കല്പ്പറ്റ: വയനാട് വെറ്ററിനറി സര്വകലാശാലയിലെ രണ്ടാംവര്ഷം ബി.വി.എസ്സി. വിദ്യാര്ഥി ജെ.എസ്. സിദ്ധാര്ഥി(20)ന്റെ ദുരൂഹമരണക്കേസില് ആറുപേര് അറസ്റ്റില്. സിദ്ധാര്ഥിന്റെ മരണം ആള്ക്കൂട്ടവിചാരണയേത്തുടര്ന്നെന്നു പോലീസ്. സംഭവം നടന്ന് 11-ാം ദിവസമാണ് ആദ്യ അറസ്റ്റ്. എസ്.എഫ്.ഐ. നേതാക്കള് ഉള്പ്പടെ കേസില് ഇരുപതോളം പ്രതികളുണ്ടെന്നു പോലീസ് അറിയിച്ചു.
ഡിെവെ.എസ്.പി: ടി.എന്. സജീവന്റെ നേതൃത്വത്തിലാണ് അന്വേഷണം. കോളജ് ഹോസ്റ്റലില് ''എസ്.എഫ്.ഐ. കോടതി'' യുടെ പരസ്യവിചാരണകളും ശിക്ഷ നടപ്പാക്കലും പതിവാണെന്ന് ഡിെവെ.എസ്.പി. പറഞ്ഞു. സംഭവശേഷം ഒളിവില്പ്പോയ തിരുവനന്തപുരം പാലക്കണ്ടിയില് വീട്ടില് രെഹാന് ബിനോയ് (20), കൊഞ്ചിറവിള വിജയമ്മ നിവാസില് എസ്.ഡി ആകാശ് (22), നന്ദിയോട് ശ്രീനിലയം വീട്ടില് ആര്.ഡി ശ്രീഹരി(23), ഇടുക്കി രാമക്കല് മേട് പഴയടത്ത് വീട്ടില് എസ്. അഭിഷേക് (23), തൊടുപുഴ മുതലക്കോടം തുറക്കല് പുത്തന്പുരയില് വീട്ടില് ഡോണ്സ് ഡായ് (23), വയനാട് ബത്തേരി ചുങ്കം തെന്നിക്കോട് വീട്ടില് ബില്ഗേറ്റ്സ് ജോഷ്വ (23) എന്നിവരാണ് അറസ്റ്റിലായത്.
മറ്റ് പ്രതികള്ക്കായി തെരച്ചില് തുടരുന്നു. അറസ്റ്റിലായവര്ക്കെതിരേ ഐ.പി.സി. 306, 323, 324, 341, 342 (അന്യായമായി തടഞ്ഞുവയ്ക്കല്, ആത്മഹത്യാപ്രേരണ, റാഗിങ്, സംഘം ചേര്ന്ന് മര്ദനം) എന്നീ വകുപ്പുകള്പ്രകാരമാണു കേസ്. കോളജില് വാലെന്റെന്സ് ദിനാഘോഷത്തോടനുബന്ധിച്ച് വിദ്യാര്ഥികള് തമ്മില് ചില പ്രശ്നങ്ങളുണ്ടായെന്നും സീനിയര് വിദ്യാര്ഥികള് സിദ്ധാര്ഥിനെ മര്ദിച്ച് കെട്ടിത്തൂക്കിയെന്നുമാണു കുടുംബത്തിന്റെ ആരോപണം. കോളജ് അധികൃതരല്ല, ഒരു സഹപാഠിയാണു മരണവിവരം കുടുംബത്തെ അറിയിച്ചത്.
കോളജ് അധികൃതരുടെ ഭീഷണി മൂലമാണു വിദ്യാര്ഥികള് സത്യം പുറത്തുപറയാത്തതെന്നും എസ്.എഫ്.ഐ. യൂണിറ്റ് സെക്രട്ടറി അമല് ഇസ്ഹാന്, കോളജ് യൂണിയന് ചെയര്മാന് കെ. അരുണ്, യൂണിയന് അംഗം ആസിഫ് ഖാന് എന്നിവരുള്പ്പെടെയുള്ള പ്രതികളെ പോലീസുമായി ചേര്ന്ന് സംരക്ഷിക്കുകയാണെന്നും സിദ്ധാര്ഥിന്റെ മാതാപിതാക്കളായ ടി. ജയപ്രകാശും എം.ആര്. ഷീബയും ആരോപിച്ചു.
കഴിഞ്ഞ 18-നാണ് തിരുവനന്തപുരം, നെടുമങ്ങാട് സ്വദേശി സിദ്ധാര്ഥിനെ ഹോസ്റ്റല് ഡോര്മെറ്ററിയിലെ ശൗചാലയത്തില് തൂങ്ങിമരിച്ചനിലയില് കണ്ടെത്തിയത്. ആത്മഹത്യയെന്നായിരുന്നു പ്രാഥമികനിഗമനം. എന്നാല്, മരണത്തിനു മുമ്പ് സിദ്ധാര്ഥ് ക്രൂരമര്ദനത്തിനിരയായിരുന്നെന്ന പോലീസ് സര്ജന്റെ റിപ്പോര്ട്ട് കേസില് വഴിത്തിരിവായി. കുറ്റക്കാരെ പോലീസ് സംരക്ഷിക്കുകയാണെന്നാരോപിച്ച് യൂത്ത് കോണ്ഗ്രസ് വൈത്തിരി പോലീസ് സ്റ്റേഷനിലേക്കു പ്രതിഷേധപ്രകടനം നടത്തി.
