ലഖ്നൗ; ഉത്തര്പ്രദേശില് ഝാന്ഡി ആശുപത്രിയില് വെന്തുമരിച്ച നവജാത ശിശുക്കളുടെ ഡിഎന്എ പരിശോധന ഇന്ന്. തിരിച്ചറിയാനാകാത്ത കുട്ടികളുടെ പരിശോധയാണ് നടത്തുക. കഴിഞ്ഞ ദിവസം കൊല്ലപ്പെട്ടത് ദിവസങ്ങള് മാത്രം പ്രായമുള്ള പത്ത് കുട്ടികളാണ്. ഇതില് മൂന്ന് പേരെ തിരിച്ചറിയാനായിട്ടില്ല. ബാക്കി 7 കുഞ്ഞുങ്ങളെ ബന്ധുക്കള്ക്ക് കൈമാറി. പരിക്കേറ്റ 16 കുഞ്ഞുങ്ങളുടെ നില ഗുരുതരമായി തുടരുകയാണ്.
സംഭവത്തില് യുപി പൊലീസ് അന്വേഷണം ആരംഭിച്ചിട്ടുണ്ട്. അന്വേഷണത്തിനായി ആരോഗ്യവകുപ്പ് ഉന്നതതല സമിതിയെ നിയോഗിച്ചിട്ടുണ്ട്. മെഡിക്കല് എജ്യുക്കേഷന് ഡയറക്ടര് ജനറലിന്റെ നേതൃത്വത്തില് നാലംഗ സംഘമാണ് സമിതിയിലുള്ളത്. സമിതി ഏഴ് ദിവസത്തിനകം സര്ക്കാരിന് റിപ്പോര്ട്ട് നല്കും. ഡിജിപിക്കും യുപി സര്ക്കാരിനും കമ്മീഷന് നോട്ടീസ് നല്കിയിട്ടുണ്ട്.അതേസമയം അപകടത്തിന് പിന്നില് ആശുപത്രി അധികൃതരുടെ ഭാഗത്തുനിന്നും ഗുരുതര വീഴ്ചയുണ്ടായതായാണ് റിപ്പോര്ട്ട്.
18 കുട്ടികള്ക്ക് മാത്രം ചികിത്സ സൗകര്യമുള്ള ഐസിയുവില് സംഭവസമയത്ത് 49 കുട്ടികളാണ് ഉണ്ടായിരുന്നത്. ആശുപത്രിയിലെ അഗ്നിരക്ഷാ ഉപകരണങ്ങള് പ്രവര്ത്തിക്കാത്തത് അപകടത്തിന്റെ തീവ്രത വര്ധിപ്പിച്ചതായി ദൃക്സാക്ഷികള് കഴിഞ്ഞ ദിവസം വ്യക്തമാക്കിയിരുന്നു.
