തമിഴ് നടന് വിജയകാന്തിന്റെ അകാല വിയോഗത്തില് അനുശോചിച്ചുകൊണ്ട് കുറിപ്പ് പങ്കുവെച്ച് സംവിധായകന് ഷാജി കൈലാസ്. അേദ്ദഹത്തിന്റെ വിയോഗത്തോടെ ഒരു യഥാര്ഥ മനുഷ്യ സ്നേഹിയെയാണ് നഷ്ടപ്പെട്ടതെന്നും 'വാഞ്ചിനാഥന്' എന്ന തന്റെ സിനിമയില് അഭിനയിക്കുമ്പോള് അദ്ദേഹം തന്റെ ഏറ്റവും മിടുക്കനായ വിദ്യാര്ഥിയായിരുന്നുവെന്നും ഷാജി കൈലാസ് പറയുന്നു.
''ഒരു യഥാര്ഥ മനുഷ്യന്റെ വിയോഗം. വിജയകാന്ത് സര് വലിയ മനസ്സിന്റെ ഉടമയാണ്. സൂപ്പര് സ്റ്റാര് എന്നതിലുപരി അദ്ദേഹം സിനിമയിലെ ഒരു മിടുക്കനായ വിദ്യാര്ഥിയായിരുന്നു. വിജയകാന്ത് സാറിനൊപ്പം വാഞ്ചിനാഥന്റെ സെറ്റില് ഓരോ ദിവസവും ചിലവഴിക്കുന്നത് ശരിക്കും സന്തോഷകരമായിരുന്നു. അദ്ദേഹത്തിന്റെ ആതിഥ്യ മര്യാദയായിരുന്നു ഹൈലൈറ്റുകളില് ഒന്ന്. തമിഴ് സിനിമാ ഇന്ഡസ്ട്രിയിലെ നവാഗത സംവിധായകനായ എനിക്ക് അദ്ദേഹം ഡേറ്റ് നല്കുകയും സ്വന്തം കുടുംബാംഗമായി സ്വീകരിച്ച് ബഹുമാനിക്കുകയും ചെയ്തിട്ടുണ്ട്. അദ്ദേഹത്തിന്റെ കുടുംബത്തിന് എന്റെ ഹൃദയംഗമമായ അനുശോചനം. സര്വശക്തന് അദ്ദേഹത്തിന്റെ കുടുംബത്തിന് ഈ ദുഃഖം താങ്ങാനുള്ള ശക്തിയും അനുഗ്രഹങ്ങളും നല്കട്ടെ''. ഷാജി കൈലാസ് കുറിച്ചു.
ഷാജി കൈലാസ് സംവിധാനം ചെയ്ത തമിഴ് ആക്ഷന് ചിത്രമാണ് വഞ്ചിനാഥന്. ഇന്ത്യന് സ്വാതന്ത്ര്യ സമര സേനാനി വാഞ്ചിനാഥന്റെ പേരിലുള്ള തന്റെ തമിഴ് അരങ്ങേറ്റ ചിത്രത്തില് നടന് വിജയകാന്തിനെയാണ് ഷാജി കൈലാസ് നായകനാക്കിയത്. 2001 ജനുവരി 14-നാണ് ചിത്രം റിലീസ് ചെയ്തത്.
ഷാജി കൈലാസ് പങ്കുവച്ച ചിത്രങ്ങളില് വിജയകാന്തിനൊപ്പം നടന് ദിലീപിനെയും കാണാം. ആ സമയത്തായിരുന്നു വിജയകാന്തിന്റെ മറ്റൊരു ചിത്രമായ 'രാജ്യ'ത്തിന്റെയും ചിത്രീകരണം. മനോജ് കുമാര് സംവിധാനം ചെയ്ത ചിത്രത്തില് ദിലീപും പ്രധാന വേഷത്തില് എത്തിയിരുന്നു.
