താനും സുരേഷ്കുമാറിനൊപ്പമാണെന്നും സുരേഷ്കുമാര് സിനിമയേയോ വ്യക്തികളെയോ മോശമാക്കാന് ശ്രമിച്ചിട്ടില്ലെന്നും തങ്ങള്ക്കിടയില് ഒരു മേശയ്ക്ക് ചുറ്റുമിരുന്ന് പറഞ്ഞു തീര്ക്കാവുന്നതിനേക്കാള് വലുതായ ഒരു പ്രശ്നവുമില്ലെന്നും ലിസ്റ്റണ് സ്റ്റീഫന്. മലയാളം സിനിമാ നിര്മ്മാതാവും നിര്മ്മാതാക്കളുടെ സംഘടനയുടെ ട്രഷററുമായ ലിസ്റ്റണ് സ്റ്റീഫന് വാര്ത്താസമ്മേളനത്തിലാണ് ഇക്കാര്യം പറഞ്ഞത്.
താന് സുരേഷ്കുമാറും ആന്റണി പെരുമ്പാവൂരുമായി സംസാരിച്ചെന്നും തങ്ങള്ക്കിടയില് ഒരു പ്രശ്നവുമില്ലെന്നും പറഞ്ഞു. സിനിമയുടെ നിര്മ്മാണ ചെലവ് കൂടിയതിനാല് ചര്ച്ച നടന്നിരുന്നതായും ചര്ച്ചയില് വിവിധ സംഘടനകള് പങ്കെടുത്തിരുന്നതായും അദ്ദേഹം പറഞ്ഞു. അതേസമയം തന്നെ സിനിമാമേഖലയില് നിരവധി പ്രശ്നങ്ങള് നിലനില്ക്കുന്നുണ്ടെന്നും പറഞ്ഞു. അഭിനേതാക്കളുടെ പ്രതിഫലം കൂടിയത് ഉള്പ്പെടെയുള്ള കാര്യങ്ങള് വരുന്നതിനാല് സിനിമയുടെ നിര്മ്മാണചെലവ് ക്രമാതീതമായി കൂടിയിട്ടുണ്ടെന്നും പറഞ്ഞു.
സിനിമാമേഖലയില് ജോലി ചെയ്യുന്നത് നിരവധി പേരാണ്. 2024 ല് നിരവധി ഹിറ്റുകള് ഉണ്ടായിരുന്നു. എന്നിട്ടും തീയേറ്ററുകള് പൂട്ടേണ്ട അവസ്ഥയിലാണ്. സര്ക്കാരിന് തീയേറ്ററുകള്ക്ക് മുന്ഗണന നല്കേണ്ടി വരുന്നുണ്ടെന്നും പറഞ്ഞു. വാര്ത്താസമ്മേളനം താന് അറിഞ്ഞിരുന്നില്ലെന്നും ലിസ്റ്റണ് സ്റ്റീഫന് പറഞ്ഞു.
സിനിമാ മേഖലയിലെ പ്രശ്നങ്ങള് ചര്ച്ച ചെയ്യാന് ഫെബ്രുവരി ആറിന് ഫിയോക്, ഫെഫ്ക, ഡിസ്ട്രിബ്യൂട്ടേഴ്സ് അസോസിയേഷന് എന്നീ സംഘടനകള് സംയുക്തയോഗം ചേര്ന്നിരുന്നു. ഈ യോഗത്തില് ജൂണ് ഒന്നു മുതല് അനിശ്ചിതകാല സമരം നടത്താന് തീരുമാനിച്ചിരുന്നു. ഇതിന് പിന്നാലെ ഇക്കാര്യം പ്രഖ്യാപിച്ച പ്രൊഡ്യൂസേഴ്സ് അസോസിയേഷന് പ്രസിഡന്റ് ജി സുരേഷ്കുമാറിനെ തള്ളി നിര്മ്മാതാവ് ആന്റണി പെരുമ്പാവൂര് രംഗത്ത് വന്നതോടെയാണ് വിവാദം ചൂടുപിടിച്ചത്. സിനിമാസമരം ആര്ക്കും ഗുണമില്ലെന്ന് ആന്റണി പോസ്റ്റിടുകയായിരുന്നു.
ജൂണ് ഒന്നു മുതല് അനിശ്ചിതകാല സമരം നടത്തുമെന്നത് സംഘടനയുടെ ഔദ്യോഗിക തീരുമാനമെന്ന് പ്രൊഡ്യൂസേഴ്സ് അസോസിയേഷന് വാര്ത്താക്കുറിപ്പില് വ്യക്തമാക്കി. സംഘടനയ്ക്കെതിരേ നടത്തുന്ന നീക്കങ്ങളെ പ്രതിരോധിക്കുമെന്ന് സൂചിപ്പിച്ച് ആന്റണി പെരുമ്പാവൂരിന് താക്കീതുമുണ്ട്്. സംഘടനയുടെ പ്രസിഡന്റ് ആന്റോ ജോസഫ് ലീവിന് അപേക്ഷിച്ചിരുന്നതിനാല് വൈസ് പ്രസിഡന്റുമാരായ ജി. സുരേഷ് കുമാറിനും സിയാദ് കോക്കറിനുമാണ് ചുമതല. അവര് പറഞ്ഞതു സംഘടനയുടെ ഭരണസമിതിയുടെ തീരുമാനമാണ്.
സിനിമാസമരം പ്രഖ്യാപിക്കാന് സുരേഷ് കുമാര് ആരാണെന്നും വിഷയത്തില് അസോസിയേഷന് തീരുമാനമെടുത്തിട്ടില്ലെന്നുമായിരുന്നു ആന്റണി പെരുമ്പാവൂരിന്റെ പോസ്റ്റ്. ക്ഷണിക്കപ്പെട്ടിട്ടും യോഗത്തില് പങ്കെടുക്കാത്ത ആന്റണി പെരുമ്പാവൂര്, ഭരണസമിതി തീരുമാനങ്ങള് മാധ്യമങ്ങളെ അറിയിച്ച ജി.സുരേഷ് കുമാറിനെതിരേ പോസ്റ്റിട്ടത് അനുചിതമാണെന്നും പ്രൊഡ്യൂസേഴ്സ് അസോസിയേഷന് പറയുന്നു. സമരം സിനിമയ്ക്ക് ഗുണകരമാവില്ലെന്ന് പറഞ്ഞുകൊണ്ടുള്ള അദ്ദേഹത്തിന്റെ പോസ്റ്റ് പൃഥ്വിരാജും ഉണ്ണി മുകുന്ദനും ഉള്പ്പെടെയുള്ള താരങ്ങള് ഷെയര് ചെയ്തിരുന്നു. ഇതിനുപിന്നാലെയാണു പ്രൊഡ്യൂസേഴ്സ് അസോസിയേഷന്റെ വിശദീകരണവുമായി രംഗത്ത് വന്നത്.
