തിരുവനന്തപുരം: മാതാപിതാക്കള്ക്കൊപ്പം ഉറങ്ങിക്കിടക്കവേ കാണാതായ രണ്ടുവയസുകാരിക്ക് ഡി.എന്.എ. ടെസ്റ്റിനുള്ള നടപടികള് പൂര്ത്തിയാക്കി പോലീസ്. കുട്ടിയുടെ രക്ഷിതാക്കളെ സംബന്ധിച്ചും സമഗ്ര അന്വേഷണം നടത്തും. കുട്ടിയുടെ അച്ഛന് അമര്ദീപിന്റെ ആധാര് കാര്ഡ് ലഭിച്ചതിനാല് ഇതിന്റെ ചുവടു പിടിച്ച് ഹൈദരാബാദില് അന്വേഷണം നടത്താന് ഒരു സംഘം തിരിച്ചിട്ടുണ്ട്.
മൊബൈല് ഫോണ് നമ്പര് കേന്ദ്രീകരിച്ചും അന്വേഷണം ആരംഭിച്ചിട്ടുണ്ട്. ഈ ഫോണിലേക്ക് വന്ന കോള് ഹിസ്റ്ററി പരിശോധിച്ചുവരികയാണ്. കോളുകള് ഹിന്ദിയിലും ആന്ധ്രപ്രദേശിലെ പ്രാദേശിക ഭാഷയിലും ആയതിനാല് പരിഭാഷകരെ ചുമതലപ്പെടുത്തിയാണ് കോളുകള് പരിശോധിക്കുന്നത്. ഡി.എന്.എ ടെസ്റ്റിനായി കുട്ടിയുടെയും അച്ഛനമ്മമാരുടെയും രക്തസാമ്പിള് കഴിഞ്ഞ ദിവസം ശേഖരിച്ചിരുന്നു.
കുട്ടിയുടെ പിതൃത്വം തെളിയിച്ചാല് മാത്രമേ അമര്ദീപിന് കുട്ടിയെ വിട്ടുനല്കൂ. എന്നാല് എത്രയും വേഗം കുട്ടിയെ വിട്ടുനല്കണമെന്നാവശ്യപ്പെട്ട് കുട്ടിയുടെ ബന്ധുക്കള് പോലീസ് സ്റ്റേഷനില് നിരന്തരം കയറിയിറങ്ങുന്നുണ്ട്. അമ്മയേയും രണ്ട് വയസുകാരിയേയും വഞ്ചിയൂരിലുള്ള സംരക്ഷണ കേന്ദ്രത്തിലേക്കും മൂന്ന് ആണ്കുട്ടികളെ ശിശുക്ഷേമ സമിതിയിലേക്കും മാറ്റിയിരിക്കുകയാണ്.
കുഞ്ഞിന്റെ മാതാപിതാക്കളുടെ ബാങ്ക് അക്കൗണ്ടുകളും മറ്റു രേഖകളും പോലീസ് ശേഖരിച്ചു. വ്യാഴാഴ്ച ബന്ധുക്കളുടെ മൊഴിയും രേഖപ്പെടുത്തി. ബാങ്ക് അക്കൗണ്ടുകളിലേക്ക് വലിയ തുകകള് വന്നിട്ടുണ്ടോ എന്നതാണ് പരിശോധിക്കുന്നത്. കുഞ്ഞിന്റെ മാതാപിതാക്കള് പല സംസ്ഥാനങ്ങളിലേക്കും വിമാനത്തില് സഞ്ചരിച്ചതിന്റെ വിവരങ്ങള് പോലീസിന് ലഭിച്ചിട്ടുണ്ട്.
തേന് ശേഖരിക്കാനും വില്ക്കാനുമാണ് പോകുന്നതെന്നാണ് ഇവരുടെ മൊഴി. കുഞ്ഞിനെ കാണാതായ ദിവസം ബന്ധുക്കള് ഹൈദരാബാദില്നിന്ന് വിമാനത്തിലെത്തിയതിനെക്കുറിച്ചും പോലീസ് അന്വേഷിക്കുന്നുണ്ട്. ആറ്റുകാല് പൊങ്കാല അടുത്തതിനാല് മാലപൊട്ടിക്കല് ലക്ഷ്യമിട്ട് പല സംഘങ്ങളും നഗരത്തില് എത്താറുണ്ട്. മുന്പ് വിമാനത്തിലെത്തി മോഷണം നടത്തി കടന്നിരുന്ന ''പറക്കും കള്ളനെ'' തലസ്ഥാനത്തു പിടികൂടിയിരുന്നു. അതിനാല് പഴുതടച്ച അന്വേഷണത്തിന് ശേഷം മാത്രമേ കേസ് അവസാനിപ്പിക്കൂ.
