ബോളിവുഡിന്റെ സ്വന്തം കിംഗ് ഖാന് ഷാരൂഖ് ഖാന് ഹിന്ദി സിനിമാപ്രേക്ഷകരുടെ ബാദ്ഷയാണ്. താരത്തിന്റെ കുടുംബവും അവരുടെ വിശേഷങ്ങളും ആരാധകര് ആവേശത്തോടെ ഏറ്റെടുക്കാറുണ്ട്. താരത്തിന്റെ മകള് സുഹാന ‘ആര്ച്ചീസ്’ എന്ന സിനിമയിലൂടെ ബോളിവുഡില് അരങ്ങേറ്റം കുറിച്ചപ്പോള് ആരാധകരത് സന്തോഷത്തോടെ സ്വീകരിച്ചു.
കിംഗ് ഖാന്റെ മകന് ആര്യന് ഖാനും ബോളിവുഡില് അരങ്ങേറ്റം കുറിക്കുകയാണ്. അച്ഛന്റെയും സഹോദരിയെയും പോലെയല്ല, മറിച്ച് ക്യാമറയ്ക്ക് പിന്നില് സംവിധായക കുപ്പായമണിഞ്ഞാണ് താരപുത്രന് എത്തുന്നത്. നെറ്റ്ഫ്ലിക്സും റെഡ് ചില്ലീസും ഒന്നിച്ച് നിർമിക്കുന്ന സീരീസായ ‘The BA**DS of Bollywood’ ആണ് ആര്യൻ ആദ്യമായി സംവിധാനം ചെയ്യാൻ ഒരുങ്ങുന്നത്. മകന് സംവിധാനം ചെയ്യുന്ന ചിത്രത്തില് ഷാരൂഖും ക്യാമറയ്ക്ക് മുന്നിലെത്തുന്നുണ്ട്.
ഇപ്പോഴിതാ സീരിസിന്റെ ടെെറ്റില് പ്രഖ്യാപിക്കുന്ന വീഡിയോ സോഷ്യല് മീഡിയയില് വെെറലാകുകയാണ്. വെെകാരികമായ ഒരു അഭ്യർത്ഥയാണ് ഷാരൂഖ് ആരാധകർക്ക് മുന്നില് ആവശ്യപ്പെട്ടത്. ‘‘എന്റെ ഹൃദയത്തില് തൊട്ട് ഞാൻ ആവശ്യപ്പെടുന്നത്. സംവിധാന മേഖലയിലേക്ക് കാലെടുത്തുവച്ച എന്റെ മകനെയും നടിയാകാൻ തയ്യാറെടുക്കുന്ന എന്റെ മകളെയും എനിക്ക് നിങ്ങള് തന്ന സ്നേഹത്തിന്റെ 50 ശതമാനം സ്നേഹമെങ്കിലും നല്കി സ്വീകരിക്കണം. അത് തന്നെ അവർക്ക് മതിയാകും. എന്റെ മകനോട് ഞാൻ പറഞ്ഞിട്ടുണ്ട് പോയി നിന്റെ അച്ഛന് അഭിമാനമുണ്ടാകുന്ന കാര്യങ്ങള് ചെയ്യുവെന്ന്. അവന് നിങ്ങളുടെ സപ്പോർട്ട് കൂടി അതിന് വേണം...’’ ഷാരൂഖ് പറഞ്ഞു. സിനിമാ വ്യവസായത്തിന്റെ പശ്ചാത്തലത്തിലാണ് സീരീസ് ഒരുക്കുന്നത്. ടെറ്റില് പ്രഖ്യാപനദിവസമായ ഇന്നലെ നടന്ന ചടങ്ങില് ഷാരൂഖും എത്തിയിരുന്നു. അപ്പോഴാണ് ഷാരൂഖ് തന്നെയാണ് ഇക്കാര്യം വെളിപ്പെടുത്തിയത്.
