞ ദിവസം മുഖ്യമന്ത്രി മമത ബാനര്ജിയുടെ അനന്തരവനും പാര്ട്ടി ജനറല് സെക്രട്ടറിയുമായ അഭിഷേക് ബാനര്ജിയെ ഇ.ഡി ചോദ്യം ചെയ്യാന് പല തവണയായി നോട്ടീസ് നല്കിയിരുന്നു.
തമിഴ്നാട്ടിലെ ചെന്നൈയില് മുന്കേന്ദ്രമന്ത്രി എസ്. ജഗത്രക്ഷകന്റെ സ്ഥാപനങ്ങളിലാണ് പരിശോധന. ആദായ നികുതി ഉദ്യോഗസ്ഥര് ചെന്നൈ, പോണ്ടിച്ചേരി എന്നിവിങ്ങളിലെ 40 ഓളം കേന്ദ്രങ്ങളിലാണ് പരിശോധന നടത്തുന്നത്. നിരവധി മെഡിക്കല് കോളജുകളും ഹോട്ടല് ശൃംഖലയുമുള്ളയാളാണ് ജഗത്രക്ഷകന്. 2016ല് ആദായ നികുതിയും 2020ല് ഇഡിയും പരിശോധന നടത്തിയിരുന്നു. 80 കോടിയോളം രൂപയുടെ വിദേശ ഇടപാടുകള് മരവിപ്പിച്ചിരുന്നു.
