തൃശൂര്: തൃശൂര് നഗരത്തിലെ ഏക്കര്കണക്കിനു ഭൂമി ക്രിസ്ത്യന്, നായര് മാനേജ്മെന്റുകളുടെ വിദ്യാഭ്യാസസ്ഥാപനങ്ങള്ക്ക് തീറു നല്കിയതായി ആക്ഷേപമുയരുന്നു. ഏക്കറിനു നൂറു രൂപ വച്ച് വയനാട്ടില് 5.5 ഹെക്ടര് ഭൂമി പള്ളിക്ക് നല്കിയ നടപടി ഹൈക്കോടതി റദ്ദാക്കിയതോടെയാണ് തൃശൂരിലെ ഭൂമിക്കൈമാറ്റം സംബന്ധിച്ച് പ്രചാരണം ശക്തമായത്. പ്രതിവര്ഷം 75 രൂപ പാട്ടത്തിനു നല്കിയിരുന്ന കോടികള് വിലവരുന്ന ഭൂമി വി.എസ്. അച്യുതാനന്ദന് മുഖ്യമന്ത്രിയായിരുന്ന ഘട്ടത്തില് തീറു നല്കുകയായിരുന്നു. തൃശൂര് സെന്റ് തോമസ് കോളജ്, സി.എം.എസ്. സ്കൂള്, പാറമേക്കാവ് കോളജ് എന്നിവ സ്ഥിതി ചെയ്യുന്ന സ്ഥലം ഇടതുസര്ക്കാര് തീറു നല്കിയെന്നാണ് പ്രചാരണം.
നേരത്തെ പുത്തന്പള്ളിയടക്കം സ്ഥിതി ചെയ്യുന്ന സ്ഥലം ദേവസ്വത്തിന്റേതാണെന്ന് പ്രചാരണം ഉണ്ടായിരുന്നു. ലോക്സഭാ തെരഞ്ഞെടുപ്പ് അടുത്തതോടെ വിവാദം ഉണ്ടാക്കേണ്ടതില്ല എന്നതിനാല് ദേവസ്വം ഭൂമിയെന്ന വാദമുയര്ത്തിയവര് മൗനം പാലിച്ചിരിക്കുകയായിരുന്നു. ഇതിനിടെയാണ് പുതിയൊരു വിവാദത്തിനു ഇടയാക്കിയേക്കാവുന്ന പ്രചാരണം നടക്കുന്നത്. യഥാര്ഥത്തില് സെന്റ് തോമസ് കോളജ്, പാറമേക്കാവ് കോളജ്, പുത്തന്പള്ളി, ലൂര്ദ് പള്ളി, കല്ദായ സുറിയാനി പള്ളി എന്നിവയുടെ സ്ഥലങ്ങള് ശക്തന് തമ്പുരാന്റെ രണ്ടാമത്തെ ഭാര്യ ചുമ്മുക്കുട്ടിയ്ക്ക് ശക്തന് തമ്പുരാന് നല്കിയതാണെന്നാണ് ചരിത്രം പറയുന്നത്.
തിരുവാതിരകളി കളി കണ്ട് ചുമ്മുക്കുട്ടിയെ ഇഷ്ടപ്പെട്ട് കൊട്ടാരത്തിലേക്ക് വിളിച്ചുവരുത്തി. കരിമ്പറ്റ തറവാട്ടുകാരിയായ ചുമ്മുക്കുട്ടിയ്ക്ക് കണ്ണുകൊണ്ടു കാണാവുന്ന സ്ഥലം എടുക്കാന് അനുവാദവും നല്കി. മാത്രമല്ല അവര്ക്ക് കുളിക്കാനായി പാറമേക്കാവ് കുളവും നിര്മിച്ചു. അവര്ക്കല്ലാതെ ആ കുളത്തില് കുളിക്കാന് അനുവാദവുമുണ്ടായിരുന്നില്ല. അന്നത്തെ കാലത്ത് പണ്ടാരംവക, ബ്രഹ്മസ്വം വക, ദേവസ്വം വക എന്നിങ്ങനെയായിരുന്നു ഭൂമിയുടെ ഉടമസ്ഥത. ഇതില് പണ്ടാരംവകയ്ക്ക് നികുതി ഉണ്ടായിരുന്നില്ല. ബ്രഹ്മസ്വം, ദേവസ്വം വക ഭൂമിക്ക് അക്കാലത്ത് കേവലം ഒരണ മാത്രമായിരുന്നു നികുതി. ചുമ്മുക്കുട്ടിയ്ക്ക് നല്കിയ ഭൂമി ദേവസ്വം വകയില്പ്പെട്ടതായിരുന്നു. ദേവസ്വം, ബ്രഹ്മസ്വം എന്ന തരംതിരിവുണ്ടായിരുന്നെങ്കിലും എല്ലാം രാജാവിന്റെ അധീനതയില് തന്നെയായിരുന്നു. ചുമ്മുക്കുട്ടിയ്ക്കു നല്കിയ ഭൂമിയില്നിന്നാണ് വിദ്യാലയവും ആരാധനാലയവും നിര്മിക്കാന് ഭൂമി നല്കിയത്.
സെന്റ് തോമസ് സ്കൂള് തുടങ്ങുമ്പോള് 99 കൊല്ലത്തെ പാട്ടത്തിനാണ് സ്ഥലം നല്കിയത്. എന്നാല് പണം ഈടാക്കിയതിനോ പുതുക്കിയതിനോ കൃത്യമായ രേഖകളില്ലെന്നാണ് തൃശൂരിന്റെ ചരിത്രം അറിയുന്നവര് പറയുന്നത്. അതേസമയം ക്യാപ്റ്റന് എ.എന്. മേനോന് നഗരസഭാ ചെയര്മാനായിരിക്കുമ്പോള് പാറമേക്കാവിനു പിന്നിലുള്ള 40 സെന്റ് റവന്യൂ ഭൂമി സൗജന്യമായി നല്കിയതായി രേഖകളുണ്ട്. പാറമേക്കാവിനും സെന്റ് മേരീസ് കോളജിനും 20 സെന്റ് വീതമാണ് നല്കിയത്. കൗണ്സിലത് അംഗീകരിക്കുകയും ചെയ്തു.
