കല്പ്പറ്റ: ഉപതെരഞ്ഞെടുപ്പില് മത്സരിക്കാന് എത്തുന്ന പ്രിയങ്കാഗാന്ധിയുടെ കന്നിയങ്കത്തിന് ആവേശം പകര്ന്ന് കോണ്ഗ്രസ് നേതാക്കളായ രാഹുല്ഗാന്ധിയും മല്ലികാര്ജ്ജുന ഖാര്ഗേയും സോണിയാഗാന്ധിയും വയനാട്ടിലെത്തി. ഇതുവരെ കോണ്ഗ്രസിനൊപ്പം മാത്രം നിന്നിട്ടുള്ള ലോക്സഭാ മണ്ഡലത്തില് ആദ്യമായി മത്സരത്തിനിറങ്ങുന്ന പ്രിയങ്ക 12.30 യോടെയാണ് നാമനിര്ദേശ പത്രിക സമര്പ്പിക്കുക.
പ്രത്യേക വിമാനത്തില് കണ്ണൂരിലെത്തിയ ശേഷം ഹെലികോപ്റ്ററിലാണ് രാഹുല് ഗാന്ധിയും ഖാര്ഗെയും ബത്തേരിയിലെത്തിയത്. ബത്തേരി സെന്റ് മേരീസ് കോളേജ് ഗ്രൗണ്ടിലെത്തിയ കോണ്ഗ്രസ് നേതാക്കള് പതിനൊന്ന് മണിയോടെ കല്പറ്റ പുതിയ ബസ് സ്റ്റാന്റിലെത്തും. നിരവധി പേരാണ് സെന്റ്മേരീസ്കോളേജ് ഗ്രൗണ്ടില് തടിച്ചുകൂടിയിരിക്കുന്നത്. സോണിയ ഗാന്ധി റോഡ്ഷോയില് പങ്കെടുക്കില്ല.
പത്ത് ദിവസം പ്രചാരണത്തിന്റെ ഭാഗമായി പ്രിയങ്ക വയനാട്ടിലുണ്ടാകും. വന് ഒരുക്കങ്ങളാണ് പ്രിയങ്കയുടെ തിരഞ്ഞെടുപ്പ് പ്രചാരണത്തിനായി കോണ്ഗ്രസ് മണ്ഡലത്തില് നടത്തിയിരിക്കുന്നത്. ആദ്യമായി തെരഞ്ഞെടുപ്പിനെ നേരിടാന് പ്രിയങ്ക വയനാടാണ് തെരഞ്ഞെടുത്തതെങ്കിലും കഴിഞ്ഞ രണ്ട് തവണ മണ്ഡലത്തില് രാഹുല്ഗാന്ധി മത്സരിച്ചപ്പോഴും പ്രചാരണത്തിനായി പ്രിയങ്കയും വയനാട്ടില് വന്നിട്ടുണ്ട്.
വയനാട്ടിലെ ജനങ്ങള്ക്ക് പ്രിയങ്കയേക്കാള് മികച്ച നേതാവിനെ നിര്ദേശിക്കാനാകില്ലെന്ന് രാഹുല് ഗാന്ധി പറഞ്ഞിരുന്നു. വയനാടിന്റെ ആവശ്യങ്ങള്ക്ക് വേണ്ടി ശക്തമായി നിലനില്ക്കാനും പാര്ലമെന്റില് വയനാടിന്റെ ശബ്ദമാകാനും പ്രിയങ്കയ്ക്ക് സാധിക്കുമെന്നുമാണ് രാഹുല് എക്സില് കുറിച്ചത്. വയനാടിന് സുപരിചിതയായ പ്രിയങ്കയെ ഏറ്റവും ഉയര്ന്ന ഭൂരിപക്ഷത്തില് തന്നെ വിജയിപ്പിക്കാനാണ് കോണ്ഗ്രസിന്റെ ശ്രമം. എട്ടര വര്ഷത്തിന് ശേഷമാണ് സോണിയ ഗാന്ധി തിരഞ്ഞെടുപ്പ് പ്രചാരണത്തിനായി കേരളത്തിലെത്തുന്നത്.
