ബാംഗ്ലൂര് ഡെയ്സ് ക്ലൈമാക്സില് ചിത്രീകരിച്ചിരിക്കുന്നത് യഥാര്ഥ സൂപ്പര് ക്രോസ് റേസിങ് മത്സരമാണെന്നും ദുല്ഖറായി എത്തിയത് റിയല് റേസറാണെന്നും അഞ്ജലി മേനോന് ഒരു അഭിമുഖത്തില് പറഞ്ഞു.
'സിനിമയുടെ ക്ലൈമാക്സില് വലിയൊരു റേസ് ഉണ്ട്. ആ സമയത്ത് അങ്ങനെയൊരു റേസ് ചിത്രീകരിക്കാനുള്ള ബജറ്റ് ഞങ്ങളുടെ കൈയില്ലായിരുന്നു. അപ്പോഴാണ് പൂണെയില് സൂപ്പര്ക്രോസ് ടൂര്ണമെന്റ് നടക്കുന്നുണ്ടെന്ന കാര്യം ഞങ്ങള് അറിഞ്ഞത്.
വൈകിട്ട് ഏഴ് മണി മുതല് പത്ത് മണി വരെയാണ് സൂപ്പര്ക്രോസ് റേസ് നടക്കുന്നത്. അന്നത്തെ നാഷണല് ചാംപ്യനായ അരവിന്ദ് കെ.പി.യെ ഞങ്ങള് കണ്ട് കാര്യങ്ങള് പറഞ്ഞു. ദുല്ഖര് സല്മാന് ചെയ്ത അജു എന്ന കഥാപാത്രമായി അരവിന്ദിനെയാണ് റേസില് ഷൂട്ട് ചെയ്യാന് തീരുമാനിക്കുന്നത്. അങ്ങനെ അവിടെയെത്തി റേസ് ചിത്രീകരിക്കാനുള്ള സജ്ജീകരണങ്ങള് നടത്തി.
നിര്ഭാഗ്യവശാല് ആദ്യ റേസില് അരവിന്ദ് പരാജയപ്പെട്ടു. ഞങ്ങള്ക്ക് ആകെ വിഷമമായി അദ്ദേഹം പരാജയപ്പെട്ടാല് ഇനി എന്തു ചെയ്യുമെന്ന് അറിയില്ല. ആകെ രണ്ട് റേസ് ആണ് അരവിന്ദിനുണ്ടായിരുന്നത്, ആദ്യ റേസും അവസാന റേസും. ലാസ്റ്റ് റേസ് ആണ് ഇനി ഷൂട്ട് ചെയ്യേണ്ടിയിരുന്നത്. കാമറ ക്രൂ അത് കൃത്യമായി പ്ലാന് ചെയ്തു.
അങ്ങനെ ഭാഗ്യവശാല് ഞങ്ങള് ചിത്രീകരിച്ച ആ ലാസ്റ്റ് റേസില് അരവിന്ദ് വിജയിച്ചു.
പിന്നീട് ആദ്യം തോല്ക്കുന്നതും പിന്നീട് ജയിക്കുന്നതുമായ രണ്ട് ഫൂട്ടേജും ഞങ്ങള് അത് ഒരുമിച്ച് എഡിറ്റ് ചെയ്തു. ആ ക്ലൈമാക്സില് കാണുന്നതെല്ലാം യഥാര്ഥ ഫൂട്ടേജാണ്. എന്നാല് ഒരു ഡ്രാമ സൃഷ്ടിക്കപ്പെടുമ്പോള് ഡ്രമാറ്റിക് നിമിഷളും ഉണ്ടാകണം. അത് ഞങ്ങളുടെ ആര്ട്ട് ടീം വളരെ മനോഹരമായി ചെയ്തു'-അഞ്ജലി
മേനോന് പറഞ്ഞു.
