തിരുവല്ല: പോലീസ് സ്റ്റേഷന് പരിധിയില് 10 വയസുകാരനെ മറയാക്കി ലഹരി മരുന്ന് വ്യാപാരം നടത്തിയതിന് അറസ്റ്റിലായ പിതാവിനെതിരേ ബാലനീതി നിയമപ്രകാരവും കേസ് രജിസ്റ്റര് ചെയ്തു. ഇയാള്ക്കെതിരേ ഭാര്യയുടെ പരാതിയില് ഗാര്ഹിക പീഡനത്തിനു കേസ് നിലവിലുണ്ട്. രഹസ്യവിവരത്തെ തുടര്ന്നു ഡാന്സാഫ് സംഘവും തിരുവല്ല പോലീസും ചേര്ന്ന് 3.78 ഗ്രാം എം.ഡി.എം.എയുമായി പിടികൂടിയ കുറ്റപ്പുഴ ചുമത്ര കോവൂര് മലയില് വീട്ടില് മുഹമ്മദ് ഷമീറി(39)നെതിരേയാണു മകനെ സംരക്ഷിക്കാത്തതിനു ബാലനീതി നിയമത്തിലെ വകുപ്പ് 78 പ്രകാരം ഭാര്യയുടെ മൊഴിവാങ്ങി കേസെടുത്തത്.
രാസലഹരിവസ്തു പ്ലാസ്റ്റിക് കവറില് പൊതിഞ്ഞ്,നിറമുള്ള ടേപ്പ് കൊണ്ട് സ്വന്തം ശരീരത്തില് ഒട്ടിച്ചു വച്ച് തിരുവല്ലയിലും പരിസരങ്ങളിലുമുള്ള ആവശ്യക്കാര്ക്ക് എത്തിച്ചു വരികയായിരുന്നു ഇയാള്. മകന് ചെറിയ കുട്ടിയായിരുന്നപ്പോള് കൂടെകൂട്ടുമായിരുന്നു. സ്വന്തമായ ഒരു വിപണന ശൃംഖല തന്നെ സൃഷ്ടിച്ച പ്രതി പ്രഫഷണല് വിദ്യാര്ഥികള്ക്കും മറ്റ് കോളജ് വിദ്യാര്ഥികള്ക്കും ലഹരിവസ്തു വില്പന നടത്തി വരികയാണെന്നു പോലീസിനോട് സമ്മതിച്ചു. കര്ണാടകയില്നിന്നും മറ്റുമാണ് രാസലഹരിവസ്തുക്കള് എത്തിക്കുന്നത്.
വിദ്യാര്ഥികളെ ഏജന്റുമാരായി ഉപയോഗിക്കുന്നുണ്ടോ, ലഹരിവസ്തുക്കളുടെ സ്രോതസ്സ്, പ്രതിക്കു കൂട്ടാളികള് ഉണ്ടോ തുടങ്ങിയ കാര്യങ്ങളില് വിശദമായ അന്വേഷണം നടക്കുകയാണ്. ഷമീര് റിമാന്ഡിലായതിനെ തുടര്ന്നു ഭാര്യ പോലീസില് പരാതി നല്കി. ഇവര് വിദേശത്ത് അക്കൗണ്ടന്റായി ജോലി നോക്കുകയാണ്. വീട്ടില് മാതാപിതാക്കളും 12 വയസ്സുള്ള മകനുമാണു താമസം. 13 വര്ഷം മുമ്പാണു ഷമീറുമായുള്ള വിവാഹം നടന്നത്. ആറു വര്ഷമായി ഷമീര് രാസലഹരി വസ്തുക്കള് ഉപയോഗിക്കുന്നതായി ഇവരുടെ മൊഴിയില് പറയുന്നു.
മകന് അയാള്ക്കൊപ്പമായിരുന്നു താമസം. ലഹരി വസ്തുക്കള് ഉപയോഗിക്കുന്നോടൊപ്പം, വില്പ്പനയും ഉണ്ടായിരുന്നു. 2019 മുതല് 2021 വരെയുള്ള കാലയളവില് മകനെ സ്കൂട്ടറിന്റെ മുന്നില് ഇരുത്തി അവനെയും കൂട്ടിയാണു ഭര്ത്താവ് ലഹരിക്കച്ചവടത്തിനു പോയിരുന്നത്. ഇക്കാര്യത്തില് പലതവണ താക്കീത് കൊടുത്തിട്ടും കേട്ടില്ലെന്നും ദേഹോപദ്രവം ഏല്പ്പിക്കുമെന്നും ഇവര് പോലീസിനോട് പറഞ്ഞു.
കഴിഞ്ഞ ഒക്ടോബര് അഞ്ചിനു രാത്രി, മദ്യപാനവും ലഹരി ഉപയോഗവും ചോദ്യം ചെയ്തതിന്റെ പേരില് ഭിത്തിയില് ഇടിക്കുകയും കമ്പി കൊണ്ട് ദേഹമാകെ മര്ദിക്കുകയും ചെയ്തതായി കാട്ടി ഇവര് പരാതി നല്കിയത് പ്രകാരം തിരുവല്ല പോലീസ് കേസെടുത്തു അന്വേഷണം നടത്തിയിരുന്നു. കേസ് ഇപ്പോള് തിരുവല്ല ജെ.എഫ്.എം. കോടതിയുടെ പരിഗണനയിലാണ്. വിവാഹബന്ധം വേര്പെടുത്തുന്നതിനു തിരുവല്ല കുടുംബ കോടതിയില് കേസ് നല്കിയിട്ടുള്ളതായും മൊഴിയിലുണ്ട്. ഷമീറിനെ ഭയന്നാണ് ഇതുവരെ പരാതിപ്പെടാഞ്ഞതെന്നും ഇപ്പോള് റിമാന്ഡ് ആയ ധൈര്യത്തിലാണ് ഇതിനു മുതിര്ന്നതെന്നും വെളിപ്പെടുത്തി.
