മലയാള സിനിമാപ്രേക്ഷകര് എന്നുമേറെ നൊമ്പരത്തോടെ കാണുന്ന ഒരു സിനിമയാണ് അനൂപ് മേനോന് സംവിധാനം ചെയ്ത ‘തിരക്കഥ’.ആ സിനിമയ്ക്ക് കമല് ഹസ്സന്റെയും ശ്രീവിദ്യയുടെയും പ്രണയകഥയുമായി നല്ല സാമ്യമുണ്ടെന്ന പല വാര്ത്തകളും അന്ന് കേട്ടിരുന്നു. തന്റെ ജീവിതത്തിലെ ഏറ്റവും മനോഹരമായ പ്രണയമാണ് ശ്രീവിദ്യയുമായി ഉണ്ടായിരുന്നതെന്ന് കമല് ഹസ്സന് പലപ്പോഴും പറഞ്ഞിട്ടുണ്ട്.
ഇപ്പോഴിതാ കമല് ഹസ്സനെ നേരിട്ട് കണ്ടതിനെക്കുറിച്ചും തിരക്കഥ എന്ന സിനിമയെക്കുറിച്ച് കമല് ഹസ്സന് പറഞ്ഞതിനെക്കുറിച്ചും മനസ്സു തുറക്കുകയാണ് അനൂപ് മേനോന്.
‘‘എന്നെ കമല് സാര് വിളിക്കുന്നുവെന്ന് കേട്ടപ്പോള് ഞാന് അങ്ങോട്ടു പോയി. അവിടെ ചെന്ന് കുറെ കാര്യങ്ങള് സംസാരിച്ചു. അതിനിടയില് തിരക്കഥ
സിനിമയും വന്നു. അപ്പോള് സാര് പറഞ്ഞു, ഇങ്ങനെയൊന്നുമല്ല കഥ കേട്ടോ, നിങ്ങള് കാണിച്ചതു പോലെയൊന്നുമല്ല. വിദ്യയെ ഞാന് അവസാനമായി കാണാന് പോയത് എന്തിനാണെന്ന് അറിയാമോ ? എന്ന് കമല് സാര് ചോദിച്ചു. ഞാന് പറഞ്ഞു, ‘അറിയില്ല’ എന്ന്. പിന്നെ ഞാന് പതുക്കെ ചോദിച്ചു, ‘എന്തിനായിരുന്നു സാര് കാണാന് പോയത്?’എന്ന്. ‘‘അത് ഞാന് പറയണമെങ്കില് ഞാന് കമല് ഹസ്സന് അല്ലായിരിക്കണം’ എന്നായി കമല് സാര്. ഞാനതു ചിരിച്ചു വിട്ടു.
പിന്നെ സാറിനൊപ്പം മനോഹരമായി കുറെ കാര്യങ്ങള് സംസാരിച്ചു. എന്തെങ്കിലുമൊന്ന് ഇട്ടു കൊടുത്താല് അദ്ദേഹത്തിന്റെ കൈയില് നിന്ന് ഇഷ്ടം പോലെ കാര്യങ്ങള് കിട്ടുമല്ലോ. മൊഴിമുത്തുകള് പോലെ. കണ്ട സിനിമകളെക്കുറിച്ച്, ട്രാഫിക്കിനെക്കുറിച്ച്, തിരക്കഥ സിനിമയെക്കുറിച്ച് അങ്ങനെ പലതും സംസാരത്തില് വന്നു....’’ അനൂപ് മേനോന് പറയുന്നു.
