നര്ത്തകിയും നടിയുമായ ഉത്തര ഉണ്ണി തന്റെ കുഞ്ഞുമകളുടെ കുട്ടിക്കാലം ആസ്വദിക്കുന്ന തിരക്കിലാണിപ്പോള്. ജൂലൈയില് ആയിരുന്നു ഉത്തരയുടെ മകള് ധീമഹിയുടെ ഒന്നാം പിറന്നാള്. ഒന്നാം പിറന്നാള് വലിയ ആഘോഷമാക്കിമാറ്റിയിരുന്നു താരം. ഇപ്പോഴിതാ മകളുടെ പുതിയ വീഡിയോ പങ്കുവെച്ചെത്തിയിരിക്കുകയാണ് ഉത്തര ഉണ്ണി.
വീഡിയോയില് പല തരത്തിലുളള കുസൃതികളില് ഏര്പ്പെടുന്ന ധീമഹിയെ കാണാം. അവരെ അനുവദിക്കൂ അവര് ഒരിക്കല മാത്രമാണ് ചെറുതായി ഇരിക്കുന്നത് എന്ന അടിക്കുറിപ്പോടെയാണ് വീഡിയോ താരം പങ്കുവെച്ചിരിക്കുന്നത്.
‘കുട്ടികള് കുട്ടികള് തന്നെയായിരിക്കുന്നതും മുതിര്ന്നവര് മുതിര്ന്നവരെ പോലെ ആയിരിക്കുന്നതും വളരെ പ്രധാനപ്പെട്ട കാര്യമാണെന്നാണ് ഞാന് കരുതുന്നത്. ചില സമയങ്ങളില് നമ്മള് മറ്റുളളവരില് നിന്ന് കുറച്ചധികം പ്രതീക്ഷിക്കും അത് നമ്മളെ നിരാശരാക്കുക മാത്രമല്ല അനാവശ്യമായ സമ്മര്ദ്ദങ്ങള് മറ്റുളളവര്ക്ക് മേല് നല്കുകയും ചെയ്യും.
അമ്മമാരെന്ന നിലയില് നമ്മള് നമ്മുടെ കുഞ്ഞുങ്ങളുടെ നേരെ ആക്രോശിക്കാറുണ്ട്. മിണ്ടാതിരിക്ക്, അവിടെയിരിക്ക്, അത് എടുക്കരുത്, അത് വായില് വെക്കരുത് എന്നെല്ലാം പറയും. എന്നാല് ഒരു കുഞ്ഞിന്റെ ബുദ്ധി പ്രായമായ ഒരാളുടെ ബുദ്ധിപോലെയല്ല പ്രവര്ത്തിക്കുന്നത്. എല്ലാം കൗതുകത്തോടെയും ആകാംഷയോടെയുമാണ് അവര് നോക്കിക്കാണുന്നത്.
ഈ വലിയ ലോകത്തിലേക്ക് നിങ്ങളുടെ കുഞ്ഞ് പുതിയ ഒരു ആളാണ്. എല്ലാം കാണാനും കേള്ക്കാനും അവര് ശ്രമിച്ചു കൊണ്ടിരിക്കും. അവരുടെ വൈകാരികതലം വലുതാണ്. അവര്ക്ക് ആരോഗ്യകരമായ ഭക്ഷണം മാത്രമല്ല വേണ്ടത്., അവരുടെ ഊര്ജ്ജം ഉപയോഗിക്കാനുളള ആക്ടിവിറ്റികള് കൂടെ വേണം. എല്ലാത്തിനുമുപരി അവര്ക്ക് വേണ്ടത് നിങ്ങളുടെ സമയവും ശ്രദ്ധയും സ്നേഹവുമാണ്.
വെളളത്തില് കളിക്കാന് അവരെ അനുവദിക്കുക, പെയിന്റ് മറിക്കട്ടെ , അലങ്കോലമാക്കട്ടെ അത് ഓക്കെയാണ്. അവരെ അതിന് അനുവദിക്കൂ, കാരണം അവര് ഒരിക്കല് മാത്രമാണ് ചെറുതായി ഇരിക്കുന്നത്’ വീഡിയോയില് ഉത്തര ഉണ്ണി പറഞ്ഞു.
ബാല്ക്കണിയില് പെയിന്റ് കൊണ്ട് കളിക്കുന്ന ധീമഹിയുടെ വീഡിയോയിലാണ് ഇത് തുടങ്ങുന്നത് കൈയില് ആകെ പെയിന്റ് ആക്കുന്നതും പൈപ്പിലെ വെളളം തുറന്ന് ധീമഹി കളിക്കുന്നതും കാണാം. പെയിന്റ് കൈയിലാക്കി കാലില് തേക്കുന്നതും സ്വിംമ്മിഗ് പൂളില് സന്തോഷത്തോടെ കുഞ്ഞ് നില്ക്കുന്നതുമെല്ലാം വീഡിയോയില് കാണാം.
കടല്ത്തീരത്ത് മണല് വാരി കളിക്കുന്നതുമെല്ലാം വീഡിയോയിലുണ്ട്. കമന്റ് ബോക്സില് നിരവധി പേരാണ് ഉത്തര പറഞ്ഞതിനെ അനുകൂലിച്ച് എത്തിയിരിക്കുന്നത്.
