ബിഗ് സ്ക്രീനില് പ്രേക്ഷകര്ക്ക് ഇഷ്ടപ്പെട്ട കഥാപാത്രങ്ങള് ചെയ്യുന്ന മമ്മൂട്ടി എന്ന മഹാനടനെ സ്ക്രീനിനു പുറത്തും ആരാധിക്കുകയും സ്നേഹിക്കുകയും ബഹുമാനിക്കുകയും ചെയ്യുന്നതില് ആരാധകര് മാത്രമല്ല ഉള്ളത്. മമ്മൂട്ടിയുമായി മികച്ച സൗഹൃദം കാത്തുസൂക്ഷിക്കുന്ന സഹപ്രവര്ത്തകര് ഒരുപാടാണ്. അക്കൂട്ടത്തില് എടുത്തു പറയാവുന്ന ഒരാളാണ് സലീം കുമാര്. മലയാളികളുടെ പ്രിയപ്പെട്ട നടന്മാരായ മമ്മൂട്ടിയും സലീം കുമാറും വളരെ അടുത്ത സൗഹൃദം കാത്തുസൂക്ഷിക്കുന്നവരാണ്.
ഇപ്പോഴിതാ അടുത്തിടെ നടന്ന ഒരു അഭിമുഖത്തില് മമ്മൂട്ടിയെ കുറിച്ച് സലീം കുമാർ പറഞ്ഞ കാര്യങ്ങളാണ് ആരാധകര് ഏറ്റെടുക്കുന്നത്. പണ്ട് മമ്മൂട്ടിക്കും മറ്റ് താരങ്ങള്ക്കും ഒപ്പം വിദേശയാത്ര പോയ അനുഭവമാണ് താരം പങ്കുവച്ചത്. 2000 ലാണ് മമ്മൂട്ടിയുടെ കൂടെ അമേരിക്കയില് പോകുന്നതെന്നും അന്ന് മമ്മൂട്ടിയുമായി അത്രയും അടുപ്പമില്ലായിരുന്നുവെന്നും സലീം കുമാര് പറയുന്നു.
‘‘2000 ലാണ് മമ്മൂട്ടിയുടെ ഒപ്പം അമേരിക്കയില് പോകുന്നത്. മമ്മൂട്ടിയെ അന്ന് എനിക്ക് അത്ര അറിയില്ലായിരുന്നു. പക്ഷേ ആ യാത്രയിലൂടെ നല്ല സൗഹൃദം സൃഷ്ടിക്കാനായി. അന്ന് ഞാൻ ഒരു ഷൂ ധരിച്ചിരുന്നു. ആ ഷൂ കീറിയതാണോയെന്ന് മമ്മൂട്ടി ചോദിച്ചു. കീറിയതല്ല അല്പം പഴയ ഷൂവാണെന്നാണ് ഞാൻ മറുപടി പറഞ്ഞത്. പിന്നാലെ എന്നോട് ഷൂ അഴിക്കാൻ പറഞ്ഞു. ഷൂ അഴിച്ച് കൊടുത്തപ്പോള് അത് അവിടത്തെ നദിയിലേക്ക് വലിച്ചെറിഞ്ഞു. ശേഷം എന്നോട് വണ്ടിയില് കയറാൻ പറഞ്ഞു. എന്നിട്ട് വിലകൂടിയ ഒരു ഷൂ വാങ്ങി തന്നു...’’ സലീം കുമാര് പറയുന്നു. ഒരു യൂട്യൂബ് ചാനലിന് നല്കിയ അഭിമുഖത്തിലാണ് ഇക്കാര്യം സലീം കുമാര് തുറന്നുപറഞ്ഞത്. രാജമാണിക്യം, മായാവി, തുറുപ്പുഗുലാൻ, മധുര രാജാ, തൊമ്മനും മക്കളും, തസ്കര വീരൻ തുടങ്ങിയ നിരവധി സിനിമകളില് മമ്മൂട്ടിയും സലീം കുമാറും ഒന്നിച്ച് അഭിനയിച്ചിട്ടുണ്ട്. കോമഡി താരമായി വേദികളിലും സിനിമകളിലും അരങ്ങേറ്റം കുറിച്ച സലീം കുമാര് പിന്നീട് ക്യാരക്ടര് റോളുകളിലൂടെ പ്രേക്ഷകരുടെ ഹൃദയവും മനസ്സും കീഴടക്കുകയായിരുന്നു.
