‘‘ഊട്ടിയില്‍ ഡ്രസ് കിട്ടാന്‍ പാടാ, കര്‍ട്ടന്‍ ക്ലോത്ത് കൊണ്ട് ഫ്രോക്കും, ജയറാമേട്ടന്‍ ധരിച്ച ബെഡ് ഷീറ്റ് കൊണ്ടുള്ള ഷര്‍ട്ടും: കോസ്റ്റ്യൂം ഡിസൈനര്‍ എസ്ബി സതീഷ്

മലയാളത്തില്‍ അന്നുമിന്നും പ്രേക്ഷകര്‍ ഒരേ ആസ്വാദനത്തോടെ കാണുന്ന സിനിമയാണ് രഞ്ജിത്തിന്റെ തിരക്കഥയില്‍ സിബി മലയില്‍ സംവിധാനം ചെയ്ത ‘സമ്മര്‍ ഇന്‍ ബത് ലഹേം’. മഞ്ജു വാര്യര്‍, സുരേഷ് ഗോപി, ജയറാം എന്നിങ്ങനെയുള്ള വന്‍ താരനിരകള്‍ക്കൊപ്പം അതിഥി വേഷത്തില്‍ മോഹന്‍ലാല്‍ കൂടിയെത്തിയ സിനിമ നിറഞ്ഞ ആവേശത്തോടെയാണ് ആരാധകര്‍ ഏറ്റെടുത്തത്. വര്‍ഷങ്ങളിത്ര കഴിഞ്ഞിട്ടും ആ സിനിമ ടെലിവിഷനില്‍ കാണുമ്പോഴും അതിലെ പാട്ടുകള്‍ കേള്‍ക്കുമ്പോഴും ആരാധകര്‍ക്ക് വല്ലാത്തൊരു കുളിര്‍മ്മയാണ്.

അടൂര്‍ ഗോപാലകൃഷ്ണന്റെ കഥാപുരുഷനിലൂടെ വസ്ത്രാലങ്കാര മേഖലയിലേക്കെത്തിയ ആളായ എസ്.ബി. സതീഷായിരുന്നു സമ്മര്‍ ഇന്‍ ബത് ലഹേമി​ന്റെ കോസ്റ്റ്യൂം ഡിസൈനര്‍ എസ്.ബി. സതീഷ്.. രണ്ടാമത്തെ ചിത്രമായ ഗുരുവിലെ വസ്ത്രാലങ്കാരത്തിന് കരിയറിലെ ആദ്യ സംസ്ഥാന അവാര്‍ഡും സതീഷിന് കിട്ടി. 29 വര്‍ഷത്തെ കരിയറില്‍ 50ലധികം സിനിമകള്‍ക്ക് വേണ്ടി പ്രവര്‍ത്തിച്ച സതീഷ് ഒമ്പത് സംസ്ഥാന അവാര്‍ഡും ഒരു ദേശീയ അവാര്‍ഡും സ്വന്തമാക്കിയിട്ടുണ്ട്.

ഇപ്പോഴിതാ ചിത്രത്തിന്റെ കോസ്റ്റ്യൂം ഡിസൈനിംഗുമായി ബന്ധപ്പെട്ട ചില കഥകള്‍ പങ്കിട്ടിരിക്കുകയാണ് ഡിസൈനര്‍ സതീഷ്. ചില സിനിമകളില്‍ ഡാന്‍സ് സീനുകള്‍ ചെയ്യുന്ന സമയത്ത് പെട്ടെന്ന് ചില ഡ്രസുകള്‍ ഉണ്ടാക്കേണ്ടി വരുമെന്നും കൈയില്‍ കിട്ടുന്ന മെറ്റീരിയല്‍ വെച്ച് വസ്ത്രങ്ങള്‍ തയാറാക്കേണ്ടി വന്നിട്ടുണ്ടായിരുന്നെന്നും സതീഷ് പറഞ്ഞു. ‘സമ്മര്‍ ഇന്‍ ബത് ലഹേമില്‍ ബെഡ് ഷീറ്റ് കൊണ്ട് ജയറാമിന് ഷര്‍ട്ട് വരെ അടിച്ചിട്ടുണ്ടെന്നും പെട്ടെന്ന് പെട്ടെന്ന് പല ചേഞ്ചുകളും വരുത്തിയിട്ടുള്ള സിനിമയാണ് സമ്മര്‍ ഇന്‍ ബത്‌ലഹേമെന്നും സതീഷ് പറയുന്നു.

‘‘എല്ലാവര്‍ക്കും ഒരുപോലത്തെ കോസ്റ്റ്യൂം വേണമെന്നൊക്കെ പെട്ടെന്നാണ് പറയുക. കുട്ടികളും കൂടി ഡാന്‍സേഴ്‌സായി വരുമ്ബോള്‍ എല്ലാവരും കൂടി പന്ത്രണ്ടോളം പേരുണ്ട്. പെട്ടെന്ന് തന്നെ അവര്‍ക്കെല്ലാം ഒരുപോലെയുള്ള ഡ്രസ്സ് വേണം, മെറ്റീരിയിലൊക്കെ ഊട്ടിയില്‍ കിട്ടാന്‍ പാടല്ലേ. ഫര്‍ണിഷിംഗ് ക്ലോത്തും കര്‍ട്ടന്‍ ക്ലോത്തുമൊക്കെ ഉപയോഗിച്ച്‌ ഫ്രോക്ക് തുന്നിയിട്ടുണ്ട്.

ഒരു പാട്ടുസീനില്‍ എല്ലാവരും വെള്ളയും മഞ്ഞയും ഡ്രസ്സ് അണിഞ്ഞുവരുന്നുണ്ട്, അതൊക്കെ കര്‍ട്ടന്‍ ക്ലോത്ത് വച്ച്‌ തയ്ച്ച ഫ്രോക്കാണ്. ഡിസൈനും ചില അലങ്കാരപ്പണികളുമൊക്കെ നടത്തിയതുകൊണ്ട് അതൊന്നും ആര്‍ക്കും മനസ്സിലായില്ല. അതില്‍ ബെഡ് ഷീറ്റൊക്കെ വട്ട് ഷര്‍ട്ട് തുന്നിയിട്ടുണ്ട്.

ജയറാമേട്ടന്‍ ധരിച്ച ഷര്‍ട്ട് അങ്ങനെ ഉണ്ടാക്കിയതാണ്. ആര്‍ക്കും പെട്ടെന്ന് മനസ്സിലാവില്ല, നല്ല ഡിസൈനില്‍ അതു പ്രസന്റ് ചെയ്യുമെന്നു എന്ന് മാത്രം. ഇനി കാണുമ്പോള്‍ നിങ്ങള്‍ക്കത് മനസിലാവും...’’ സതീഷ് പറയുന്നു.