ആസിഫ് അലി നായകനായെത്തിയ 'കിഷ്കിന്ധാ കാണ്ഡം' എന്ന ചിത്രത്തെ പ്രശംസിച്ച് സംവിധായകൻ മേജർ രവി. താൻ അഭിനയിച്ച സിനിമയാണെങ്കിലും കിഷ്കിന്ധാ കാണ്ഡം കണ്ടപ്പോഴാണ് അതിന്റെ തീവ്രത മനസിലായത് എന്ന് അദ്ദേഹം പറഞ്ഞു. വിജയരാഘവൻ, ആസിഫ് അലി, അപർണ ബാലമുരളി തുടങ്ങിയവരുടെ പ്രകടനങ്ങളെയും മേജർ രവി സമൂഹ മാധ്യമങ്ങളിലൂടെ പ്രകീർത്തിച്ചു.
'ഞാൻ കിഷ്കിന്ധാ കാണ്ഡം സിനിമ കണ്ടു. ശരിക്കും ത്രിൽ അടിപ്പിച്ച ഒരു പടം. ഞാൻ അഭിനയിച്ചെങ്കിലും പടം കണ്ടപ്പോഴാണ് അതിന്റെ ഒരു ഇന്റെൻസിറ്റി മനസിലായത്. സൂപ്പർ ആക്ടിങ് ബൈ കുട്ടേട്ടൻ, ആസിഫ്, അപർണ ആൻഡ് എല്ലാരും തകർത്തു. എൻജോയ് ഓണം വിത്ത് കിഷ്കിന്ധാ കാണ്ഡം ഫിലിം ബൈ എ സൂപ്പർ ഡയറക്ടർ ദിൻജിത് ആൻഡ് ടീം,' അദ്ദേഹം കുറിച്ചത് ഇങ്ങനെ,.
സിനിമയ്ക്ക് എല്ലാ കോണുകളിൽ നിന്നും മികച്ച പ്രതികരണമാണ് ലഭിക്കുന്നത്. ചിത്രത്തിലെ ആസിഫ് അലിയുടെയും വിജയരാഘവന്റേയും പ്രകടനങ്ങൾക്ക് മികച്ച പ്രതികരണമാണ് കിട്ടുന്നത്. ഈ വർഷത്തെ ഏറ്റവും മികച്ച ചിത്രങ്ങളിൽ ഒന്നാണ് 'കിഷ്കിന്ധാ കാണ്ഡം' എന്നാണ് പ്രേക്ഷകർ അഭിപ്രായപ്പെടുന്നത്.
ഫാമിലി ത്രില്ലറായി ഒരുക്കിയിരിക്കുന്ന ചിത്രത്തിന്റെ തിരക്കഥ തയ്യാറാക്കിയതും ക്യാമറ കൈകാര്യം ചെയ്തതും ബാഹുൽ രമേശാണ്. ജഗദീഷ്, അശോകന്, നിഷാന്, വൈഷ്ണവി രാജ്, മേജര് രവി, നിഴല്കള് രവി, ഷെബിന് ബെന്സണ്, കോട്ടയം രമേഷ്, ബിലാസ് ചന്ദ്രഹാസന്, മാസ്റ്റര് ആരവ്, ജിബിന് ഗോപിനാഥ് തുടങ്ങിയവരാണ് സിനിമയിലെ മറ്റു പ്രധാന കഥാപാത്രങ്ങളെ അവതരിപ്പിച്ചിരിക്കുന്നത്.
