അമേരിക്കയിലുള്ള കാമുകിക്ക് അരികിലെത്താന് ഇന്ത്യാക്കാര്ക്ക് വിസാ പ്രശ്നങ്ങളില്ലാത്ത അയല് രാജ്യങ്ങള് വഴി അനധികൃതമായി അമേരിക്കയില് പ്രവേശിക്കുകയും പിടിക്കപ്പെട്ട് നാടുകടത്തപ്പെടുകയും ചെയ്യുന്ന നായകന്റെ കഥ പറഞ്ഞ ദുല്ഖര് സല്മാന് നായകനായ സിഐഎ കണ്ടിട്ടുണ്ടോ? സമാന സാഹചര്യങ്ങളുടെ പേരില് ഇന്ത്യാക്കാര്ക്ക് എതിരേ കടുത്ത നിലപാട് എടുക്കുകയാണ് സെന്ട്രല് അമേരിക്കന് രാജ്യമായ എല് സാല്വദോര്. ഇവിടേയ്ക്ക് വരുന്ന ഇന്ത്യാക്കാര്ക്കും ആഫ്രിക്കക്കാര്ക്കും 1000 ഡോളര് (ഏകദേശം 83,000 രൂപ) ഫീസ് ചുമത്തി.
മദ്ധ്യഅമേരിക്കന് രാജ്യങ്ങള് വഴി അമേരിക്കയിലേക്ക് അനധികൃത കുടിയേറ്റം തടയുന്നതിന്റെ ഭാഗമായിട്ടാണ് നടപടി. ഇന്ത്യ, 50 ലധികം ആഫ്രിക്കന് രാജ്യങ്ങള് എന്നിവിടങ്ങളില് നിന്നും വരുന്ന പാസ്പോര്ട്ടോടു കൂടിയ യാത്രക്കാര് ഈ ഫീസ് ഒടുക്കേണ്ടി വരും. ഈ തുക സ്വീകരിച്ച ശേഷമായിരിക്കും രാജ്യത്തെ ആദ്യ അന്താരാഷ്ട്ര വിമാനത്താവളത്തില് പോലും അനുവാദം നല്കുക. അടുത്തിടെ എല് സാല്വദോര് പ്രസിഡന്റ് നയിബ് ബുക്കലേ അമേരിക്കയുടെ വെസ്റ്റേണ് ഹാംഷയര് അഫയര് അസിസ്റ്റന്റ് സ്റ്റേറ്റ് സെക്രട്ടറി ബ്രയന് നിക്കോളാസുമായി നടത്തിയ കൂടിക്കാഴ്ചയില് വിവിധ വിഷയങ്ങള് ചര്ച്ച ചെയ്തതില് അനധികൃത കുടിയേറ്റങ്ങളും വിഷയമായിരുന്നു.
കണക്കുകള് പ്രകാരം 2023 ല് 3.2 ദശലക്ഷം കുടിയേറ്റ ശ്രമങ്ങളാണ് അമേരിക്കയുടെ കസ്റ്റംസും അതിര്ത്തി വിഭാഗവും ചേര്ന്ന് തകര്ത്തത്. ഇതില് ആഫ്രിക്കയില് നിന്നും മറ്റു മേഖലകളില് നിന്നും വരുന്ന അനേകരാണ് സെന്ട്രല് അമേരിക്കന് രാജ്യങ്ങള് വഴി അമേരിക്കയില് കടക്കാന് ശ്രമിച്ചത്. ഇതിന് പിന്നാലെയാണ് ഇന്ത്യയില് നിന്നും ആഫ്രിക്കന് രാജ്യങ്ങളില് നിന്നും വരുന്നവര്ക്ക് 1000 ഡോളര് ചുമത്തിയത്. ഈ ഫീസിനൊപ്പം വാറ്റ് കൂടി വരുമ്പോള് 1,130 ഡോളര് (ഏകദേശം ഒരുലക്ഷം രൂപ) ആകും ചെലവ്. ഒക്ടോബര് 23 മുതല് നിയമം നടപ്പാകുകയും ചെയ്തു. ഈ 57 ആഫ്രിക്കന് രാജ്യങ്ങള്, ഇന്ത്യ എന്നിവിടങ്ങളില് നിന്നും എത്ര യാത്രക്കാരുണ്ടെന്ന വിവരം എയര്ലൈന്സ് സാല്വദോരിയന് അധികൃതരെ അറിയിക്കണം.
കൊളംബിയന് എയര്ലൈനായ അവിയാന്കയാണ് എല്സാല്വദോറിലെ വിമാനത്താവളങ്ങള് ഉപയോഗിക്കുന്ന പ്രമുഖ കമ്പനി. ഇവര് യാത്രക്കാര്ക്ക് ഇക്കാര്യത്തില് അറിയിപ്പും നല്കണം. അതേസമയം യാത്രക്കാര്ക്ക് ഇത്തരം ഫീസ് വെച്ചിട്ടുള്ള ആദ്യ രാജ്യമല്ല എല്സാല്വദോര്. തായ്ലന്റ്, ബാഴ്സിലോണ, വലന്സിയ, പോര്ച്ചുഗല്, ബെല്ജിയം, വെനീസ്, ഓസ്ട്രേലിയ, ഭൂട്ടാന്, ഫ്രാന്സ് എന്നിവയെല്ലാം സഞ്ചാരികള്ക്കും ടൂറിസ്റ്റുകള്ക്കും പല തരം നികുതികളും കരങ്ങളും ഏര്പ്പെടുത്തിയിട്ടുണ്ട്. ട്രാഫിക് പ്രശ്നങ്ങള്, വീടുകളുടെ ലഭ്യത കുറയുന്നത്, ശബ്ദം, അന്തരീക്ഷ മലനീകരണം തുടങ്ങിയ പ്രശ്നങ്ങളിലാണ് ഈ രാജ്യങ്ങള് പ്രവേശനത്തിന് ഫീസ് വെച്ചത. അതേസമയം ഇത്തരം തിരിച്ചടികള് രാജ്യത്തിന്റെ ടൂറിസത്തെ കാര്യമായി ബാധിച്ചിട്ടുണ്ട്.
