വടകര: കെ.കെ.ശൈലജയെ സോഷ്യല് മീഡിയ വഴി അപകീര്ത്തിപ്പെടുത്തിയ കേസില് പ്രതിപ്പട്ടികയിലെ ആളുകളുടെ എണ്ണം കൂടുന്നു. സംഭവത്തില് ന്യൂമാഹി പഞ്ചായത്ത് അംഗമായ വ്യക്തിക്കെതിരേ പോലീസ് കേസെടുത്തതിന് പിന്നാലെ കൂടുതല് പേരെ പൊലീസ് പ്രതിചേര്ത്തു. പ്രകോപനവും ലഹളയും ഉണ്ടാക്കുന്ന തരത്തില് വീഡിയോയും ചിത്രങ്ങളും എഡിറ്റ് ചെയ്ത് സോഷ്യല് മീഡിയ വഴി പ്രചരിപ്പിച്ചതിനാണ് കേസ്. നേരത്തേ കെകെ ശൈലജ തെരഞ്ഞെടുപ്പ് കമ്മീഷന് നല്കിയ പരാതിയിലാണ് പോലീസ് നടപടി.
നേരത്തെ മുസ്ലിം ലീഗ് ന്യൂമാഹി പഞ്ചായത്ത് സെക്രട്ടറിയും ന്യൂമാഹി പഞ്ചായത്ത് അംഗവുമായ ടിഎച്ച് അസ്ലമിനെതിരെ സംഭവത്തില് പൊലീസ് കേസെടുത്തിരുന്നു. ഇതിന് പിന്നാലെ ഇപ്പോള് സല്മാന് വാളൂര് എന്നയാള്ക്കും എതിരേ പേരാമ്പ്ര പോലീസ് കേസെടുത്തിട്ടുണ്ട്. കഴിഞ്ഞ ദിവസം സമൂഹമാധ്യമങ്ങളില് നടക്കുന്ന അധിക്ഷേപം നിറഞ്ഞതും അപകീര്ത്തികരവുമായ ആക്രമണത്തിനെതിരെ വാര്ത്താസമ്മേളനത്തില് ശൈലജ പ്രതികരിച്ചിരുന്നു. അതിന് പിന്നാലെ പൊലീസിലും തെരഞ്ഞെടുപ്പ് കമ്മീഷനിലും പരാതി നല്കുകയും ചെയ്തു. മങ്ങാട് സ്നേഹതീരം എന്ന വാട്സ്ആപ്പ് ഗ്രൂപ്പില് ശൈലജക്കെതിരെ വ്യാജ പ്രചാരണം നടത്തിയെന്ന പരാതിയെ തുടര്ന്നാണ് കേസ്. യുഡിഎഫ് സ്ഥാനാര്ത്ഥിയും നേതാക്കളുമാണ് ഇത്തരം അധിക്ഷേപങ്ങള്ക്ക് പിന്നിലെന്നാണ് ശൈലജയും ഇടതുമുന്നണിയും ആരോപിക്കുന്നത്.
തന്റെ പേരില് മോര്ഫ് ചെയ്ത ചിത്രങ്ങളടക്കം വ്യാജവീഡിയോകള് പ്രചരിപ്പിച്ച് അപകീര്ത്തിപെടുത്താനും തെറ്റിദ്ധാരണ പടര്ത്താനും യുഡിഎഫ് ശ്രമിക്കുന്നെന്നായിരുന്നു ശൈലജ തിരഞ്ഞെടുപ്പ് കമ്മീഷന് നല്കിയ പരാതിയില് പറഞ്ഞത്. പരാതിയില് എതിര്സ്ഥാനാര്ഥിയായ ഷാഫി പറമ്പിലിനെയും കക്ഷി ചേര്ത്തിട്ടുണ്ട്. സൈബര് ആക്രമണം നടത്തുന്ന അക്കൗണ്ടുകളുടെ വിവരങ്ങള് അടക്കമാണ് പരാതി നല്കിയിരുന്നത്. അതിനിടയില് ഷാഫി പറമ്പിലും പല വിഷയങ്ങള് ഉന്നയിച്ച് തിരഞ്ഞെടുപ്പ് കമ്മീഷന് പരാതി നല്കിയിട്ടുണ്ട്.
