അഭിനേതാവും രാഷ്ട്രീയപ്രവര്ത്തകനുമായ കൃഷ്ണകുമാറിന്റെ നാലു പെണ്മക്കളും സോഷ്യല് മീഡിയയില് നിറഞ്ഞു നില്ക്കുന്ന താരപുത്രിമാരാണ്. മൂത്തമകളായ അഹാനയും രണ്ടാമത്തെ മകളും ഇഷാനിയും സിനിമകളിലൂടെ പ്രേക്ഷകമനസ്സ് കീഴടക്കിയപ്പോള് മറ്റു രണ്ടു മക്കളായ ദിയയും ഹന്സികയും സോഷ്യല് മീഡിയ പ്ലാറ്റ്ഫോമുകളിലൂടെയാണ് ആരാധകരുടെ മനസ്സ് കവരുന്നത്. എല്ലാ വിശേഷങ്ങളും ഫോട്ടോഷൂട്ടുകളും താരപുത്രിമാര് ഇതിലൂടെ പങ്കിടാറുണ്ട്.
കഴിഞ്ഞ ദിവസമാണ് കൃഷ്ണകുമാറിന്റെ മകള് ദിയ കൃഷ്ണയുടെ വിവാഹം നടന്നത്. കുടുംബം മാത്രമല്ല സോഷ്യല് മീഡിയയും ഏറെ ആഘോഷിച്ച ഒരു വിവാഹം കൂടിയായിരുന്നു അത്. ദിയ കൃഷ്ണയുടെ വിവാഹത്തിന് പിന്നാലെ ബാലിയില് അവധി ആഘോഷത്തിലാണ് കൃഷ്ണകുമാറും കുടുംബവും. സോഷ്യല് മീഡിയയില് വൈറലാവുകയാണ് കുടുംബത്തിന്റെ ബാലി ചിത്രങ്ങള്. ഹൻസികയും ബാലിയില് നിന്നുള്ള ചിത്രങ്ങള് സോഷ്യല് മീഡിയയില് പങ്കുവച്ചിരുന്നു. എന്നാല് അതിനു പിന്നാലെ പല ഉപദേശങ്ങളും വിമര്ശനങ്ങളും ഹന്സികയ്ക്ക് കമന്റുകളിലൂടെ നേരിടേണ്ടി വന്നു.
ഇപ്പോഴിതാ അതിന് താരപുത്രി നല്കിയ മറുപടി പോസ്റ്റാണ് ശ്രദ്ധിക്കപ്പെടുന്നത്. ഡയമണ്ട് ബീച്ചില് നിന്നുള്ള സ്ലീവ്ലസ് ടോപ്പും പാവാടയും അണിഞ്ഞ് നില്ക്കുന്ന ചിത്രങ്ങളാണ് ഹൻസിക പോസ്റ്റ് ചെയ്തത്. ഫോട്ടോയ്ക്ക് താഴെ ഒരു സൈബർ ആങ്ങള ഉപദേശവുമായി എത്തി. ‘‘ദയവുചെയ്ത് സെമസ്റ്ററിലേക്ക് പഠിക്കൂ. സോഷ്യല് മീഡിയയില് ഭാവി നശിപ്പിക്കരുത്. സഹോദരന് എന്ന നിലയിലാണ് ഉപദേശം നല്കുന്നത്...’’ എന്നായിരുന്നു കമന്റ്.
ഉപദേശം ചർച്ചയായതോടെ താരപുത്രി മറുപടിയുമായി എത്തി. അതേ വേഷത്തിലുള്ള കൂടുതല് ചിത്രങ്ങള് പങ്കിട്ടാണ് ഹന്സിക കുറിക്കു കൊള്ളുന്ന മറുപടി നല്കിയത്. അതോടെ നിരവധി പേര് പോസ്റ്റിന് താഴെ ഹൻസികയ്ക്ക് പിന്തുണയുമായി എത്തി. ഹൻസികയ്ക്കൊപ്പം അച്ഛനും അമ്മയും സഹോദരിമാരുമുള്ള ചിത്രങ്ങളും സോഷ്യല് മീഡിയയില് നിറയുന്നുണ്ട്. കുടുംബം ഒന്നിച്ചുള്ള ചിത്രങ്ങളും ആരാധകര് ഏറ്റെടുക്കുന്നുണ്ട്.
