ക്രിക്കറ്റ് പ്രേമികള് വലിയ ആവേശത്തോടെയാണ് കായികതാരങ്ങളുടെ സോഷ്യല് മീഡിയ പോസ്റ്റുകള് ഏറ്റെടുക്കാറുള്ളത്. കഴിഞ്ഞ കുറച്ചു ദിവസങ്ങളായി ചാമ്പ്യന്സ് ട്രോഫിയില് നിന്നുള്ള വീഡിയോകളാണ് കായികപ്രേമികളുടെ മനസ്സ് കീഴടക്കുന്നത്. ഗ്രൗണ്ടിലെ തകര്പ്പന് പ്രകടനത്തിലൂടെ ഓരോ കായികതാരങ്ങളും സോഷ്യല് മീഡിയയില് തരംഗമായി മാറുന്നുണ്ട്.
ഇപ്പോഴിതാ ചാമ്പ്യന്സ് ട്രോഫിയില് അഫ്ഗാനിസ്താൻ ഇംഗ്ലണ്ടിനെ കീഴടക്കിയതിന്റെ സന്തോഷം ഒരു നൃത്തത്തിലൂടെ പങ്കിടുകയാണ് മുൻ ഇന്ത്യൻ താരം ഇർഫാൻ പത്താൻ. കുർത്തയണിഞ്ഞുകൊണ്ടാണ് ഇർഫാൻ പത്താൻ ടീമിന്റെ വിജയം ആഹ്ലാദനൃത്തത്തിലൂടെ പങ്കിട്ടത്. അഫ്ഗാൻ ജലേബി എന്ന ഗാനത്തിനാണ് താരം ചുവടുവെച്ചത്. ‘‘ഇംഗ്ലണ്ടിനെതിരെ അഫ്ഗാനിസ്ഥാന് മറ്റൊരു ഐ.സി.സി ടൂർണമെന്റ് വിജയം. അഭിനന്ദനങ്ങൾ...’’ എന്ന ക്യാപ്ഷനും താരം വീഡിയോയ്ക്ക് നല്കിയിട്ടുണ്ട്. അഫ്ഗാൻ ടീമിനെ താരം അഭിനന്ദിക്കുകയും ചെയ്തിട്ടുണ്ട്. വീഡിയോ പങ്കിട്ട് നിമിഷനേരം കൊണ്ട് വൈറലായി.
ബുധനാഴ്ചയാണ് ഗ്രൂപ്പ് ബി യിലെ ആവേശപ്പോരാട്ടത്തിനൊടുക്കം അഫ്ഗാൻ എട്ട് റണ്സിന് ഇംഗ്ലണ്ടിനെ കീഴടക്കിയത്. ലാഹോറിലെ ഗദ്ദാഫി സ്റ്റേഡിയത്തില് നടന്ന മത്സരത്തില് ഇംഗ്ലണ്ടിനെതിരേ എട്ട് റണ്സിന്റെ ജയമാണ് അഫ്ഗാനിസ്താൻ കരസ്ഥമാക്കിയത്.
തോല്വിയോടെ ഇംഗ്ലണ്ട് ടൂർണമെന്റില്നിന്ന് പുറത്തായി. അവസാന മത്സരത്തില് ദക്ഷിണാഫ്രിക്കയോട് ജയിച്ചാലും സാധ്യത അവശേഷിക്കുന്നില്ല. അഫ്ഗാനിസ്താന് ഓസ്ട്രേലിയയുമായാണ് അടുത്ത മത്സരം. ജയിച്ചാല് സെമി ഉറപ്പാണ്. തോറ്റാല് ഗ്രൂപ്പില് നിന്ന് ദക്ഷിണാഫ്രിക്കയും ഓസ്ട്രേലിയയും സെമിയില് കയറും.
