ഫീല് - ഗുഡ് ചിത്രങ്ങളില് നിന്നുള്ള സംവിധായകന് ജിസ് ജോയി വ്യതിചലിച്ച് മികച്ചൊരു ത്രില്ലറാണ് ‘തലവന്’ എന്ന സിനിമയിലൂടെ പ്രേക്ഷകര്ക്ക് നല്കിയിരിക്കുന്നത്. രണ്ട് വ്യത്യസ്ത റാങ്കുകളിലുള്ള പൊലീസ് ഓഫീസർമാരുടെ ഇടയിലുണ്ടാകുന്ന പ്രശ്നങ്ങളാണ് തലവന് പ്രേക്ഷകർക്ക് മുന്നിൽ അവതരിപ്പിക്കുന്നത്. ചിത്രത്തില് ബിജു മേനോനൊപ്പം നായകവേഷം ചെയ്തത് ആസിഫ് അലിയാണ്. അതുകൊണ്ടു തന്നെ തലവന് സൂപ്പര് ഹിറ്റിലേക്ക് കുതിക്കുമ്പോള് അക്കാര്യത്തില് ഏറ്റവും സന്തോഷമുള്ള ഒരാളായി ആസിഫ് മാറുകയാണ്.
ഇപ്പോഴിതാ തന്റെ സിനിമയുടെ ഫസ്റ്റ് ഡേ ഫസ്റ്റ് ഷോ കാണാന് തന്റെ ബാപ്പയെയും ഉമ്മയെയും കൊണ്ടുവന്നതിനെക്കുറിച്ചാണ് ആസിഫ് പറഞ്ഞ കാര്യങ്ങളാണ് സോഷ്യല് മീഡിയ ഏറ്റെടുക്കുന്നത്.
‘‘ഞാന് സിനിമയില് വന്നിട്ടിപ്പോള് ഏകദേശം പതിനഞ്ച് വര്ഷമാകാറായി. ഇതുവരെ എന്റെ വാപ്പയും ഉമ്മയും റിലീസിന് എന്റെ കൂടെ തിയേറ്ററില് വന്നിട്ടില്ല. പിന്നെ സ്കൂളിലോ കോളജിലോ പഠിക്കുമ്പോള് റിസള്ട്ട് വരുമ്പോള് എനിക്ക് കെട്ടിപ്പിടിച്ച് ഉമ്മ തരാനുള്ള സൗകര്യം ഞാന് കൊടുത്തിട്ടില്ല. അതിന്റെ സുഖമെന്താണെന്ന് അവരുമൊന്ന് അറിയട്ടെ. എനിക്ക് വ്യക്തിപരമായി ഏറെ പ്രതീക്ഷയുണ്ടായിരുന്ന ചിത്രമായിരുന്നു തലവന്. സാധാരണയില് കവിഞ്ഞുള്ള സമയം ഞാന് ഈ സിനിമയില് സ്പെന്ഡ് ചെയ്തിട്ടുണ്ട്. അതുകൊണ്ട് ഇത് ഹിറ്റടിച്ചാലോ എന്നൊരു പ്രതീക്ഷയുണ്ടായിരുന്നു. അതുകൊണ്ടാണ് അവരെ ഈ സിനിമ കാണാന് കൊണ്ടുവന്നത്. ആദ്യമായാണ് ബാപ്പയും ഉമ്മയും എന്റെ ഒരു ചിത്രം കാണാന് ആദ്യ ദിനം ആദ്യ ഷോ തന്നെ വരുന്നത്. സിനിമ കഴിഞ്ഞുള്ള ആളുകളുടെ റിയാക്ഷനും മാധ്യമപ്രവര്ത്തകരായ നിങ്ങള് വന്ന് വിശേഷങ്ങള് ചോദിക്കുന്നതുമൊക്കെ അകലെ നിന്ന് അഭിമാനത്തോടെ വീക്ഷിക്കുന്ന ബാപ്പയെ ഒളികണ്ണിട്ട് സന്തോഷത്തോടെ നോക്കുകയായിരുന്നു ഞാന്...’’ ആസിഫ് നിറഞ്ഞ ചിരിയോടെ പറയുന്നു.
റിലീസിനു ശേഷം ഒരാഴ്ച കഴിയുമ്പോള് മികച്ച കളക്ഷനും പ്രേക്ഷകാഭിപ്രായവുമാണ് ചിത്രത്തിന് ലഭിക്കുന്നത്. അനുശ്രീ, മിയ, ദിലീഷ് പോത്തന്, കോട്ടയം നസീര്, ശങ്കര് രാമകൃഷ്ണന്, ജോജി കെ. ജോണ്, ദിനേശ്, അനുരൂപ്, നന്ദന് ഉണ്ണി, ബിലാസ് എന്നിവരും ചിത്രത്തിലെ പ്രധാന കഥാപാത്രങ്ങളെ അവതരിപ്പിക്കുന്നുണ്ട്.
അരുണ് നാരായണ് പ്രൊഡക്ഷന്സിന്റെയും ലണ്ടന് സ്റ്റുഡിയോസിന്റെയും ബാനറുകളില് അരുണ് നാരായണ്, സിജോ സെബാസ്റ്റ്യന് എന്നിവര് ചേര്ന്നാണ് ചിത്രം നിര്മ്മിച്ചിരിക്കുന്നത്.
