ന്യൂഡല്ഹി: ഓസ്ട്രേലിയയെ നാലാം മത്സരത്തിലും കെട്ടു കെട്ടിച്ചതോടെ ഇന്ത്യന് ക്രിക്കറ്റ് ടീം കുറിച്ചത് ചരിത്രം. ടി 20 ക്രിക്കറ്റില് ഏറ്റവും കൂടുതല് വിജയം നേടിയ ടീം എന്ന റെക്കോഡാണ് ഇന്ത്യ നേടിയെടുത്തത്. ട്വന്റി20യുടെ ചരിത്രത്തില് ആദ്യ ലോകകപ്പ് നേടിയ ഇന്ത്യ ഓസ്ട്രേലിയയ്ക്കെതിരേ പരമ്പര വിജയം നേടാന് കുറിച്ചത് കരിയറിലെ 136 ാം വിജയമായിരുന്നു. റായ്പൂരില് 20 റണ്സിന്റെ വിജയമായിരുന്നു ഇന്ത്യ ഓസ്ട്രേലിയയ്ക്ക് മേല് നേടിയത്. ഇതോടെ അഞ്ചു മത്സരങ്ങളുടെ പരമ്പര 3-1 ന് മുന്നിലാകുകയും ചെയ്തു.
പാകിസ്താനെയാണ് ഇന്ത്യ ടി20 വിജയങ്ങളുടെ കാര്യത്തില് മറികടന്നത്. ആകെ 213 മത്സരങ്ങളില് 136 വിജയം നേടിയ ഇന്ത്യ 67 എണ്ണത്തില് തോല്ക്കുകയും ഒരെണ്ണം സമനിലയില് അവസാനിക്കുകയും ചെയ്തു. മൂന്ന് മത്സരങ്ങള് ഫലമില്ലാതെ പോയി. 226 മത്സരങ്ങള് കളിച്ച പാകിസ്താന്റെ 135 വിജയമെന്ന റെക്കോഡാണ് ഇന്ത്യ മറികടന്നത്. 63.84 ശതമാനം വിജയമാണ് ഇന്ത്യ ടി20യില് നേടിയത്. ഇന്ത്യയ്ക്കും പാകിസ്താനും പിന്നില് മൂന്നാം സ്ഥാനത്ത് ന്യൂസിലന്റാണ്. 200 കളികളില് 102 ജയം അവര്ക്കുണ്ട്. നാലാം സ്ഥാനത്താണ് ഏകദിന ലോകചാംപ്യന്മാരായ ഓസ്ട്രേലിയ. 181 മത്സരങ്ങളില് 95 ജയം മാത്രമാണുള്ളത്. ദക്ഷിണാഫ്രിക്ക 171 കളിയില് 95 ജയം നേടി.
ഓസ്ട്രേലിയയ്ക്ക് എതിരേ 20 റണ്സിന്റെ വിജയമാണ് ഇന്ത്യ നേടിയത്. ആദ്യം ബാറ്റ് ചെയ്ത ഇന്ത്യ 175 റണ്സ് നേടിയപ്പോള് ഓസീസ് 154 ന് ഇന്നിംഗ്സ് അവസാനിച്ചു. യശ്വസ്വി ജെയ്സ്വാള്, ഋതുരാജ് ഗെയ്ക്ക്വാദ്, റിങ്കുസിംഗ്, ജിതേഷ് ശര്മ്മ എന്നിവരുടെ ബാറ്റിംഗിലെ മികച്ച സംഭാവനയും 20 റണ്സിന് മൂന്ന് വിക്കറ്റ് വീഴ്ത്തിയ അക്സര് പട്ടേലിന്റെയും 17 ന് ഒരു വിക്കറ്റ് വീഴ്ത്തിയ രവി ബിഷ്ണോയിയുടേയും ബൗളിംഗ് മികവുമാണ് ഇന്ത്യയെ വിജയത്തിലേക്ക് നയിച്ചത്. ദീപക് ചഹറും രണ്ടു വിക്കറ്റുകള് വീഴ്ത്തിയിരുന്നു.
