തിരുവനന്തപുരം: കണ്ണൂരില് കരിങ്കൊടി കാണിച്ച യൂത്ത് കോണ്ഗ്രസ് പ്രവര്ത്തകരെ തല്ലിയ ഡി.െവെ.എഫ്.ഐ. പ്രവര്ത്തകരെ ന്യായീകരിച്ച മുഖ്യമന്ത്രിക്കെതിരേ നിയമനടപടിക്കൊരുങ്ങി കോണ്ഗ്രസ്. നവകേരളസദസ് നടത്തിപ്പിനു തദ്ദേശസ്ഥാപനങ്ങളുടെ തനതു ഫണ്ടില്നിന്ന് പണം അനുവദിക്കണമെന്ന സര്ക്കാര് ഉത്തരവ് നിയമവിരുദ്ധമാണെന്നും ഇതിനെതിരേ നിയമപരമായി നീങ്ങുമെന്നു പ്രതിപക്ഷനേതാവ് വി.ഡി. സതീശന് പത്രസമ്മേളനത്തില് പറഞ്ഞു.
മര്ദനസംഭവത്തില് മുഖ്യമന്ത്രിയുടെ ന്യായീകരണം കലാപാഹ്വാനമാണെന്നും ഒരു നിമിഷം കസേരയിലിരിക്കാന് മുഖ്യമന്ത്രി യോഗ്യനല്ലെന്നും പ്രതിപക്ഷ നേതാവ് പറഞ്ഞു. ക്രിമിനല് മനസുള്ള മുഖ്യമന്ത്രിയാണെന്നു പറഞ്ഞതില് എന്താണു തെറ്റ്? മുഖ്യമന്ത്രിയുടെ നടപടിയാണ് തെന്നക്കൊണ്ട് അത് പറയിച്ചത്. ഏതു ഭാഷയില് ഇങ്ങോട്ട് പറഞ്ഞാലും കുറച്ചുകൂടെ നല്ല ഭാഷയില്, പറ്റാവുന്നത്ര കട്ടിയുള്ള ഭാഷയില് തിരിച്ച് പറയും.
പറവൂര് നഗരസഭാ സെക്രട്ടറിയെ ഞാനല്ല, സര്ക്കാരാണ് ഭീഷണിപ്പെടുത്തിയത്. പഞ്ചായത്തുകളോടും നഗരസഭകളോടും കോര്പ്പറേഷനുകളോടും പണപ്പിരിവിന് തനത് ഫണ്ടില്നിന്ന് പണം കൊടുക്കാന് പറയാന് സംസ്ഥാന സര്ക്കാരിന് അധികാരമില്ല. നേരത്തെ സരസ് മേളയ്ക്കും പണം പിരിച്ചു. ചെയര്പേഴ്സണിന്റെ അംഗീകരമില്ലാതെ, കൗണ്സിലിന്റെ തീരുമാനത്തിന് വിരുദ്ധമായി പണം കൊടുക്കാന് പറവൂര് നഗരസഭാ സെക്രട്ടറിക്ക് അധികാരമില്ല. മന്ത്രിയുടെ ഓഫീസില്നിന്ന് ഉദ്യോഗസ്ഥര് ഭീഷണിപ്പെടുത്തിയെന്നു സെക്രട്ടറി തന്നോട് പറഞ്ഞു.
പ്രൊബേഷന് ക്ലിയര് ചെയ്യില്ലെന്ന് പറഞ്ഞായിരുന്നു ഭീഷണി. നവകേരളസദസുമായി ബന്ധപ്പെട്ട മുഴുവന് പണപ്പിരിവും ഭീഷണിപ്പെടുത്തിയാണ് നടത്തുന്നത്. നികുതി വെട്ടിപ്പ് തടയാന് ചുമതലപ്പെട്ട ഉദ്യോഗസ്ഥരെക്കൊണ്ട് സര്ക്കാര് പരിപാടിക്ക് പണപ്പിരിവ് നടത്തിയെന്നത് നിയമവിരുദ്ധമാണ്. റെയ്ഡ് നടത്തി ആളുകളെ പേടിപ്പിച്ചാണു പിരിവ്. നികുതിപ്പണത്തില്നിന്ന് പിരിച്ചിട്ട് നവകേരളസദസ് എന്നു പറഞ്ഞ് നടത്തുന്നത് രാഷ്ട്രീയ പ്രസംഗമാണ്. എല്ലാദിവസവും പ്രതിപക്ഷത്തെ വിമര്ശിക്കുകയാണ്. സര്ക്കാരിന്റെ കാര്യങ്ങളല്ല, രാഷ്ട്രീയ കാര്യങ്ങളാണ് പറയുന്നത്.
മന്ത്രിമാര് 44 ദിവസം ഓഫീസില് ഇല്ല. ഇക്കാലത്ത് ഇങ്ങനെ പത്ത് ദിവസം ഓഫീസില്നിന്ന് മാറി നില്ക്കാന് പറ്റുമോ? രാവിലത്തെ പ്രഭാതഭക്ഷണത്തിന് വിളിച്ചാല് പോകണം, കുറച്ച് പേര്ക്ക് സ്റ്റേജില് ഇരിക്കാം. ബാക്കിയുള്ള മന്ത്രിമാര്ക്ക് എന്താണു ജോലി. മ്യൂസിയത്തില് വയ്ക്കാന് പോകുന്ന ബസില് മുഖ്യമന്ത്രിക്കൊപ്പം യാത്ര ചെയ്യുക. ഒരു പുതിയ നടപടിയും സര്ക്കാര് സ്വീകരിക്കുന്നില്ല.- വി.ഡി. സതീശന് പറഞ്ഞു.
