ബോളിവുഡിന്റെ പ്രിയ താരമായ ആമീര് ഖാന് ആരാധകരുടെ സ്വന്തം മിസ്റ്റര് പെര്ഫക്ഷനിസ്റ്റാണ്. വര്ഷങ്ങളായി ബോളിവുഡില് നിറഞ്ഞു നില്ക്കുന്ന താരത്തിന്റെ ഓരോ കഥാപാത്രങ്ങളും പ്രേക്ഷകര് നെഞ്ചോടു ചേര്ക്കുന്നതാണ്. സ്വകാര്യ ജീവിതത്തിലെ ആമീറിന്റെ തീരുമാനങ്ങളും ചിലപ്പോഴൊക്കെ വാര്ത്തകളില് നിറഞ്ഞിട്ടുണ്ട്. ആദ്യം റീന ദത്തയെ വിവാഹം ചെയ്ത ആമീര് ആ ബന്ധം വേര്പെടുത്തി. അതില് ഇറ ഖാന്, ജുനൈദ് ഖാൻ എന്നീ മക്കളുമുണ്ട്. പിന്നീട് താരം സംവിധായികയായ കിരണ് റാവുവിനെ വിവാഹം ചെയ്തു. അതില് ആസാദ് എന്നൊരു മകനും ഇവര്ക്കുണ്ട്.
വിവാഹമോചിതരായെങ്കിലും റീനയുമായും കിരണുമായും നല്ലൊരു സുഹൃത്ബന്ധം ആമീര് കാത്തുസൂക്ഷിക്കുന്നുണ്ട്. മകളായ ഇറയുടെ വിവാഹത്തിന് എല്ലാ ചടങ്ങുകളും നടത്താന് ആമീര് മുന്നില്ത്തന്നെയുണ്ടായിരുന്നു.
ഇപ്പോഴിതാ തന്റെ മാതാപിതാക്കളുടെ വിവാഹമോചനത്തെക്കുറിച്ച് വെളിപ്പെടുത്തിയിരിക്കുകയാണ് ആമിർ ഖാന്റെ മകള് ഇറ ഖാൻ. മാതാപിതാക്കളുടെ വിവാഹമോചനം ഇപ്പോഴും ശരിയായ കാര്യമായിട്ടാണ് തനിക്ക് തോന്നുന്നതെന്നും എല്ലാ കുട്ടികളേയും പോലെ ആ സമയത്ത് വേദന തോന്നിയെന്നും ഇറ പറഞ്ഞു.
‘‘ഇതുവരെയും എന്റെ അച്ഛനും അമ്മയും ഞങ്ങളുടെ മുന്നില് വഴക്കുണ്ടാക്കിയിട്ടില്ല. വളരെ ഐക്യത്തോടെയായിരുന്നു അവർ ജീവിച്ചത്. ഞങ്ങള് കുടുംബാംഗങ്ങള് പരസ്പരം സ്നേഹിക്കുകയും പിന്തുണക്കുകയും ചെയ്തു. അതിനാല് തന്നെ, മാതാപിതാക്കളുടെ വിവാഹമോചനം എന്നെ ഒരുതരത്തിലും ബാധിച്ചിട്ടില്ലെന്ന് പറയാം. അവരുടെ ജീവിതം മാറ്റി മറിച്ച സംഭവമായിരുന്നു ആ വേർപ്പെടല്. ഒരു ദിവസത്തെ കാര്യമായിരുന്നില്ല മാതാപിതാക്കളുടെ വേർപിരിയല്. ഒരു ബന്ധം ശരിയായ രീതിയില് അവസാനിച്ചത് പോലെയാണ് എനിക്ക് തോന്നിയത്. ഏതൊരു ബന്ധവും തകരുമ്പോള്, ഒരുകുട്ടിയെന്ന് നിലയില് ഒരു നിശ്ചിത അളവില് വേദന തോന്നും, അത് ഞാൻ സമ്മതിക്കുന്നു.
ഇതിനെക്കുറിച്ച് ഞാൻ എന്റെ തെറാപ്പിസ്റ്റുമായി സംസാരിച്ചിട്ടുണ്ട്. ഈ കാര്യത്തില് ആരേയും കുറ്റപ്പെടുത്തേണ്ട ഒരു കാര്യവുമില്ല. എന്താണ് സംഭവിച്ചതെന്ന് അംഗീകരിക്കേണ്ടത് പ്രധാനമാണെന്ന് ഞാൻ മനസ്സിലാക്കിയിട്ടുണ്ട്. ഞങ്ങളെ സംരക്ഷിക്കുന്നതില് അവർ വിവാഹമോചനത്തിന് ശേഷവും ഒന്നിച്ചു നിന്നു. വേർപിരിഞ്ഞെങ്കിലും ഞങ്ങള്ക്ക് വേണ്ടി അവർ ഒന്നിച്ചു നിന്നു, ഞങ്ങളെ ഒരുപോലെ സ്നേഹിച്ചു. തീർച്ചയായും അതൊരു മഹത്തായ കാര്യമാണ്. കുടുംബം നല്ലതുപോലെ കൊണ്ടു പോയി. അച്ഛനും അമ്മയും ഞങ്ങള് മക്കളെ തുല്യമായി സ്നേഹിച്ചു. അതിനാല് മാതാപിതാക്കളുടെ വിവാഹമോചനം എന്നെ ഒരു വിധത്തിലും ബാധിച്ചിട്ടില്ല... ഇറ ഖാന് പറഞ്ഞു. ആമിർ - റീന ദത്ത ദമ്പതികളുടെ മകളാണ് ഇറ.
1986 ആയിരുന്നു ആമിർ ഖാനും റീന ദത്തയും ദീര്ഘകാല പ്രണയത്തിനു ശേഷം വിവാഹിതരായത്. എന്നാല് 2002 ല് ഇരുവരും നിയമപരമായി വേർപിരിയുകയായിരുന്നു.
