അമ്പലപ്പുഴ: കൃത്രിമ കൈയുമായി ആശുപത്രിക്കിടക്കയില്നിന്ന് പോയി പരീക്ഷയെഴുതിയ പാര്വതിക്കു സിവില് സര്വീസ് പരീക്ഷയില് മിന്നുംവിജയം. അമ്പലപ്പുഴ ക്ഷേത്രത്തിനു പടിഞ്ഞാറ് അമ്പാടിയില് ഗോപകുമാര്ശ്രീലത എസ്. നായര് ദമ്പതികളുടെ മകള് പാര്വതി ഗോപകുമാറിനാണ് സിവില് സര്വീസ് പരീക്ഷയില് 282-ാം റാങ്ക് ലഭിച്ചത്.
വൈറല് പനി ബാധിച്ച് തിരുവനന്തപുരത്ത് ആശുപത്രിയില് മൂന്ന് ദിവസം ഐ.സി.യുവിലടക്കം 10 ദിവസം ചികിത്സയിലായിരുന്നു പാര്വതി. മാസങ്ങള് നീണ്ട പഠനം പാഴാകുമെന്ന ആശങ്കയായിരുന്നു. ഒടുവില് പനി ഭേദമായതോടെ ആശുപത്രിയില്നിന്ന് നേരേ പരീക്ഷാ ഹാളിലേക്ക്. ഇന്നലെ ഫലം പ്രഖ്യാപിച്ചപ്പോള് തിളക്കമാര്ന്ന നേട്ടം കൈവരിച്ചതിന്റെ ആഹ്ളാദത്തിലാണ് ഈ കുടുംബം.
2010 ല് പിതാവുമായി ബൈക്കില് പോകുമ്പോള് അപകടമുണ്ടായതിനെത്തുടര്ന്ന് വലതു കൈയുടെ മുട്ടിന് താഴെ മുറിച്ചു മുറിച്ചു മാറ്റേണ്ടി വന്നു. ഇപ്പോള് കൃത്രിമക്കൈയാണുള്ളത്. ഇടത് കൈ കൊണ്ടാണ് ഇപ്പോള് എഴുതുന്നത്. ഒന്നുമുതല് അഞ്ച് വരെ കാക്കാഴം സ്കൂളിലും ആറ് മുതല് 10 വരെ ചെന്നിത്തല നവോദയാ സ്കൂളിലുമായിരുന്നു പഠനം. പ്ലസ് ടു വിദ്യാഭ്യാസം അമ്പലപ്പുഴ ഗവ. മോഡല് ഹയര് സെക്കന്ഡറി സ്കൂളിലുമായിരുന്നു.
എല്എല്.ബി. പൂര്ത്തിയാക്കി എന്റോള് കഴിഞ്ഞ പാര്വതി ഇംഗ്ളീഷില് നിരവധി ലേഖനങ്ങളുമെഴുതിയിട്ടുണ്ട്. വീട്ടില് ഏതാണ്ട് 2000 പുസ്തകങ്ങളുടെ ശേഖരമുള്ള പാര്വതിക്ക് ഏറ്റവും ഇഷ്ടപ്പെട്ട കഥാകാരന് വൈക്കം മുഹമ്മദ് ബഷീറാണ്. പിതാവ് ഗോപകുമാര് ആലപ്പുഴ കലക്ടറേറ്റിലെ ഡെപ്യൂട്ടി കലക്ടറും മാതാവ് ശ്രീകല കാക്കാഴം ഗവ. ഹയര് സെക്കന്ഡറി സ്കൂള് അധ്യാപികയുമാണ്. സഹോദരി രേവതി.
വടകര: സെറിബ്രല് പാള്സിയെ അതിജീവിച്ച് ഇന്ത്യന് സിവില് സര്വീസിലെത്തുന്ന ആദ്യത്തെ വ്യക്തിയായി വടകര കീഴരിയൂര് സ്വദേശിനി എ.കെ. ശാരിക. ജന്മനാ സെറിബ്രല് പാള്സി രോഗ ബാധിതയായ ശാരിക വീല്ചെയറില് ഇരുന്നാണ് ഈ സ്വപ്ന നേട്ടം സ്വന്തമാക്കിയത്.
ഭിന്നശേഷിക്കാരായ വിദ്യാര്ഥികള്ക്ക് സൗജന്യ സിവില് സര്വീസ് പരിശീലനം നല്കാന് അബ്സൊല്യൂട്ട് ഐ.എ.എസ്.അക്കാദമിയുടെ സ്ഥാപകനായ ഡോ. ജോബിന് എസ്. കൊട്ടാരം ആരംഭിച്ച 'പ്രൊജക്ട് ചിത്രശലഭം' എന്ന പരിശീലന പദ്ധതിയിലേക്ക് തെരഞ്ഞെടുക്കപ്പെട്ടതാണ് ശാരികയുടെ ജീവിതത്തില് വഴിത്തിരിവായത്. കഴിഞ്ഞ വര്ഷം വീല്ചെയറില് നിന്നും സിവില് സര്വീസ് ലഭിച്ച ഷെറിന് ഷഹാനയും അബ്സൊല്യൂട്ട് അക്കാദമിയുടെ 'ചിത്ര ശലഭം 'പദ്ധതിയുടെ ഭാഗമായിരുന്നു.
ശാരികയ്ക്ക് ഇടത് കൈയുടെ മൂന്ന് വിരലുകള് മാത്രമേ ചലിപ്പിക്കാന് കഴിയുകയുള്ളു. കീഴരിയൂര് എരേമ്മന് കണ്ടി ശശിയുടേയും രാഖിയുടേയും മകളാണ്. പ്ലസ് ടു വിദ്യാര്ത്ഥിനിയായ ദേവിക സഹോദരിയാണ്. 2024ലെ സിവില് സര്വീസ് മെയിന്സ് പരീക്ഷ പാസായി. തുടര്ന്ന് ജനുവരി 30ന് ഡല്ഹിയില് നടന്ന ഇന്റര്വ്യൂവില് മികവ് തെളിയിച്ചു. ഓണ്ലൈന് ആയും, തിരുവനന്തപുരത്ത് നേരിട്ടുമായിരുന്നു പരിശീലനം.
