മലയാള സിനിമയിലെ ശ്രദ്ധേയനായ സംവിധായകനാണ് ലാല് ജോസ്. ഒരു മറവത്തൂര് കനവില് തുടങ്ങി രണ്ടാം ഭാവവും മീശ മാധവനും ക്ലാസ്മേറ്റ്സുമടക്കം തീയേറ്ററിൽ വലിയ ആഘോഷം ഉണ്ടാക്കിയ ഹിറ്റ് സിനിമകളുടെ സ്രഷ്ടാവാണ് ലാല് ജോസ്. ഒരു മറവത്തൂർ കനവ്, ചാന്തുപൊട്ട്, അച്ഛനുറങ്ങാത്ത വീട്, അറബിക്കഥ, ഡയമണ്ട് നെക്ലേസ്, അയാളും ഞാനും തമ്മില്, ഇമ്മാനുവല്, വിക്രമാദിത്യൻ തുടങ്ങി ലാല് ജോസിന്റെ സംവിധാനത്തില് പിറന്ന എല്ലാ ചിത്രങ്ങള്ക്കും ഇന്നും ആരാധകര് ഏറെയാണ്, അതെല്ലാം റിപ്പീറ്റ് വാല്യുവോടെ പ്രേക്ഷകര് ആസ്വദിക്കുന്ന ചിത്രങ്ങളാണ്. അസിസ്റ്റന്റ് ഡയറക്ടറായി പ്രവർത്തിച്ചാണ് ലാല് ജോസ് പിന്നീട് സ്വതന്ത്ര്യ സംവിധായകനായി മലയാളത്തിന്റെ പ്രിയ സംവിധായകരിലൊരാളായി മാറി.
സംവിധാനത്തില് മാത്രമല്ല അഭിനയത്തിലും കൈ വെച്ചിട്ടുണ്ട് ലാല് ജോസ്. പക്ഷേ അതെല്ലാം ചെറിയ വേഷങ്ങളായിരുന്നു. എന്നാലിപ്പോള് ഒരു ഭാരത സർക്കാർ ഉത്പന്നം എന്ന സിനിമയില് മുഴുനീള വേഷം ചെയ്യാൻ ഒരുങ്ങുകയാണ് ലാല് ജോസ്.ലാല് ജോസ് ചിത്രങ്ങളിലൂടെ തന്നെ പ്രേക്ഷകർക്ക് സുപരിചിതനായ സുബീഷ് സുധി നായകനാകുന്ന ഒരു ഭാരത സർക്കാർ ഉത്പന്നം എന്ന ചിത്രത്തിലാല് ലാല് ജോസ് ഒരു മുഴുനീള വേഷം ചെയ്യുന്നത്.
ഇപ്പോഴിതാ ഒരു ഭാരത സർക്കാർ ഉത്പന്നം സിനിമയുടെ പ്രമോഷന് എത്തിയപ്പോള് രണ്ടാം ഭാവം സിനിമ പരാജയപ്പെട്ടപ്പോള് തനിക്കുണ്ടായ ആഘാതം എത്ര വലുതായിരുന്നുവെന്ന് പറയുകയാണ് ലാല് ജോസ്. മാതാപിതാക്കള് തനിക്കായി വേറെ ജോലി അന്വേഷിച്ച് തുടങ്ങിയിരുന്നുവെന്നും ലാല് ജോസ് പറയുന്നു.
‘‘രണ്ടാം ഭാവം പരാജയമായിരുന്നു. അതിനുശേഷം ഞാൻ വീട്ടില് തന്നെ ഇരിപ്പായി. ആ സമയങ്ങളില് മാതാപിതാക്കള് എനിക്കായി ദുബായില് ജോലി അന്വേഷിച്ച് തുടങ്ങിയിരുന്നു. കാരണം ഇനി സിനിമയൊന്നും ഉണ്ടാവില്ല. മാത്രമല്ല എനിക്ക് രണ്ട് പെണ്കുട്ടികളാണ് എന്നൊക്കെയുള്ള ചിന്തയായിരുന്നു അവർക്ക്. അങ്ങനെയിരിക്കെ ഒരു ദിവസം ദിലീപ് വീട്ടില് വന്നു....നീ ഇങ്ങനെ ഇരുന്നാല് ശരിയാവില്ല. ഇറങ്ങ് ഒരു കഥയുണ്ടാക്ക്. എനിക്ക് പറ്റിയൊരു സാധനം നോക്ക് എന്നൊക്കെ പറഞ്ഞു. ഏത് പടമാണോ ഞാൻ ചെയ്യുന്നത് അത് കഴിഞ്ഞാല് ഉടനെ തന്നെ നീ കൊണ്ടുവരുന്ന സിനിമ ചെയ്യാം എന്നൊക്കെ പറഞ്ഞു. ദിലീപിന്റെ ആ വാക്കിന്റെ പുറത്ത് അദ്ദേഹത്തിന് ചെയ്യാൻ പറ്റുന്ന കഥ അന്വേഷിച്ച് തുടങ്ങി. അങ്ങനെയാണ് മീശമാധവൻ സിനിമ സംഭവിക്കുന്നത്....ദിലീപുമായി ചേർന്നുള്ള എല്ലാ ഹിറ്റ് സിനിമകളും അങ്ങനെ വന്നിട്ടുള്ളതാണ്. നല്ല കഥയും കഥാപാത്രവും വന്നാല് ഇനിയും ദിലീപിനൊപ്പം സിനിമ സംഭവിച്ചേക്കാം. എനിക്ക് എപ്പോള് വേണമെങ്കിലും ചെന്ന് ഡേറ്റ് ചോദിക്കാൻ പറ്റുന്ന ഒരു നടനാണ് ദിലീപ് ഇപ്പോഴും...’’ ലാല് ജോസ് പറയുന്നു. സിനിമയുടെ പ്രമോഷനുമായി ബന്ധപ്പെട്ട് അഭിമുഖങ്ങളില് സജീവമായി ലാല് ജോസുമുണ്ട്.
ഒരു ഭാരത സർക്കാർ ഉത്പന്നം എന്ന ചിത്രം ടി.വി രഞ്ജിത്താണ് സംവിധാനം ചെയ്യുന്നത്. ഭവാനി പ്രൊഡക്ഷൻസിന്റെ ബാനറില് രഞ്ജിത് ജഗന്നാഥൻ, ടി.വി കൃഷ്ണൻ തുരുത്തി, രഘുനാഥൻ കെ.സി എന്നിവർ ചേർന്നാണ് സിനിമ നിർമ്മിക്കുന്നത്. സോഷ്യോ പൊളിറ്റിക്കല് സറ്റയർ വിഭാഗത്തില് പെടുന്ന ചിത്രമാണ് ഇത്. തിരക്കഥ ഒരുക്കിയിരിക്കുന്നത് നിസാം റാവുത്തറാണ്. മിന്നല് മുരളിയിലൂടെ ശ്രദ്ധേയയായ ഷെല്ലിയാണ് നായിക. അജു വർഗീസ്, ഗൗരി.ജി.കിഷൻ, ദർശന.എസ്.നായർ, ജാഫര് ഇടുക്കി, വിനീത് വാസുദേവൻ, ഗോകുലൻ തുടങ്ങിയവരാണ് മറ്റ് അഭിനേതാക്കള്. ചിത്രം അടുത്തമാസം തീയറ്ററുകളില് എത്തും.
