ന്യൂഡല്ഹി: അന്തരീക്ഷ മലിനീകരണം രൂക്ഷമായ തലസ്ഥാന നഗരിയില് കൃത്രിമ മഴ പെയ്യിക്കാന് അനുമതി തേടി ഡല്ഹി പരിസ്ഥിതിമന്ത്രി ഗോപാല് റായ് കേന്ദ്രത്തിന് കത്തെഴുതി. ഐ.ഐ.ടി. കാണ്പൂരിലെയും കേന്ദ്രസര്ക്കാര് ഏജന്സികളിലെയും വിദഗ്ധരുടെ അടിയന്തര യോഗം വിളിക്കണമെന്നും അദ്ദേഹം അഭ്യര്ഥിച്ചു.
ഡല്ഹിയിലെ അപകടകരമായ മലിനീകരണത്തോതിന്റെ പശ്ചാത്തലത്തിലാണ് അടിയന്തര യോഗം വിളിക്കാന് ഡല്ഹി സര്ക്കാര് ആവര്ത്തിച്ച് അഭ്യര്ത്ഥിക്കുന്നത്. എന്നിട്ടും കേന്ദ്ര പരിസ്ഥിതി മന്ത്രി ഉറക്കം തുടരുകയാണെന്ന് മന്ത്രി ഗോപാല് റായ് വിമര്ശിച്ചു. ഡല്ഹിയില് മാത്രമല്ല, ഉത്തരേന്ത്യയിലുടനീളം ഗ്രേഡഡ് റെസ്പോണ്സ് ആക്ഷന് പ്ലാന് (ഗ്രാപ്) നടപടികള് ഉടന് നടപ്പാക്കണം. കേന്ദ്രസര്ക്കാരിന് നടപടിയെടുക്കാന് കഴിയുന്നില്ലെങ്കില് അവരുടെ മന്ത്രി രാജിവയ്ക്കണമെന്നും റായ് കൂട്ടിച്ചേര്ത്തു.
ഇന്നലെ രാവിലെ ഡല്ഹിയിലെ ശരാശരി വായു ഗുണനിലവാര സൂചിക (എ. ക്യു.ഐ) 492 ആയിരുന്നു. അലിപുര്, ആനന്ദ് വിഹാര്, ബവാന, നരേല, പൂസ, സോണിയ വിഹാര് എന്നിവിടങ്ങളിലെ എ. ക്യു.ഐ 500 കടന്നു. 38 എയര് ക്വാളിറ്റി മോണിറ്ററിങ് സ്റ്റേഷനുകളില് 21 എണ്ണത്തില് എ.ക്യു.ഐ 490 അല്ലെങ്കില് അതില് കൂടുതലാണ്. ഇന്ത്യന് കാലാവസ്ഥാ വകുപ്പ് (ഐ.എം.ഡി) ഡല്ഹിയിലും ദേശീയ തലസ്ഥാന മേഖലയിലും ഇടതൂര്ന്ന മൂടല്മഞ്ഞ് ഉണ്ടാകാനിടയുണ്ടെന്നു കാട്ടി മഞ്ഞ അലേര്ട്ടും പുറപ്പെടുവിച്ചിരിക്കുകയാണ്. ഇന്നലെ രാവിലെ ഇന്ദിരാഗാന്ധി ഇന്റര്നാഷണല് വിമാനത്താവളത്തിലടക്കം ദൃശ്യപരത കുറവായിരുന്നു.
ഡല്ഹിയിലും ദേശീയ തലസ്ഥാന മേഖലയിലും വായുവിന്റെ ഗുണനിലവാരം മോശമായിട്ടും കര്ശന നടപടികള് നടപ്പാക്കുന്നതില് കാലതാമസം വരുത്തിയതിന്റെ പേരില് അടുത്തിടെയും സുപ്രീം കോടതി കടുത്ത വിമര്ശനമുന്നയിച്ചിരുന്നു. സ്ഥിതിഗതികള് വേണ്ടവിധം കൈകാര്യം ചെയ്യുന്നതിന് ഗ്രാപ് നാലാം ഘട്ടത്തിന് കീഴിലുള്ള നിയന്ത്രണങ്ങള് ഇനിയൊരു ഉത്തരവ് ഉണ്ടാകുന്നതുവരെ പ്രാബല്യത്തില് തുടരുമെന്ന് കോടതി നിര്ദേശിച്ചു. എ.ക്യു.ഐ ലെവല് 450 ല് താഴെയാണെങ്കിലും ഘട്ടം- 4 നടപ്പാക്കല് തുടരുമെന്ന് ജസ്റ്റിസുമാരായ എ.എസ്. ഓക, എ.ജി. മാസിഹ് എന്നിവരടങ്ങിയ ബെഞ്ച് ഉത്തരവിട്ടു.
ഗ്രാപ്പിന്റെ നാലാം ഘട്ടം കര്ശനമായി നടപ്പാക്കാന് എല്ലാ എന്.സി.ആര്. സര്ക്കാരുകള്ക്കും നിര്ദേശം നല്കിയ കോടതി, നടപടികളുടെ നടപ്പാക്കല് നിരീക്ഷിക്കാന് എല്ലാ സംസ്ഥാനങ്ങളും ഉടന് ടീമുകള് രൂപീകരിക്കണമെന്നും ഉത്തരവിട്ടിരുന്നു.
ഡല്ഹിയിലെയും ദേശീയ തലസ്ഥാന മേഖലയിലെയും മലിനീകരണത്തോത് കണക്കിലെടുത്ത് സാധ്യമാകുന്നിടത്തെല്ലാം വെര്ച്വല് ഹിയറിങ്ങുകള് അനുവദിക്കാന് എല്ലാ ജഡ്ജിമാരോടും ആവശ്യപ്പെട്ടിട്ടുണ്ടെന്ന് ചീഫ് ജസ്റ്റിസ് സഞ്ജീവ് ഖന്ന ഇന്നലെ പറഞ്ഞു.
കോടതി നിര്ദേശാനുസരണം വിദ്യാഭ്യാസസ്ഥാപനങ്ങള് ഓണ്ലൈന് ക്ലാസുകളിലേക്കു മാറി. ജാമിയ മിലിയ, ഡല്ഹി സര്വകലാശാലകളില് 23 വരെ ഓണ്ലൈന് ക്ലാസുകള് മാത്രമേ ഉണ്ടായിരിക്കുകയുള്ളൂവെന്ന് അധികൃതര് അറിയിച്ചു. ജാമിയ മിലിയ സ്കൂള് വിഭാഗത്തിലെ ഗ്രേഡ് 5 വരെയുള്ള ക്ലാസുകള് ഇനിയൊരു അറിയിപ്പുണ്ടാകുംവരെ ഓണ്ലൈന് ക്ലാസ്പ്രകാരമായിരിക്കും അധ്യയനമെന്നും അറിയിച്ചിട്ടുണ്ട്.
