തിരുവനന്തപുരം : ഒരു കോടി പത്തുലക്ഷം രൂപയുടെ ക്രിപ്റ്റോ കറന്സി തട്ടിപ്പ് നടത്തിയെന്ന പരാതിയില് സി.ഐക്കെതിരേ കേസ്. പോലീസ് അക്കാദമിയിലെ ട്രെയിനിങ് ഇന്സ്പെക്ടറായ സി.ഐക്കെതിരേയാണ് എറണാകുളം എളമക്കര പോലീസ് എഫ്.ഐ.ആര് രജിസ്റ്റര് ചെയ്തത്.
എറണാകുളം ജില്ലാക്കോടതിയുടെ നിര്ദേശാനുസരണം ഫെബ്രുവരി 20ന് കേസെടുത്തിട്ടും തുടര്നടപടികളുണ്ടായില്ല. പോലീസ് അക്കാദമിയിലെ ഉന്നതരും കണ്ണടച്ചു. അമ്പലപ്പുഴ സ്വദേശി എം. ഷൈന് നല്കിയ പരാതിയില് പ്രഥമദൃഷ്ട്യാ കഴമ്പുണ്ടെന്ന് കണ്ട് കേസെടുക്കാന് കോടതി നിര്ദേശിക്കുകയായിരുന്നു. പോലീസ് അക്കാദമിയില് ദീര്ഘകാലമായി ട്രെയിനിംഗ് ഇന്സ്പെക്ടറായ സി.ഐ. ആംഡ് ബറ്റാലിയന് വിഭാഗമല്ല. ലോക്കല് പോലീസിന്റെ ഭാഗമായിട്ടും ഉന്നത ബന്ധങ്ങള് കാരണമാണ് പോലീസ് അക്കാദമിയിലെ സുഖവാസം.
വര്ഷങ്ങളായി ഇവിടെയാണ് ജോലി ചെയ്യുന്നത്. ഉന്നത ബന്ധങ്ങള് കാരണമാണ് സി.ഐക്കെതിരേ എളമക്കര പോലീസ് ചെറുവിരല്പോലും അനക്കാത്തതെന്നും ആക്ഷേപമുണ്ട്. വകുപ്പു തല നടപടിയുമില്ല. പോലീസ്- ഗുണ്ടാ ബന്ധമെന്ന ആരോപണങ്ങളുടെ പേരില് സേനയാകെ പ്രതിക്കൂട്ടില് നില്ക്കുമ്പോഴാണ് ക്രിപ്റ്റോ കറന്സി ഇടപാടും ചര്ച്ചയാകുന്നത്. പോലീസിലെ സത്യസന്ധരായ ഉദ്യോഗസ്ഥര്ക്കു ഇതില് അമര്ഷമുണ്ട്.
കേസില് സി.ഐ. രണ്ടാം പ്രതിയാണ്. മറ്റു രണ്ട് പ്രതികള് കൂടിയുണ്ട്. ക്രിപ്റ്റോ കറന്സിയുടെ പേരില് നടന്ന സാമ്പത്തിക ഇടപാടുകള് ഡിജിറ്റല് രീതിയിലാണ്. അതുകൊണ്ട് തന്നെ തെളിവുകളും പ്രത്യക്ഷത്തില് പോലീസിന് മുന്നിലുണ്ട്. എന്നിട്ടും അനേ്വഷിക്കാന് തയാറാകുന്നില്ലെന്നാണു വിമര്ശനം. ഫെയ്സ്ബുക്ക് പോസ്റ്റിന്റെ പേരില് ഉദ്യോഗസ്ഥരെ സസ്പെന്ഡ് ചെയ്യുന്ന കേരളാ പോലീസിനുള്ളിലാണ് കോടികളുടെ തട്ടിപ്പ് നടത്തിയെന്ന ആക്ഷേപം നേരിടുന്ന സി.ഐ. പോറല്പോലും ഏല്ക്കാതെ തുടരുന്നത്.
ബിറ്റ്കോയിന് ബിസിനസില് പണമിട്ടാല് ലാഭമുണ്ടാക്കമെന്ന് പറഞ്ഞ് കഴിഞ്ഞ വര്ഷം ഒക്ടോബര് മുതല് പരാതിക്കാരനെ വഞ്ചിച്ചെന്നാണ് പ്രഥമ വിവര റിപ്പോര്ട്ടില് പറയുന്നത്. ഐ.സി.ഐ.സി.ഐ. അക്കൗണ്ടില്നിന്നാണ് ആരോപണവിധേയനായ സി. ഐയുടെ ഗൂഗിള് പേ നമ്പറിലേക്കു ഒരു കോടിയില് അധികം കൈമാറിയതെന്നു എഫ്. ഐ. ആറില് പറയുന്നു. സി.ഐയുടെ വ്യക്തിഗത അക്കൗണ്ടിലേക്കും പണമിടപാട് നടന്നെന്നും വിശദീകരിക്കുന്നു.
