യുഎഇയുടെ സുപ്രധാന പ്രഖ്യാപനം; 10 വര്‍ഷത്തെ ബ്ലൂ റെസിഡൻസി വിസ

ബ്ലൂ റെസിഡന്‍സി വിസ യുഎഇ കഴിഞ്ഞ ദിവസം നടത്തിയ സുപ്രധാന പ്രഖ്യാപനമായിരുന്നു. പരിസ്ഥിതി സംരക്ഷണത്തിന് നല്‍കുന്ന മികച്ച സംഭാവനകളെ അടിസ്ഥാനമാക്കിയാണ് ബ്ലൂ റെസിഡന്‍സി വിസ നല്‍കുക. 10 വര്‍ഷത്തെ വിസയാണ് അനുവദിക്കുക.

പരിസ്ഥിതി സംരക്ഷണ മേഖലയിൽ മികച്ച സംഭാവനകൾ നൽകിയ വ്യക്തികൾക്കാണ് വിസ നൽകുക. സുസ്ഥിരത ഉറപ്പാക്കൽ, വായു ഗുണനിലവാരം മെച്ചപ്പെടുത്തൽ, കടലിലെയും കരയിലെയും പരിസ്ഥിതി സംരക്ഷണം, ഇതിനായുള്ള സാങ്കേതിക വിദ്യ വികസിപ്പിക്കൽ തുടങ്ങിയ സംഭാവനകൾ പരിഗണിക്കും.

ഇതിനായി യുഎഇയ്ക്ക് അകത്തും പുറത്തുമുള്ള സുസ്ഥിര സംരംഭങ്ങളെയും പരിഗണിക്കും. അന്താരാഷ്ട്ര കമ്പനികൾ, അസോസിയേഷനുകൾ, സർക്കാരിതര സംഘടനകൾ എന്നിവയിലെ അംഗങ്ങൾ, ആഗോള അവാര്‍ഡ് ജേതാക്കള്‍, വിശിഷ്ട പരിസ്ഥിതി പ്രവര്‍ത്തകര്‍, പരിസ്ഥിതി മേഖലയിലെ ഗവേഷകര്‍ എന്നിവര്‍ ഉൾപ്പെടെയുള്ള പരിസ്ഥിതി പ്രവർത്തനങ്ങളെ പിന്തുണയ്ക്കുന്നവർക്ക് ബ്ലൂ റെസിഡൻസി അനുവദിക്കും.



യോഗ്യരായവര്‍ക്ക് ഫെഡറല്‍ അതോറിറ്റി ഫോര്‍ ഐഡന്‍റിറ്റി, സിറ്റിസണ്‍ഷിപ്പ്, കസ്റ്റംസ് ആന്‍ഡ് പോര്‍ട്ട് സെക്യൂരിറ്റി വഴി അപേക്ഷകള്‍ സമര്‍പ്പിക്കാം. ബന്ധപ്പെട്ട അധികൃതര്‍ക്ക് അര്‍ഹതപ്പെട്ടവരുടെ പേരുകള്‍ നാമനിര്‍ദ്ദേശം ചെയ്യാനുമാകും. 2024 സുസ്ഥിരത വർഷമായി ആചരിക്കുന്നതിന്റെ ഭാഗമായാണ് പ്രഖ്യാപനം.