തിരുവനന്തപുരം: തിരുവനന്തപുരത്ത് വീണ്ടും എസ്.എഫ്.ഐ. ക്രൂരത. യൂണിവേഴ്സിറ്റി കോളജ് ഹോസ്റ്റലില് എസ്.എഫ്.ഐ. പ്രവര്ത്തകര് വിദ്യാര്ഥിയെ ക്രൂരമായി മര്ദിച്ചവശനാക്കിയെന്നാണു പരാതി. സംഭവത്തില് മ്യൂസിയം പോലീസ് കേസെടുത്തു.
ലക്ഷദ്വീപ് പീച്ച്മാല് സ്വദേശിയും ഇസ്ലാമിക് ഹിസ്റ്ററി രണ്ടാംവര്ഷ വിദ്യാര്ഥിയുമായ മുഹമ്മദ് ഫയാസിനെയാണു മര്ദിച്ചത്. ക്രൂരമായ മര്ദനത്തില് ഫയാസിന്റെ ചെവിക്ക് ഗുരുതര പരുക്കുണ്ട്. വയറിനു ക്ഷതവും സംഭവിച്ചു. വിദഗ്ധ ചികിത്സയ്ക്കായി വിദ്യാര്ഥിയെ മെഡിക്കല് കോളജ് ആശുപത്രിയിലേക്കു മാറ്റി. ഫയാസിന്റെ പരാതിയിലാണ് എസ്.എഫ്.ഐ. പ്രവര്ത്തകര്ക്കെതിരേ പോലീസ് കേസെടുത്തത്.
കോളജ് യൂണിയനുവേണ്ടി പ്രവര്ത്തിക്കാത്തതിന് എസ്.എഫ്.ഐക്കാര് സംഘം ചേര്ന്നു മര്ദിച്ച ഭിന്നശേഷിക്കാരനായ രണ്ടാംവര്ഷ ബിരുദ വിദ്യാര്ഥി മുഹമ്മദ് അനസിനൊപ്പം താന് നില്ക്കുന്നുവെന്ന് ആരോപിച്ചായിരുന്നു ആക്രമണമെന്ന് ഫയാസ് പറഞ്ഞു. വ്യാഴാഴ്ച രാത്രി 12-നായിരുന്നു ആക്രമണം. യൂണിവേഴ്സിറ്റി കോളജ് മെന്സ് ഹോസ്റ്റലിലാണ് ഫയാസ് താമസിക്കുന്നത്. എസ്.എഫ്.ഐ. യൂണിറ്റ് കമ്മിറ്റി അംഗങ്ങളായ ആകാശ്, അമീഷ്, കൃപേഷ്, ആദില്, കോളജിലെ മുന് വിദ്യാര്ഥിയായ അഭിജിത്ത് എന്നിവരുടെ നേതൃത്വത്തിലായിരുന്നു അക്രമണമെന്നു ഫയാസ് പറഞ്ഞു. 'ഇവര് റൂമില് കയറി, ഭിന്നശേഷിക്കാരനായ അനസിനൊപ്പം ഇനി നില്ക്കരുതെന്നു പറഞ്ഞ് ഭീഷണിപ്പെടുത്തി.
പിന്നീട് 'എസ്.എഫ്.ഐക്കാര്ക്കെതിരേ നില്ക്കുമോ' എന്ന് ആക്രോശിച്ച് വളഞ്ഞിട്ട് മര്ദിച്ചു'- ഫയാസ് പറയുന്നു. ഒഴിഞ്ഞുമാറാന് ശ്രമിച്ചെങ്കിലും തറയില് തള്ളിയിട്ട് ചെവിയിലും വയറിലും ആഞ്ഞ് ചവിട്ടുകയും അടിക്കുകയും ചെയ്തു. തുടര്ന്ന് പുറത്തുപോയവര് വീണ്ടുമെത്തി, നീ ലക്ഷദ്വീപുകാരനല്ലേയെന്ന് ആക്രോശിച്ച് ഇതേ രീതിയില് വീണ്ടും മര്ദിച്ചതായി ഫയാസ് പറഞ്ഞു.
ജാതി അധിക്ഷേപം നടത്തിയതായും പരാതിയിലുണ്ട്. ഹോസ്റ്റലില് താമസം തുടര്ന്നാല് വീണ്ടും ഇതേ രീതിയില് ക്രൂരപീഡനം നേരിടേണ്ടിവരുമെന്ന് എസ്.എഫ്.ഐ. പ്രവര്ത്തകര് ഭീഷണപ്പെടുത്തിയതായും പരാതിയിലുണ്ട്. അനസിനെ മര്ദിച്ച കേസിലെ പ്രതികളെ പോലീസ് അറസ്റ്റ് ചെയ്തിട്ടില്ല. പരീക്ഷ കഴിയും വരെ നടപടി അരുതെന്ന കോടതി നിര്ദേശത്തെത്തുടര്ന്നാണ് ഇത്. അതിനിടെയാണ് വീണ്ടും മറ്റൊരു വിദ്യാര്ഥിക്കെതിരേ ആക്രമണം ഉണ്ടായത്.
