അഭിനേതാവായും നിര്മ്മതാവായും സംവിധായകനായുമൊക്കെ മലയാള സിനിമാപ്രേക്ഷകരുടെ മനസ്സില് മാത്രമല്ല ഇന്ത്യയൊട്ടാകെ അറിയപ്പെടുന്ന താരമായി മാറിയിരിക്കുകയാണ് പൃഥ്വിരാജ് സുകുമാരന്. ഇരുത്തം വന്ന അഭിനയവും വിനയം നിറഞ്ഞ പെരുമാറ്റവും പക്വവും അര്ത്ഥവത്തായ സംസാരരീതിയുമൊക്കെ അഭിനേതാവെന്നതിലുപരി താരത്തെ ആരാധകരുടെ മനസ്സിലെ പ്രിയ താരമാക്കാറുണ്ട്. അഭിനേതാവായും സംവിധായകനായും തന്റെ കഴിവും പ്രാഗല്ഭ്യവും ഓരോ സിനിമയിലൂടെയും താരം പ്രകടിപ്പിക്കാറുണ്ട്. ഒരു കഥാപാത്രത്തിന് വേണ്ടുന്ന രീതിയില് ശരീരവും സംസാരശൈലിയുമൊക്കെ മാറ്റാനുള്ള താരത്തിന്റെ കഴിവ് എപ്പോഴും വാര്ത്തകളില് നിറയാറുണ്ട്. സുകുമാരന്റെ മക്കള് അഭിനയത്തില് മാത്രമല്ല സഹപ്രവര്ത്തകരോടുള്ള ഇടപെടലിലും എന്നും കൈയടി നേടാറുണ്ട്.
കഴിഞ്ഞ ദിവസം അഭിനയ ജീവിതത്തിൽ അൻപതു വർഷം പൂർത്തിയാക്കുന്ന നടി മല്ലിക സുകുമാരനെ ആദരിക്കുന്ന ചടങ്ങിൽ ഏവരുടെയും മനസ്സ് കീഴടക്കിയത് മക്കളായ ഇന്ദ്രജിത്ത് സുകുമാരനും പൃഥ്വിരാജ് സുകുമാരനുമായിരുന്നു. ഇപ്പോഴിതാ ആ ചടങ്ങില് വച്ച് ഇന്ദ്രന്സിനെ കണ്ടപ്പോഴുണ്ടായ പൃഥ്വിരാജിന്റെ പ്രതികരണവും സന്തോഷവും ഇടപെടലും ബഹുമാനവുമൊക്കെയാണ് സോഷ്യല് മീഡിയ ഏറ്റെടുക്കുന്നത്.
വേദിയിലേക്ക് അമ്മയെ കൈപിടിച്ചു കയറ്റുന്ന ഇന്ദ്രജിത്തിനെയും പൃഥ്വിരാജിനെയും വീഡിയോയില് കാണാം. അതു കഴിഞ്ഞ് തിരിഞ്ഞു നോക്കുമ്പോഴാണ് ഒരു വശത്ത് മാറി നില്ക്കുന്ന ഇന്ദ്രന്സിനെ കാണുന്ന പൃഥ്വിരാജ് കെട്ടിപ്പിടിക്കുകയും മുന്നിലേക്ക് കയറി നില്ക്കാന് പറയുന്നതും വീഡിയോയില് കാണാം. ഇന്ദ്രജിത്തും ഇന്ദ്രന്സിനെ കാണുമ്പോള് സന്തോഷത്തോടെ സംസാരിക്കുന്നതും വീഡിയോയിലുണ്ട്. ‘‘ഇതാണ് പൃഥ്വിരാജ് ...പൃഥ്വിരാജ് ഇങ്ങനെ ആണ്...’’ എന്ന ക്യാപ്ഷന് നല്കിയാണ് ഫോട്ടോഗ്രാഫര് ശ്യാംകുമാര് വീഡിയോ ഇന്സ്റ്റഗ്രാമിലൂടെ പങ്കിട്ടത്. പൃഥ്വിരാജിന്റെ വിനയവും സഹപ്രവര്ത്തകര്ക്ക് കൊടുക്കുന്ന ബഹുമാനവും ഏറ്റെടുക്കുകയാണ് ആരാധകര്.
ചടങ്ങില് വച്ച് അമ്മയെക്കുറിച്ച് പൃഥ്വിരാജ് പറഞ്ഞ വാക്കുകള് ആരാധകര് ഏറ്റെടുത്തതായിരുന്നു. അച്ഛൻ മരിച്ച ശേഷം അച്ഛനുമായി ആംബുലൻസിൽ പോയ നിമിഷങ്ങൾ പങ്കുവച്ചപ്പോൾ തൊണ്ടയിടറുന്ന പൃഥ്വിരാജിനെ കണ്ട് മല്ലിക സുകുമാരന്റെയും ഇന്ദ്രജിത്തിന്റെയും കണ്ണുകൾ നിറഞ്ഞിരുന്നു. അമ്മയ്ക്കൊപ്പം അഭിനയിക്കുകയും അമ്മ അഭിനയിച്ച സിനിമ നിര്മിക്കുകയും സംവിധാനം ചെയ്യുകയും ചെയ്ത അപൂർവത തനിക്ക് മാത്രം സ്വന്തമാണെന്ന് പൃഥ്വിരാജ് പറഞ്ഞു. അച്ഛന് മരിച്ചപ്പോൾ അമ്മ ഇനി എന്ത് ചെയ്യും എന്നോർത്താണ് സങ്കടപ്പെട്ടതെന്നും എന്നാൽ അമ്മ എന്തു ചെയ്തു എന്നതിനുത്തരമാണ് ഇന്നിവിടെ നിൽക്കുന്ന താനും ഇന്ദ്രജിത്തും എന്ന് പൃഥ്വിരാജ് പറഞ്ഞു.
