മോഹൻലാൽ പൃഥ്വിരാജ് കോമ്പോയിൽ എത്തി ബ്ലോക്ക്ബസ്റ്റർ വിജയം നേടിയ ലൂസിഫറിന്റെ രണ്ടാം ഭാഗത്തിനായി അന്ന് മുതൽ ആവേശത്തോടെ കാത്തിരിക്കുകയാണ് ആരാധകർ.
അതിന്റെ ഓരോ അപ്ഡേറ്റുകളും കാത്തിരുന്ന പ്രേക്ഷകരുടെ മുന്നിലേക്ക് പൃഥ്വി രാജിന്റെ സംവിധാനത്തിലൊരുങ്ങുന്ന എമ്പുരാൻ റിലീസിന് ഒരുങ്ങുകയാണ്. അതിന്റെ ഭാഗമായി ചിത്രത്തിന്റെ പ്രധാനകഥാപാത്രങ്ങളെ പരിചയപ്പെടുത്തികൊണ്ടിരിക്കുകയാണ് അണിയറപ്രവർത്തകർ. ആദ്യ ഭാഗത്തില്ലാത്ത ചിലരും രണ്ടാം ഭാഗത്തിലുണ്ട്.
ആ കൂട്ടത്തിലുള്ള ഒരാളാണ് സുരാജ് വെഞ്ഞാറമൂട്. സജന ചന്ദ്രൻ എന്ന കഥാപാത്രത്തെയാണ് സൂരാജ് എമ്പുരാനിൽ അവതരിപ്പിക്കുന്നത്. കേരള രാഷ്ട്രീയത്തില് കാര്യമായ ഇടപെടല് നടത്തുന്ന രാഷ്ട്രീയ നേതാവാണ് സജനചന്ദ്രന്.
ഇപ്പോഴിതാ കഥാപാത്രത്തെ പരിചയപ്പെടുത്തുന്ന വീഡിയോയില് താന് ചിത്രത്തില് എത്തിയതെങ്ങനെയെന്ന് വെളിപ്പെടുത്തിയിരിക്കുകയാണ് സൂരാജ്.
"രാജുവും ഞാനും ഒന്നിച്ച് അഭിനയിച്ച ഡ്രൈവിംഗ് ലൈസൻസ് എന്ന സിനിമയുടെ സെറ്റില് വച്ച് ഞാൻ പറഞ്ഞു. രാജു, ലൂസിഫർ ഞാൻ കണ്ടു എനിക്ക് ഒരുപാട് ഇഷ്ടമായി. പക്ഷെ, അതില് ആരും കണ്ടെത്തിയിട്ടില്ലാത്ത ഒരു മിസ്റ്റേക്ക് ഞാൻ കണ്ടെത്തി. അതു കേട്ടപ്പോല് രാജുവിന് ആകാംക്ഷയായി.
ആ സിനിമയില് ഞാന് ഇല്ല എന്നതാണ് ആ കുറവ് എന്ന് പറഞ്ഞു, അതുകേട്ട് രാജു പൊട്ടിച്ചിരിച്ചു. ലൂസിഫറിന്റെ രണ്ടാം ഭാഗമായ എമ്പുരാനിൽ എന്നെ അഭിനയിപ്പിച്ച് ആ കുറവ് പരിഹരിക്കാൻ പറഞ്ഞു. പിന്നീട് നാളുകള്ക്ക് ശേഷം 'അണ്ണാ, അന്ന് പറഞ്ഞ കുറവ് പരിഹരിച്ചിട്ടുണ്ട്' എന്ന് പറഞ്ഞ് എനിക്ക് രാജുവിന്റെ കോള് വന്നു.." സുരാജ് വെഞ്ഞാറമൂട് നിറഞ്ഞ ചിരിയോടെ പറഞ്ഞു. ഒപ്പം എമ്പുരാൻ റിലീസ് ഡേറ്റും താരം പങ്കിടുന്നുണ്ട്.
