ന്യൂഡല്ഹി: ഇന്ത്യാസ് ഗോട്ട് ലാറ്റന്റ് എന്ന റോസ്റ്റ് ഷോയില് നടത്തിയ പരാമര്ശത്തില് യൂട്യൂബറും പോഡ്കാസ്റ്ററുമായ രണ്വീര് അള്ളാബാദിയയ്ക്ക് പ്രതിസന്ധി കൂടുന്നു. സംഭവം കയ്യില് നിന്നും വിട്ടുപോയതോടെ 31 കാരന് തന്റെ മോശം അഭിപ്രായങ്ങള്ക്ക് ക്ഷമാപണം നടത്തിയെങ്കിലും അദ്ദേഹം നടത്തിയ പ്രസ്താവനകള് രാജ്യസഭയില് വരെ ചര്ച്ചയ്ക്ക് കാരണമായി മാറിയിരിക്കുകയാണ്.
വാര്ത്താവിതരണ പ്രക്ഷേപണ മന്ത്രാലയത്തിന്റെ പാര്ലമെന്ററി പാനലില് വിഷയം ഉന്നയിക്കുമെന്ന് ശിവസേനയുടെ (യുബിടി) രാജ്യസഭാ എംപി പ്രിയങ്ക ചതുര്വേദി പറഞ്ഞു. 'കോമഡി ഉള്ളടക്കത്തിന്റെ പേരില് ഒരു അധിക്ഷേപ ഭാഷയും സ്വീകാര്യമല്ല.' അവര് പറഞ്ഞു. നിങ്ങള്ക്ക് ഒരു പ്ലാറ്റ്ഫോം ലഭിക്കുന്നു, എന്നതിനര്ത്ഥം എന്തും പറയാമെന്നല്ല. ദശലക്ഷക്കണക്കിന് വരിക്കാരുള്ള ഒരാളാണ് അദ്ദേഹം, എല്ലാ രാഷ്ട്രീയക്കാരും അദ്ദേഹത്തിന്റെ പോഡ്കാസ്റ്റില് ഇരുന്നു. പ്രധാനമന്ത്രി അദ്ദേഹത്തിന് അവാര്ഡ് നല്കി...'' വാര്ത്താ വിതരണ പ്രക്ഷേപണ മന്ത്രാലയത്തിന്റെ സ്റ്റാന്ഡിംഗ് കമ്മിറ്റി അംഗം എന്ന നിലയില്, ഞാന് ഈ വിഷയം ഉന്നയിക്കുമെന്നും അവര് വ്യക്തമാക്കി.
ഇന്ത്യാസ് ഗോട്ട് ലാറ്റന്റ് എപ്പിസോഡുമായി ബന്ധപ്പെട്ട് കൂടുതല് പേര്ക്കെതിരെ മുംബൈയിലും ഗുവാഹത്തിയിലും പോലീസ് പരാതികള് ഫയല് ചെയ്തിട്ടുണ്ട്. അശ്ലീലം പ്രചരിപ്പിക്കുന്നതിനും ലൈംഗികച്ചുവയുള്ളതും അശ്ലീലവുമായ ചര്ച്ചയില് ഏര്പ്പെട്ടതിന് അലാബാദിയ, യൂട്യൂബര് ആശിഷ് ചഞ്ചലാനി, കോമിക് ജസ്പ്രീത് സിംഗ്, മഖിജ, റെയ്ന എന്നിവര്ക്കെതിരെ സംസ്ഥാന പോലീസ് എഫ്ഐആര് രജിസ്റ്റര് ചെയ്തിട്ടുണ്ടെന്ന് അസം മുഖ്യമന്ത്രി ഹിമന്ത ബിശ്വ ശര്മ്മ പറഞ്ഞു.
മുംബൈയില്, ഇന്സ്റ്റാഗ്രാമില് 4.5 ദശലക്ഷം ഫോളോവേഴ്സും 1.05 കോടി യൂട്യൂബ് വരിക്കാരുമുള്ള അലാബാദിയയ്ക്കെതിരെ ഒന്നിലധികം പരാതികള് ഫയല് ചെയ്തിട്ടുണ്ട്. സംഭവത്തില് അന്വേഷണം നടത്തി വരികയാണെന്ന് പോലീസ് അറിയിച്ചു. അലാബാദിയയോടും റെയ്നയോടും അന്വേഷണത്തില് ചേരാന് ആവശ്യപ്പെട്ടിട്ടുണ്ട്. അലാബാദിയയുടെ പരാമര്ശത്തെച്ചൊല്ലിയുള്ള തര്ക്കത്തിനിടയില്, ഇക്കാര്യം തന്നെ അറിയിച്ചതായി മഹാരാഷ്ട്ര മുഖ്യമന്ത്രി ദേവേന്ദ്ര ഫഡ്നാവിസ് പറഞ്ഞു.
''എല്ലാവര്ക്കും അഭിപ്രായ സ്വാതന്ത്ര്യമുണ്ട്, എന്നാല് മറ്റുള്ളവരുടെ സ്വാതന്ത്ര്യത്തില് നാം കടന്നുകയറുമ്പോള് ഈ സ്വാതന്ത്ര്യം അവസാനിക്കുന്നു, എല്ലാവര്ക്കും പരിധികളുണ്ട്, ആരെങ്കിലും അത് ലംഘിച്ചാല് നടപടിയെടുക്കും.'' അദ്ദേഹം പറഞ്ഞു.
ബിയര് ബൈസെപ്സ് ഗയ് എന്നറിയപ്പെടുന്ന അലാബാദിയ അടുത്തിടെ റെയ്ന ഹോസ്റ്റ് ചെയ്ത ഇന്ത്യാസ് ഗോട്ട് ലാറ്റന്റിന്റെ ഒരു എപ്പിസോഡിലായിരുന്നു വിവാദ പരാമര്ശം നടത്തിയത്. ഒരു മത്സരാര്ത്ഥിയോട് അദ്ദേഹം ചോദിച്ചു. ''നിങ്ങളുടെ മാതാപിതാക്കള് നിങ്ങളുടെ ജീവിതകാലം മുഴുവന് എല്ലാ ദിവസവും ലൈംഗിക ബന്ധത്തില് ഏര്പ്പെടുന്നത് കാണണോ? ഒരിക്കല് ചെയ്യുക. അത് എന്നെന്നേക്കുമായി നിര്ത്തുക.'' അദ്ദേഹം പറഞ്ഞു. ഈ എപ്പിസോഡിന്റെ വീഡിയോ പുറത്തുവരികയും വൈറലാകുകയും ചെയ്തതോടെ അള്ളാബാദിയ മാപ്പുപറഞ്ഞു.
