പത്തനംതിട്ട : കോയമ്പത്തൂര് എല്ആന്ഡ്ടി ബൈപ്പാസില് കാറില് ലോറി ഇടിച്ച് ഒരു കുടുംബത്തിലെ മൂന്ന് പേര് മരിച്ചു. തിരുവല്ല ഇരവിപേരൂര് കുറ്റിയില് കെസി എബ്രഹാമിന്റെ മകന് ജേക്കബ് എബ്രഹാം (60), ഭാര്യ ഷീല ജേക്കബ് (55), പേരക്കുട്ടി രണ്ടുമാസം പ്രായമായ ആരോണ് ജേക്കബ് തോമസ് എന്നിവരാണ് മരിച്ചത്. കൂടെയുണ്ടായിരുന്ന മരുമകള് എലീന തോമസ് (30)നെ ഗുരുതര നിലയില് സുന്ദരാപുരം അഭിരാമി ആശുപത്രിയിലേക്ക് മാറ്റി.
വ്യാഴാഴ്ച രാവിലെ 11.30 ന് മധുക്കര എല് ആന്ഡ് ടി ബൈ പാസില് നയാര പെട്രോള് പമ്പിന് സമീപമായിരുന്നു അപകടം. തിരുവല്ലയില്നിന്ന് ബെംഗളൂരുവിലേക്ക് പോകുകയായിരുന്ന കാറും പാലക്കാട് ഭാഗത്തേക്ക് പോവുകയായിരുന്ന കുറിയര് വാനുമാണ് നേര്ക്കുനേര് കൂട്ടിയിടിച്ചത്.
അലീനയെയും കുഞ്ഞിനെയും ബംഗളൂരുവിൽ എത്തിക്കാൻ പോകുന്നതിനിടെയാണ് അപകടം. മൃതദേഹങ്ങള് കോയമ്പത്തൂര് മെഡിക്കൽ കോളേജ് ആശുപത്രി മോർച്ചറിയിലേക്ക് മാറ്റി
