ന്യൂഡല്ഹി : ലോക്സഭാ തെരഞ്ഞെടുപ്പ് തൊട്ടടുത്ത് നില്ക്കെ ബിജെപിയുടെ ലോക്സഭാംഗമായ ക്രിക്കറ്റ്താരം ഗൗതംഗംഭീര് സജീവ രാഷ്ട്രീയത്തില് നിന്നും വിരമിക്കല് പ്രഖ്യാപിച്ചു. തന്നെ രാഷ്ട്രീയ ചുമതലകളില് നിന്ന് ഒഴിവാക്കണമെന്ന് ആവശ്യപ്പെട്ട്് ഗൗതം ഗംഭീര് ബിജെപി നേതൃത്വത്തിന് കത്ത് നല്കിയതായിട്ടാണ് വിവരം. ക്രിക്കറ്റിന്റെ പ്രതിബദ്ധതകളില് ശ്രദ്ധ കേന്ദ്രീകരിക്കുന്നതിനാണ് പിന്മാറ്റമെന്നാണ് സൂചന.
ഈസ്റ്റ് ഡല്ഹിയെ പ്രതിനിധീകരിച്ച് കഴിഞ്ഞ തെരഞ്ഞെടുപ്പില് ജയിച്ച് പാര്ലമെന്റില് എത്തിയ ഗംഭീറിന്റെ രാഷ്ട്രീയക്കാരന് എന്ന നിലയിലുള്ള പ്രവര്ത്തനം പാര്ട്ടിക്കുള്ളില് തന്നെ വലിയ വിമര്ശനം ഉയര്ന്നിരുന്നു. ഇതിന് പിന്നാലെയാണ് അടുത്ത തെരഞ്ഞെടുപ്പ് വരുമ്പോള് താരം തന്റെ നേതാക്കള്ക്ക് രാഷ്ട്രീയത്തില് നിന്നും ഒഴിവാക്കാന് ആവശ്യപ്പെട്ട് കത്ത് നല്കിയിരിക്കുന്നതും.
തന്റെ അനുയായികളോടും വാര്ത്ത പങ്കിടാന് അദ്ദേഹം ട്വിറ്ററിലൂടെ ആവശ്യപ്പെട്ടു. രാഷ്ട്രീയത്തില് പ്രവേശിക്കുന്നതിന് മുമ്പ് താന് ആവേശത്തോടെ കളിച്ച കായികരംഗത്തേക്ക് ശ്രദ്ധ തിരിച്ചുവിടേണ്ടതിന്റെ ആവശ്യകത അദ്ദേഹം കത്തില് ചൂണ്ടിക്കാട്ടിയിട്ടുണ്ട്. തന്റെ ക്രിക്കറ്റ് പ്രതിബദ്ധതകളില് ശ്രദ്ധ കേന്ദ്രീകരിക്കാനുള്ള ആഗ്രഹം അദ്ദേഹം പ്രകടിപ്പിച്ചു.
''എന്റെ രാഷ്ട്രീയ ചുമതലകളില് നിന്ന് എന്നെ ഒഴിവാക്കണമെന്ന് ബഹുമാനപ്പെട്ട പാര്ട്ടി പ്രസിഡന്റ് ജെ.പി നദ്ദ ജിയോട് ഞാന് അഭ്യര്ത്ഥിച്ചു, അതിലൂടെ എനിക്ക് എന്റെ വരാനിരിക്കുന്ന ക്രിക്കറ്റ് പ്രതിബദ്ധതകളില് ശ്രദ്ധ കേന്ദ്രീകരിക്കാന് കഴിയും. ജനങ്ങളെ സേവിക്കാന് എനിക്ക് അവസരം നല്കിയതിന് ബഹുമാനപ്പെട്ട പ്രധാനമന്ത്രി നരേന്ദ്ര മോദിയോട് ഞാന് ആത്മാര്ത്ഥമായി നന്ദി പറയുന്നു. ജയ്. ഹിന്ദ്,''ഗംഭീര് എഴുതി.
2019 മാര്ച്ചില് ബിജെപിയില് ചേര്ന്ന ഗംഭീര്, അതിനുശേഷം ഡല്ഹിയില് പാര്ട്ടിയുടെ ഒരു പ്രമുഖ മുഖമായി മാറി. 2019 ലോക്സഭാ തെരഞ്ഞെടുപ്പില് 6,95,109 വോട്ടിന്റെ ഗണ്യമായ ഭൂരിപക്ഷത്തില് അദ്ദേഹം ഈസ്റ്റ് ഡല്ഹി സീറ്റില് മത്സരിക്കുകയും വിജയിക്കുകയും ചെയ്തു. വരാനിരിക്കുന്ന 2024 തെരഞ്ഞെടുപ്പില് ഗംഭീറിന് ടിക്കറ്റ് ലഭിച്ചേക്കില്ല എന്ന റിപ്പോര്ട്ടുകള്ക്കിടയിലാണ് രാഷ്ട്രീയം വിടാനുള്ള തീരുമാനം.
