വയലന്സിന്റെ അതിപ്രസരം ആരോപിക്കപ്പെട്ട രണ്ബീര് കപൂറിന്റെ 'അനിമല്' വന് ഹിറ്റായി മുന്നേറുകയാണ്. എന്നാല് പ്രേക്ഷകരില് ഒരു വിഭാഗത്തിന് ചിത്രത്തിന്റെ കഥാഗതിയില് മതിപ്പുളവാകുന്നില്ല. തീവ്രമായ അക്രമവും ധീരമായ ഉള്ളടക്കവും കാണിച്ച സിനിമ വ്യാപകമായി വിമര്ശനത്തിനും കാരണമായിട്ടുണ്ട്. ഇപ്പോള്, ക്രൈം ത്രില്ലറിനെ ചുറ്റിപ്പറ്റിയുള്ള ഈ വിവാദം പാര്ലമെന്റില് വരെ എത്തിയിരിക്കുകയാണ്.
ന്യൂഡല്ഹി: ബോളിവുഡ് സിനിമ ആനിമല് തീയറ്ററില് വന് ഹിറ്റായി മുന്നേറുമ്പോള് സിനിമയെ വിമര്ശിച്ച് ചത്തീസ് ഗഡില് നിന്നുള്ള വനിതാ എംപി പാര്ലമെന്റില്. സിനിമയില് വയലന്സ് ഏറെയാണെന്നും തന്റെ മകള് സിനിമ പകുതിക്ക് വെച്ച് കാഴ്ച നിര്ത്തി തീയറ്ററില് നിന്നും ഇറങ്ങിയോടിയെന്നും ഛത്തീസ്ഗഡില് നിന്നുള്ള എംപിയായ രഞ്ജീത് രഞ്ജനാണ് പാര്ലമെന്റില് വ്യക്തമാക്കിയിരിക്കുന്നത്.
''സിനിമ സമൂഹത്തിന്റെ കണ്ണാടിയാണ്. ഇക്കാലത്ത് വയലന്സ് ഏറെയുള്ള സിനിമകളാണ് വരുന്നത്. 'കബീര് സിങ്ങില്' തുടങ്ങി 'പുഷ്പ'യില് തുടങ്ങി ഇപ്പോള് ഒരു ചിത്രം 'ആനിമലി'ല് എത്തി നില്ക്കുകയാണ്. സിനിമ പകുതിയായപ്പോഴേക്കും മകള് കരഞ്ഞു. ഹാളില് നിന്ന് എഴുന്നേറ്റു പോയി.'' രഞ്ജന് പറഞ്ഞു. ഈ ചിത്രങ്ങളില് കാണിക്കുന്നത് പോലെ നെഗറ്റീവ് റോളുകള് അവതരിപ്പിക്കുന്നതിലെ ഈ അക്രമം ഇന്നത്തെ നമ്മുടെ 11, 12 ക്ലാസുകളിലെ കുട്ടികളില് സ്വാധീനം ചെലുത്തുന്നു, ഇത് വളരെ ചിന്തോദ്ദീപകമായ വിഷയമാണെന്നും അവര് കൂട്ടിച്ചേര്ത്തു.
ചിത്രത്തില് 'അര്ജന് വില്ലി' എന്ന ഗാനം ഉപയോഗിച്ചതിന് നിര്മ്മാതാക്കളെ അവര് ആക്ഷേപിക്കുകയും ചെയ്തു. സന്ദീപ് റെഡ്ഡി വംഗയുടെ സംവിധാനത്തില് എത്തിയ രണ്ബീര് കപൂര് ചിത്രം ബോക്സ് ഓഫീസില് സ്വപ്ന നേട്ടവുമായി കുതിക്കുകയാണ്. ആറ് ദിവസം കൊണ്ട് 500 കോടിയിലധികം കളക്ഷനാണ് സിനിമ നേടിയത്. രണ്ബീറിനെ കൂടാതെ, ബോബി ഡിയോള്, അനില് കപൂര്, രശ്മിക മന്ദാന, ട്രിപ്റ്റി ദിമ്രി എന്നിവരും ചിത്രത്തില് പ്രധാന കഥാപാത്രങ്ങളെ അവതരിപ്പിക്കുന്നു.
