ഭുവനേശ്വര്: ഒഡീഷയിലെ പുരി ജഗന്നാഥ് ക്ഷേത്രത്തിനുള്ളില് പ്രവേശിച്ചതിന് യൂ ട്യൂബര് കാമിയാ ജാനിക്കെതിരേ പ്രതിഷേധവുമായി ബിജെപി. ഇവരെ അറസ്റ്റ് ചെയ്യണമെന്ന് ആവശ്യപ്പെട്ട് ബിജെപി പരാതി നല്കുകയും ചെയ്തു.
ബീഫ് കഴിക്കലിനെ പ്രോത്സാഹിപ്പിക്കുന്നയാളാണ് കാമിയാ ജാനി എന്നാണ് ബിജെപിയുടെ ആക്ഷേപം. 12 ാം നൂറ്റാണ്ടിലെ പ്രശസ്തമായ പുരിയിലെ ശ്രീ ജഗന്നാഥ ക്ഷേത്രത്തില് പ്രവേശിക്കാന് കാമിയയ്ക്ക് ആരാണ് അനുവാദം നല്കിയതെന്ന ചോദിച്ച ബിജെപി കോടിക്കണക്കിന് ഹിന്ദുക്കളുടെ മതവികാരം വ്രണപ്പെടുത്തിയതിന് ഇവര്ക്കെതിരേ കേസെടുത്ത് അറസ്റ്റ് ചെയ്യണമെന്ന് ആവശ്യപ്പെട്ടിട്ടിരിക്കുകയാണ്.
ക്ഷേത്രത്തിന്റെ വികസനവുമായി ബന്ധപ്പെട്ട പൈതൃക ഇടനാഴിയായ പദ്ധതിയെക്കുറിച്ച് ബിസിനസുകാരനും രാഷ്ട്രീയക്കാരനുമായ വി.കെ. പാണ്ഡ്യനുമായി ക്ഷേത്ര പരിസരത്ത് നിന്നും സംസാരിക്കുന്നതിന്റെ വീഡിയോ ജാനി പുറത്തുവിട്ടിരുന്നു. ഇരുവരും ക്ഷേത്രത്തിലെ മഹാപ്രസാദവും കഴിച്ചുകൊണ്ടാണ് ചര്ച്ചകള് നടത്തുന്നത്. ഇതിന് പിന്നാലെയാണ് ബിജെപി പ്രതിഷേധവുമായി വന്നിരിക്കുന്നത്. ഒഡീഷയിലെ പ്രതിപക്ഷമാണ് ബിജെപി. ക്ഷേത്രത്തിനുള്ളില് ക്യാമറ ഉപയോഗിച്ചെന്നും ശ്രീജഗന്നാഥ ക്ഷേത്രത്തിനുള്ളില് ക്ഷേത്രം ഭരണസമിതി വീഡിയോ നിരോധിച്ചിട്ടുള്ളതാണെന്നും പറഞ്ഞാണ് ജാനിയുടെ ക്ഷേത്ര പ്രവേശനത്തെ ബിജെപി എതിര്ത്തിരിക്കുന്നത്.
''ബിജെഡി നേതാവ് വികെ പാണ്ഡ്യനും യൂട്യൂബര് കാമിയ ജാനിയും ചേര്ന്ന് പുരി ജഗന്നാഥ ക്ഷേത്രത്തിലെ 'മഹാപ്രസാദം' രുചിക്കുന്ന ഒരു വീഡിയോ ഉണ്ടാക്കിയതായി മനസ്സിലായി. നേരത്തെ കാമിയ ജാനി ബീഫ് കഴിക്കുന്ന വീഡിയോ പോസ്റ്റ് ചെയ്തിരുന്നു. ബീഫ് കഴിക്കുന്നവരെ ജഗന്നാഥ ക്ഷേത്രത്തിനുള്ളില് കര്ശനമായി അനുവദിക്കില്ല. ഒരു സമുദായത്തിന്റെ മതവികാരം വ്രണപ്പെടുത്തിയതിന് ഇവര്ക്കെതിരെ ഐപിസി 295 പ്രകാരം കേസെടുക്കണമെന്ന് ഞങ്ങള് ആവശ്യപ്പെട്ടിട്ടുണ്ട്. അവരെ അറസ്റ്റ് ചെയ്തില്ലെങ്കില് ഞങ്ങള് കോടതിയെ സമീപിക്കും.'' ബിജെപി ഒഡീഷാ യൂണിറ്റ് ജനറല് സെക്രട്ടറി ജതിന് മൊഹന്തി പറയുന്നു. തര്ക്കം രൂക്ഷമായപ്പോള് തന്റെ നിലപാടുമായി ജാനി എത്തി.
''ഒരു ഇന്ത്യക്കാരി എന്ന നിലയില്, ഇന്ത്യന് സംസ്കാരവും പൈതൃകവും ലോകത്തിലേക്ക് കൊണ്ടുപോകുക എന്നത് എന്റെ ദൗത്യമാണ്.. ഞാന് ഇന്ത്യയിലെ എല്ലാ ജ്യോതിര്ലിംഗങ്ങളും ചാര്ധാമുകളും സന്ദര്ശിക്കുന്നു. ഞാന് ജഗന്നാഥ ക്ഷേത്രം സന്ദര്ശിച്ചതിനെ ചോദ്യം ചെയ്തുകൊണ്ട് പത്രത്തില് വന്ന ഈ വിചിത്രമായ ലേഖനം കേട്ടാണ് ഉണര്ന്നത്. ആരും എന്നെ സമീപിച്ചു എന്നല്ല. ഇവിടെ ഞാന് ബീഫ് കഴിച്ചിട്ടില്ലെന്നും ഒരിക്കലും കഴിച്ചിട്ടില്ലെന്നും വ്യക്തമാക്കുകയാണ്. ജയ് ജഗന്നാഥ്.'' ജാനി തന്റെ ഇന്സ്റ്റാഗ്രാം സ്റ്റോറിയില് പറഞ്ഞു.
