കൊല്ക്കത്ത: ജോലി വാഗ്ദാനം ചെയ്ത് പണം തട്ടിയ കേസില് ബി.ജെ.പി നേതാവ് അറസ്റ്റില്. ബി.ജെ.പി ബംഗാള് ഉപാധ്യക്ഷന് ജയപ്രകാശ് മജുംദാറിനെയാണ് പോലീസ് അറസ്റ്റ് ചെയ്തത്. ബിദാന്നഗര് പോലീസ് സ്റ്റേഷനിലേക്ക് മജുംദാറിനെ വിളിച്ചു വരുത്തി ചോദ്യം ചെയ്ത ശേഷം അറസ്റ്റ് ചെയ്യുകയായിരുന്നു. ഐ.പി.സി സെക്ഷന്സ് 420, 506, 406 എന്നിവ പ്രകാരം വഞ്ചനാക്കുറ്റം ചുമത്തിയാണ് അറസ്റ്റ് ചെയ്തത്.
ടീച്ചേഴ്സ് എലിജിബിലിറ്റി ടെസ്റ്റ് എഴുതുന്ന യുവാക്കളില് നിന്ന് 7.2 ലക്ഷം രൂപ തട്ടിയെന്നാണ് കേസ്. അരൂപ് റോയി എന്നയാള് നല്കിയ പരാതിയിലാണ് അറസ്റ്റ്. പത്ത് ലക്ഷം രൂപ നല്കിയാല് ജോലി ശരിയാക്കി നല്കാമെന്ന് മജുംദാര് വാഗ്ദാനം ചെയ്തതായി പരാതിക്കാരന് ആരോപിച്ചു. തുടര്ന്ന് 7.20 ലക്ഷം രൂപ കൈമാറി.
പിന്നീട് മൂന്ന് മാസങ്ങള്ക്ക് ശേഷം ജോലിക്കാര്യം അന്വേഷിച്ചപ്പോള് പണം വാങ്ങിയിട്ടില്ലെന്ന് മജുംദാര് പറഞ്ഞു. ഇക്കര്യത്തില് തനിക്ക് യാതൊന്നും പറയാനില്ലെന്നും പറഞ്ഞ് ഇയാള് കൈമലര്ത്തുകയായിരുന്നു പരാതിക്കാരന് പറഞ്ഞു.
