എടത്വാ (ആലപ്പുഴ): കളര്കോട് വാഹനാപകടത്തില് ഗുരുതര പരുക്കേറ്റു ചികിത്സയിലിക്കെ മരിച്ച എടത്വാ പള്ളിച്ചിറ കൊച്ചുമോന് ജോര്ജിന്റെ മകന് ആല്വിന് ജോര്ജി (19) ന് കണ്ണീരില് കുതിര്ന്ന യാത്രാമൊഴി. എട്ടിന് ഉച്ചയോടെ മൃതദേഹം വീട്ടിലെത്തിച്ചതു മുതല് വന്ജനാവലിയാണ് അന്തിമോപചാരമര്പ്പിക്കാന് തടിച്ചു കൂടിയത്.
ഇന്നലെ രാവിലെ നടന്ന സംസ്കാര ശുശ്രൂഷയ്ക്കു ശേഷം ബന്ധുക്കള്, സഹപാഠികള്, ജനപ്രതിനിധികള്, പൊതുജനങ്ങള് എന്നിവരുടെ അകമ്പടിയില് വിലാപയാത്രയായി മൃതദേഹം എടത്വാ സെന്റ് ജോര്ജ് ഫൊറോനാ പള്ളിയിലെത്തിച്ചു. ഇതിനിടെ ആല്വിന് പഠിച്ച എടത്വാ സെന്റ് അലോഷ്യസ് ഹയര് സെക്കന്ഡറി സ്കൂളില് പൊതുദര്ശനവുമുണ്ടായിരുന്നു. പള്ളിയിലെ ശുശ്രൂഷയ്ക്കുശേഷം മൃതദേഹത്തില് ഉറ്റവരും ഉടയവരും സഹപാഠികളും നാട്ടുകാരും അന്ത്യചുംബനം അര്പ്പിച്ചു. പൊന്നോമനയുടെ മൃതദേഹത്തിനു മുന്നില് ചലനമറ്റുനിന്ന മാതാവിനേയും പിതാവിനേയും ആശ്വസിപ്പിക്കാന് കഴിയാതെ ഉറ്റവര് തേങ്ങി.
പഠനത്തിനൊപ്പം കായികരംഗത്തും തിളങ്ങിയിരുന്ന ആല്വിന് ഫുട്ബോള് ഹരമായിരുന്നു. സ്കൂള്തലം മുതല് ഫുട്ബോളിനെ അകമഴിഞ്ഞ് സ്നേഹിച്ചിരുന്ന ആല്വിന് ഗവ. ടി.ഡി. മെഡിക്കല് കോളജ് ഫുട്ബോള് ടീമിലും അംഗമായിരുന്നു. കോളജിലെ ഫുട്ബോള് കോര്ട്ടിനെക്കുറിച്ച് അമ്മയോടു വാതോരാതെ സംസാരിച്ചിരുന്ന ആല്വിന്റെ മൃതദേഹത്തില് കോളജ് ടീമിന്റെ ചുവന്ന ജഴ്സിയും സ്റ്റെതസ്കോപ്പും ധരിപ്പിച്ചാണ് ഉറ്റവരും സുഹൃത്തുകളും അന്ത്യയാത്ര നല്കിയത്. ആലപ്പുഴ ടി.ഡി. മെഡിക്കല് കോളജിലെ ആദ്യവര്ഷ വിദ്യാര്ഥികള് സഞ്ചരിച്ചിരുന്ന കാര് കഴിഞ്ഞ രണ്ടിന് രാത്രി ദേശീയപാതയില് കളര്കോട് ചങ്ങനാശേരി മുക്കിനു സമീപം കെ.എസ്.ആര്.ടി.സി. ബസുമായി കൂട്ടിയിടിച്ചായിരുന്നു ദുരന്തം.
അപകടത്തില് ഗുരുതരമായി പരുക്കേറ്റ ആല്വിനെ വിദഗ്ധ ചികിത്സയ്ക്കായി എറണാകുളത്തെ സ്വകാര്യ ആശുപത്രിയില് എത്തിച്ചെങ്കിലും രക്ഷിക്കാനായിരുന്നില്ല. ഈ അപകടത്തില് ആല്വിനെ കൂടാതെ അഞ്ച് വിദ്യാര്ഥികള് മരിക്കുകയും മറ്റ് അഞ്ചുപേര്ക്കു സാരമായി പരുക്കേല്ക്കുകയും ചെയ്തിരുന്നു. പരുക്കേറ്റവര് ഇപ്പോഴും ആലപ്പുഴ മെഡിക്കല് കോളജ് ആശുപത്രിയില് ചികിത്സയിലാണ്.
